Ta Semper Bo Mester di un Mandamento Biblico?

TEMPO bo tawata chikito, bo mayornan probablemente a duna bo hopi regla. Segun cu bo a bira mas grandi, bo a bin compronde cu bo mayornan tawata interesa den bo bienestar. Como adulto, probablemente ainda bo ta biba segun algun principio cu nan a inculca den bo, aunke bo no ta bou di nan autoridad mas.

Nos Tata celestial, Yehova, ta duna nos un cantidad di mandamento spesifico mediante su Palabra, Bijbel. Por ehempel, e ta prohibi idolatria, fornicacion, adulterio y ladronicia. (Exodo 20:1-17; Echonan 15:28, 29) Segun cu spiritualmente nos ta “crece den tur aspecto”, nos ta bin compronde cu Yehova tin nos bienestar na pecho y cu su mandamentonan no ta demasiado restrictivo.—Efesionan 4:15; Isaias 48:17, 18; 54:13.

Sinembargo, tin hopi situacion pa cua no tin un mandamento direct of spesifico. Pues den casonan asina, tin hende ta sinti cu ya cu no tin un lei biblico spesifico, nan ta liber pa haci manera nan kier. Nan ta argumenta cu si Dios a haya cu tawata necesario, lo el a expresa su boluntad den forma di un mandamento spesifico.

Hende cu ta pensa asina, hopi bes ta tuma decisionnan imprudente cu despues nan ta lamenta masha hopi. Nan no ta mira cu Bijbel no ta contene lei so, sino tambe cosnan cu ta indica con Dios ta pensa. Segun cu nos ta studia Bijbel y ta siña conoce Yehova su punto di bista di asuntonan, nos ta desaroya un consenshi biblicamente entrena y esei ta yuda nos tuma decisionnan cu ta refleha su manera di pensa. Ora nos ta haci asina, nos ta alegra su curason y nos ta cosecha e beneficionan cu ta bin di tuma decisionnan sabi.—Efesionan 5:1.

Ehempelnan Biblico Sobresaliente

Ora nos considera relatonan biblico di sirbidonan di Dios di pasado, nos ta haya situacionnan den cua nan a tuma Yehova su manera di pensa na cuenta asta ora nan no tawata bou di un mandato spesifico. Considera e ehempel di Yosef (Hose). Tempo cu el a confronta e proposicionnan inmoral di e casa di Potifar, no tawatin un lei por escrito y inspira pa Dios contra adulterio. Sinembargo, asta sin un lei spesifico, Yosef a compronde cu adulterio tawata un pica no solamente contra su mes consenshi sino tambe “contra Dios.” (Genesis 39:9) Evidentemente, a base di loke Dios a expresa den Eden, Yosef a reconoce cu adulterio tawata contra Dios su manera di pensa y su boluntad.—Genesis 2:24.

Considera un otro ehempel. Na Echonan 16:3, nos ta lesa cu prome cu Pablo a laga Timoteo compañ’e durante su biahenan cristian, el a sircuncida Timoteo. Sinembargo, den versiculo 4 nos ta lesa cu Pablo cu Timoteo despues di esei a biaha door di e stadnan entregando “reglanan cu a wordo decreta door di e apostelnan y e ancianonan cu tawata na Herusalem.” Entre e reglanan ei tawatin e decision cu cristiannan no tawata obliga mas di ser sircuncida! (Echonan 15:5, 6, 28, 29) Dicon anto Pablo a haya cu tawata necesario pa sircuncida Timoteo? “Pa motibo di e Hudiunan cu tawata na e luganan ei, pasobra nan tur tawata sa cu [Timoteo] su tata tawata  Griego.” Pablo no kier a ofende of trompica e Hudiunan ei innecesariamente. E tawata masha interesa pa cristiannan sigui “recomenda [nan] mes na e consenshi di tur hende den bista di Dios.”—2 Corintionan 4:2; 1 Corintionan 9:19-23.

E manera di pensa aki tawata algo tipico di Pablo y Timoteo. Lesa pasashinan manera na Romanonan 14:15, 20, 21 y 1 Corintionan 8:9-13; 10:23-33, y mira con profundamente interesa Pablo tawata den e bienestar spiritual di otro hende, specialmente di esnan cu lo por a trompica riba algo cu eigenlijk no tawata malo. Y Pablo a skirbi tocante Timoteo: “Pasobra mi no tin ni un otro hende di e mesun spirito cu lo precupa sinseramente pa boso bienestar. Pasobra nan tur ta busca nan mes interesnan, no esnan di Cristo Hesus. Ma boso tin prueba di su fieldad, cu el a sirbi hunto cu mi, manera un yiu cu su tata, den e trabou di evangelio.” (Filipensenan 2:20-22) Ki un bunita ehempel e dos hombernan cristian aki a pone pa nos awe! En bes di scohe nan cumbiniencia of preferencia personal ora no tin un mandamento dibino spesifico, nan a imita e amor di Yehova y su Yiu door di considera con nan decision personal lo por afecta otro hende spiritualmente.

