Mediante Fe, Barak A Derota un Ehersito Poderoso

IMAGINA cu bo ta cara cara cu un batayon di solda agresivo. Nan ta arma cu lo ultimo den ekipo militar, y ta cla pa uz’e. Abo cu bo compañeronan ta practicamente indefenso nan dilanti.

Barak, Debora y 10.000 Israelita a experencia esaki durante e periodo di e huesnan di Israel. E ehersito enemigo tawata Cananeonan encabesa pa e comandante militar Sisara. Nan arsenal a inclui garoshi ekipa cu cuchiu di hero mortal na nan wielnan. E sitio tawata Sero Tabor y e yanura di Riu Kison. Loke a tuma luga einan a mustra cu Barak tawata un bon ehempel di fe. Considera e susesonan cu a hiba na e confrontacion aki.

Israel A Sclama na Yehova

E buki di Huesnan ta conta con Israel cada biaha tawata bandona adoracion puro, y kico tawata e consecuencianan desastroso di tal accion. Den cada caso, nan tawata roga Dios sinseramente pa tene misericordia di nan; Dios tawata nombra un salbado, nan tawata wordo libra, anto despues nan tawata bolbe rebeldia contra Dios. Na harmonia cu e patronchi ei, “e yiunan di Israel a bolbe haci maldad den bista di SEÑOR, despues di e morto di Aod [of Ehud, un hues cu a salba nan for di opresion Moabita].” De echo, nan a ‘scohe diosnan nobo.’ Cu ki resultado? Yehova “a bende nan cu Yabin, Rei di Canan, kende tawata reina na Hazor; y e comandante di su ehersito tawata Sisara . . . Y e yiunan di Israel a sclama na SEÑOR, pasobra [Sisara] tawatin nuebeshen garoshi di hero, y el a oprimi e yiunan di Israel severamente pa binti aña.”—Huesnan 4:1-3; 5:8.

E Scritura ta bisa relaciona cu bida den Israel: “[Den e dianan ei] e camindanan grandi a keda bandona, y biaheronan tawata pasa pa camindanan yen di lorada. Bida di e cunukeronan a caba.” (Huesnan 5:6, 7) E hendenan tawata morto spanta pa e trupanan di bandido den garoshi. Un comentarista di Bijbel a bisa: “Bida publico na Israel a ser domina pa miedo. Henter e comunidad aparentemente tawata paralisa y indefenso.” Anto manera nan a haci hopi bes caba, e Israelitanan desanima a sclama na Yehova pa yudansa.

Yehova A Nombra un Lider

E opresion Cananeo tawata un tempo di crisis nacional pa Israel. Dios a uza profeta Debora pa transmiti su huicionan y su instruccionnan. Asina Yehova a otorg’e e privilegio di actua manera un mama den Israel.—Huesnan 4:4; 5:7.

Debora a manda yama Barak y a bis’e: “Mira, SEÑOR, e Dios di Israel, a duna ordo: ‘Marcha bai Sero Tabor, y hiba hunto cu bo dies mil homber di e yiu hombernan di Neftali y di e yiu hombernan di Zabulon. Y lo mi haci Sisara, comandante di e ehersito di Yabin,  bin serca bo na Riu Kison cu su garoshinan y su trupanan, y lo mi entreg’e den bo man.’” (Huesnan 4:6, 7) Door di bisa ‘Yehova a duna ordo’, Debora a mustra bon cla cu e personalmente no a pretende di tin autoridad riba Barak. Simplemente el a actua como e canal via cua e ordo dibino a ser transmiti. Con Barak a reacciona?

