Bo Interes den Cosnan Spiritual y Bo Bienestar

PROBABLEMENTE bo ta dedica hopi tempo pa cuida bo salu. Kisas, tur dia bo ta pasa ocho ora na soño, uza varios ora pa cushina y pa come, y ocho ora of mas pa traha pa bo tin un dak riba bo cabes y cuminda pa come. Si bo bira malo, probablemente bo ta dedica tempo y placa pa bai un docter of pa traha un remedi di cas. Tambe bo ta limpia cas, baña y podise asta haci ehercicio regularmente, tur esei pa bo tin un bon salu.

Pero pa bo tin un bon salu, bo tin cu bai mas leu cu djis percura pa bo necesidadnan fisico. Tin algo mas cu ta masha vital pa bo bienestar. Estudionan medico a saca na cla cu bo salu fisico ta estrechamente liga cu bo salu of condicion spiritual, esta, bo interes of falta di interes den cosnan spiritual.

Un Conexion Positivo

Profesor Hedley G. Peach di e Universidad di Melbourne, Australia, a bisa: “Mayoria articulo original di investigacion riba e topico aki a saca na cla cu mas interes un hende tin den cosnan spiritual [of, mas e ta busca Dios], miho salu lo e tin.” Comentando riba e resultadonan aki, The Medical Journal of Australia a declara: “Tambe nos a mira cu un hende religioso ... su presion di sanger ta mas abou, su colesterol ta mas abou ... y asta e ta core menos riesgo di haya cancer na tripa.”

 Mescos tambe, na Merca un estudio cu Universidad di California, situa na Berkeley, a conduci na aña 2002 cu 6.545 hende, a mustra cu “hende cu ta bai misa un biaha pa siman ta biba remarcablemente mas largo cu esnan cu ta bai masha poco of cu no sa bai mes.” Doug Oman, autor principal di e estudio y profesor di e Facultad di Salu Publico na e universidad aki, a bisa: “Nos a haya e diferencia aki asta despues cu nos a tene cuenta cu factornan manera lasonan social y cierto custumbernan cu tin influencia riba salu, manera humamento y ehercicio.”

Segun The Medical Journal of Australia, hende cu ta mira bida for di un punto di bista spiritual ta haya mas beneficio. El a bisa: “Estudionan Australiano a haya cu entre hende religioso tin mas stabilidad matrimonial, menos uzo di alcohol y droga, un porsentahe mas abou di suicidio y menos pensamento den e direccion ei, menos ansiedad y depresion y mas amor sin egoismo.” Ademas, e revista BMJ (antes conoci como The British Medical Journal) a bisa: “Aparentemente, hende cu ta kere mas firme ainda den Dios ta pasa over di nan tristesa mas lihe y mas completamente despues di e morto di un ser keri, cu otro hende cu no tin e mesun conviccion ei.”

Tin varios pensamento tocante kico realmente kiermen ser un persona spiritual. Ma un cos ta sigur: bo condicion spiritual tin hopi di aber cu bo salu fisico y mental. E evidencia aki ta na harmonia cu un declaracion cu Hesucristo a haci casi 2.000 aña pasa. El a bisa: “Felis [ta] esnan cu ta reconoce cu nan tin mester di Dios.” (Mateo 5:3, Beibel na papiamentu koriente) Ya cu bo salu y bo felicidad tin hopi di aber cu bo condicion spiritual, lo bo ta puntrando bo mes: ‘Unda mi por haya guia spiritual confiabel? Y kico ta nifica ser un persona spiritual?’