Considera Hesucristo, nos ehempel principal. Den su Sermon Riba Sero, el a splica bon cla cu e persona cu capta e spirito di e leinan di Dios lo obedece nan mas aya di loke ta ser manda of prohibi spesificamente. (Mateo 5:21, 22, 27, 28) Ni Hesus, Pablo, Timoteo of Yosef no a rasona cu ya cu no tin un lei dibino spesifico, un persona por haci manera cu e kier. Na harmonia cu Dios su manera di pensa, e hombernan aki a hiba nan bida segun e dos mandamentonan di mas grandi di tur: stima Dios y stima bo prohimo.—Mateo 22:36-40.

Kico di Cristiannan Djawe?

Ta bisto cu nos no mester considera Bijbel manera hende ta considera un documento legal: cu e mester describi tur obligacion bon cla y detayadamente. Nos ta haci Yehova su curason masha contento ora nos scohe pa haci loke ta refleha su manera di pensa, asta ora no tin un lei spesifico pa dicta nos accion. Cu otro palabra, en bes di cu semper nos mester haya un mandamento spesifico for di Dios, nos por ‘compronde kico ta e boluntad di Yehova.’ (Efesionan 5:17; Romanonan 12:2) Dicon esaki ta haci Yehova contento? Pasobra esei ta mustra cu nos ta mas interesa den agrada Yehova cu den nos preferencia- y derechonan personal. Tambe esei ta mustra cu nos ta asina gradicido pa su amor cu nos kier imita e amor ei, y hacie e forsa cu ta motiva nos. (Proverbionan 23:15; 27:11) Ademas, actonan cu ta basa riba loke e Scritura ta indica, ta contribui na bon salu spiritual y hopi bes tambe na bon salu fisico.

Laga nos mira con nos por aplica e principio aki den asuntonan personal.

Ora di Scohe Dibirticion

Considera e caso di un mucha homber cu kier cumpra un cierto album musical. Loke el a tende di e album ta zona hopi bon, pero loke ta precup’e ta cu e portada patras ta indica cu e letranan tin hopi palabra malo y detayenan sexual. Tambe e sa cu un gran parti di e artista su grabacionnan ta refleha un spirito agresivo y di rabia. Como un hende cu ta stima Yehova, e hoben aki ta interesa den kico Yehova su  pensamento y sintimentonan ta pa cu e asunto. Con e por compronde kico ta Dios su boluntad den esaki?

Den su carta na e Galationan, apostel Pablo a menciona e obranan di carni y e fruta di Dios su spirito. Probablemente bo sa kico e fruta di Dios su spirito ta encera: amor, goso, pas, pasenshi, cariño, bondad, fieldad, mansedumbre, dominio propio. Pero cua ta e actividadnan cu ta cai bou di obranan di carni? Pablo a skirbi: “Awor e obranan di carni ta evidente, cuanan ta: inmoralidad, impuresa, sensualidad, idolatria, bruheria, hostilidad, bringamento, yalursheid, rabiamento, pleitamento, desacuerdo, doctrina falso, envidia, buracheria, parandiamento, y cosnan asin’aki, di cuanan mi ta spierta boso di antemano, mescos cu mi a spierta boso caba di antemano, cu esnan cu practica sorto di cosnan asina lo no hereda e reino di Dios.”—Galationan 5:19-23.

Tuma nota di e ultimo expresion den e lista ei: “cosnan asin’aki.” Pablo no a duna un lista completo di tur loke por ser considera un obra di carni. No ta asina cu un hende por rasona: ‘Biblicamente, mi tin mag di participa den tur actividad cu no ta riba Pablo su lista di obranan di carni.’ Mas bien, lectornan lo tawatin cu uza nan mente, nan capasidad di discerni, pa identifica cosnan cu kisas no ta riba e lista pero cu ta “cosnan asin’aki.” Esnan cu sin repenti ta participa den practicanan cu no ta ser menciona pero cu ta “cosnan asin’aki” lo no hereda e bendicionnan di e Reino di Dios.

Pues, nos tin cu compronde, of discerni, kico ta desagrada Yehova. Ta dificil pa haci esei? Supone cu bo docter a conseha bo pa come mas fruta cu berdura, pero evita kesiyo, eiscrim y cosnan asina. Lo ta dificil pa determina ta den cua categoria bolo ta cai? Awor, bolbe wak e fruta di Dios su spirito y e obranan di carni. Na cua categoria e album musical menciona ariba ta pertenece? Un cos ta sigur, e no ta refleha e cualidadnan manera amor, bondad, dominio propio, ni e otro cualidadnan asocia cu e fruta di Dios su spirito. Un hende lo no tin mester di un lei spesifico pa e compronde cu e tipo di musica aki no ta cuadra cu Dios su manera di pensa. E mesun principionan ta aplica na material di lesa, pelicula, programa di television, wega di computer, Web site, etcetera.