Barak a bis’e: “Si bo bai cu mi, mi ta bai, ma si bo no bai cu mi, mi no ta bai.” (Huesnan 4:8) Dicon Barak no tawata masha dispuesto pa acepta e responsabilidad cu Dios a dun’e? Ta cobarde e tawata? Of e no tawatin confiansa den e promesanan di Dios? No ta asina. Barak no a nenga e asignacion, ni e no a desobedece Yehova. Mas bien su reaccion a indica cu el a sinti cu e no tawata suficiente capasita pa e so cumpli cu loke Dios a mand’e haci. E presencia di Dios su representante lo a garantisa guia dibino y lo a duna tanto e como su soldanan mas confiansa. Pesei, en bes di tawata un señal di debilidad, e condicion cu Barak a stipula tawata un indicacion di fe fuerte.

Nos por compara Barak su reaccion cu esun di Moises, Gideon y Yeremias. E hombernan aki tampoco no tawatin confiansa den nan habilidad di cumpli cu e tareanan cu Dios a duna nan. Pero nan no a ser considera menos fiel debi na esei. (Exodo 3:11–4:17; 33:12-17; Huesnan 6:11-22, 36-40; Yeremias 1:4-10) Y kico nos por bisa di e actitud di Debora? E no a purba tuma control. Al contrario, el a keda un sirbido modesto di Yehova. El a bisa Barak: “Siguramente mi ta bai cu bo.” (Huesnan 4:9) E tawata dispuesto pa laga su cas—un luga di mayor siguridad—pa bai join Barak pa e bataya inminente. Debora tambe ta un bon ehempel di fe y curashi.

Cu Fe Nan A Sigui Barak

E trupanan di Israel mester a topa na un sero notabel cu yama Tabor. E sitio tawata bon scohi. E tawata un punto di encuentro logico pa e tribunan di Neftali y Zabulon, cu a biba den bicindario. Pues manera Dios a ordena, dies mil boluntario—y Debora—a subi e sero aki tras di Barak.

Tur esnan cu a join Barak mester tawatin fe. Yehova a priminti Barak victoria riba e Cananeonan, pero ta ki arma e Israelitanan tawatin? Huesnan 5:8 ta bisa: “Ni un escudo ni lansa no a wordo mira den cuarenta mil na Israel.” Kiermen cu e Israelitanan tawatin masha tiki arma. Asina mes, lansa y escudo sigur lo no a sirbi contra garoshi di guera ekipa cu cuchiu di hero na nan wielnan. Ora cu Sisara a tende cu Barak a subi Sero Tabor, mesora el a reuni tur su garoshinan y trupanan den e yanura di Riu Kison. (Huesnan 4:12, 13; NW) Sisara no a realisa cu ta contra Dios Todopoderoso lo el a bringa.

Barak A Derota e Ehersito di Sisara

Ora cu e momento di confrontacion a yega, Debora a bisa Barak: “Lanta! Pasobra esaki ta e dia cu SEÑOR a entrega Sisara den bo man; mira, SEÑOR a bai bo dilanti.” Barak cu su soldanan mester a baha for di Sero Tabor bai den e yanura, pero einan e garoshinan di Sisara lo tawatin un bentaha strategico riba nan. Con abo lo a sinti si bo tawata den e ehersito di Barak? Lo bo a cumpli umbes cu e ordo, cordando cu ta for di Yehova el a bin? Barak cu su dies mil hombernan a obedece. “Y cu filo di spada SEÑOR a confundi Sisara y  tur su garoshinan y henter su ehersito dilanti di Barak.”—Huesnan 4:14, 15.

Cu e apoyo di Yehova, Barak a derota Sisara su ehersito. E relato di e bataya no ta splica tur loke cu a sosode. Sinembargo, e cantica di victoria di Barak cu Debora ta bisa cu ‘shelo y nubia tawata gotia awa.’ Muy probablemente, un awasero pisa a pone e garoshinan di Sisara pega den lodo, dunando Barak bentaha riba su enemigo. Di e manera ei e Cananeonan su arma principal di atake a resulta di ta un desbentaha. Pa loke ta e cadavernan di e hombernan di Sisara, e cantica ta bisa: “Riu Kison a lastra nan bai cu ne.”—Huesnan 5:4, 21.