Aparencia Personal Aceptabel

Tambe Bijbel ta duna principionan cu tin di aber cu nos manera di bisti y peña. E principionan aki ta haci posibel cu cada cristian por ser guia pa mantene un aparencia personal apropiado y agradabel. Aki atrobe, e persona cu stima Yehova ta mira den esaki un oportunidad pa haci loke lo alegra curason di su Tata celestial, y no un chens pa e haci loke sea cu e tin gana di haci. Manera nos a mira caba, e echo cu Yehova no a duna reglanan spesifico den un asunto no ta nifica cu e no tin cu nes kico su pueblo ta haci. Style di bisti ta varia di un luga pa otro, y tin biaha asta den e mesun luga, e ta cambia periodicamente. Sinembargo, Dios ta duna principionan basico cu mester guia su pueblo tur momento y tur caminda.

Por ehempel, 1 Timoteo 2:9 y 10 ta bisa: “Mescos, mi kier pa hende mohe dorna nan mes cu bisti apropiado, decente y modera, no cu cabei tur na vlecht y oro of perla of bisti costoso, sino mas bien cu bon obra, manera ta pas pa mohenan cu ta teme Dios.” Pues, mohenan—y hombernan—cristian mester considera cuidadosamente ki clase di aparencia hende den nan area ta spera di esnan cu “ta teme Dios.” Ta masha apropiado pa un cristian considera kico su aparencia lo pone hende pensa di e mensahe di Bijbel cu e ta hiba. (2 Corintionan 6:3) Un cristian ehemplar lo no ta demasiado precupa cu su propio preferencianan of supuesto derechonan, sino mas bien lo e ta precupa pa e no bira un distraicion of un piedra di trompica pa otro hende.—Mateo 18:6; 1 Corintionan 8:9-13.

Ora un cristian nota cu un cierto style den su aparencia personal ta ofende of trompica otro hende, e por imita apostel Pablo door di  pone e precupacion pa e bienestar spiritual di otro hende prome cu su preferencianan personal. Pablo a bisa: “Sea imitadonan di mi, mescos cu ami tambe ta di Cristo.” (1 Corintionan 11:1) Y tocante Hesus, Pablo a skirbi: “Ni Cristo no a agrada su mes.” Pablo su instruccion pa tur cristian ta bon cla: “Awor nos cu ta fuerte mester soporta e debilidadnan di esnan cu ta sin forsa, y no djis agrada nos mes. Laga cada un di nos agrada su prohimo pa su bon, pa su edificacion.”—Romanonan 15:1-3.

Haci Nos Capasidad di Discerni Mas Skerpi

Con nos por desaroya nos capasidad di discerni pa asina nos por sa con pa agrada Yehova asta ora e no a duna instruccion spesifico den un asunto? Si nos ta lesa su Palabra tur dia, ta studi’e regularmente, y ta medita riba loke nos a lesa, nos lo nota cu nos ta crece den nos capasidad di discerni. E crecemento ei no ta tuma luga rapidamente. Mescos cu e crecemento fisico di un mucha, crecemento spiritual ta tuma luga gradualmente y bo no ta ripar’e mesora. Pesei nos mester tin pasenshi, y nos no mester sinti nos tur frustra si nos no ripara un mehoransa mesora. Di otro banda, djis pasobra hopi tempo a pasa riba su mes no ta haci nos mente of nos capasidad di discerni mas skerpi. Manera a ser menciona ariba, nos mester yena e tempo ei cu un consideracion regular di e Palabra di Dios, y nos tin cu aplica e Palabra ei den nos bida lo miho cu nos por.—Hebreonan 5:14.

Nos por bisa cu e leinan di Dios ta test nos obediencia, mientras cu su principionan ta test con profundo nos spiritualidad y nos deseo di agrad’e ta. Segun cu nos ta crece spiritualmente, nos lo pone mas enfasis riba imita Yehova y su Yiu. Nos lo ta ansioso pa tuma nos decisionnan a base di loke Dios ta pensa di asuntonan, manera ta ser indica den e Scritura. Segun cu nos ta alegra e curason di nos Tata celestial den tur loke nos ta haci, nos lo nota cu nos propio goso tambe ta aumenta.

[Plachinan na pagina 23]

Stylenan di bisti ta varia di un luga pa otro, pero principionan di Bijbel mester guia loke nos ta scohe