E senario aki ta creibel? E Riu Kison ta loke nan ta yama un wadi, un riu cu normalmente tin masha tiki awa. Pero despues di tormenta of awasero pisa, tin hopi chens cu e tipo di riunan ei ta crece diripiente y bira un coriente di awa rapido y peligroso. Durante Prome Guera Mundial, solamente 15 minuut di awasero riba e tera di klei den e mesun area ei supuestamente a pone na peliger e exito di tur maniobra di cabayeria. Relatonan di e bataya na Sero Tabor entre Napoleon y e Turconan dia 16 di april 1799, ta bisa cu “hopi di e [Turconan] a hoga ora nan a purba scapa via di un parti di e yanura inunda pa Kison.”

Historiado Hudiu Flavio Yosefo ta bisa cu net ora cu e ehersitonan di Sisara y Barak tawata a punto di topa, “un gran tormenta a baha for di shelo, cu un cantidad enorme di awasero y hagel, y biento a supla e awasero den cara di e Cananeonan, y a tapa nan bista asina tanto, cu nan flecha- y slingernan no a sirbi pa nada.”

Huesnan 5:20 ta declara: “For di shelo e streyanan tawata bringa, for di nan curso nan tawata bringa contra Sisara.” Con e streyanan a bringa contra Sisara? Tin hende ta considera cu e declaracion aki ta referi na yudansa dibino. Otronan ta di opinion cu e texto ta referi na yudansa angelical, yobida di meteorit of Sisara su confiansa den pronosticonan astrologico cu a resulta falso. Siendo cu Bijbel no ta splica den ki manera precis e streyanan a bringa den e bataya aki, nos por conclui simplemente cu e declaracion aki ta indica cu tawatin un of otro forma di intervencion dibino na fabor di e ehersito di Israel. Sea cual sea e caso, e Israelitanan a probecha plenamente di e situacion. “Barak a persigui e garoshinan . . . y henter e ehersito di Sisara a muri pa medio di filo di spada; no a keda ni un.” (Huesnan 4:16) Con a para cu comandante Sisara?

E Opresor A Wordo Entrega den Man di un Mohe

Bijbel ta bisa: “Awor Sisara [a bandona e bataya y] a hui na pia bai na e tent di Jael, esposa di Heber e Keneo, pasobra tawatin pas entre Yabin, Rei di Hazor, y e cas di Heber e Keneo.” Jael a invita Sisara—kende tawata morto cansa—pa drenta den su tent, y a dun’e lechi pa bebe y a tap’e, di manera cu el a pega soño. Anto Jael “a cohe un staca di tent y a cohe un martiu den su man”, cosnan cu un hende cu ta biba den tent tawata uza regularmente. Caba el “a bai keto keto serca dje y a claba e staca den su sinti; y esaki a pasa door en door bai den suela, pasobra e tawata morto na  soño y masha cansa. Asina el a muri.”—Huesnan 4:17-21.

E ora ei Jael a sali pa bai contra Barak y a bis’e: “Bin, y lo mi mustra bo e homber cu bo ta busca.” E relato ta sigui bisa: “Y el a drenta bai paden cu ne, y mira, Sisara tawata drumi morto cu e staca di tent den su sinti.” E experencia ei sigur a fortalece Barak su fe masha hopi! Pasobra mas prome Debora a bis’e: “E honor di e biahe cu bo ta bai haci lo no ta pa bo, pasobra SEÑOR lo bende Sisara cu un mohe.”—Huesnan 4:9, 22.

Loke Jael a haci tawata un acto di traicion? Yehova no a consider’e asina. E cantica di victoria di Barak cu Debora a yama Jael “esun di mas bendiciona di e mohenan cu ta biba den tent.” E cantica ei ta yuda nos haya e punto di bista corecto di Sisara su morto. E cantica ta describi con Sisara su mama ta warda ansiosamente pa e regresa for di e bataya. E mama ta puntra: “Dicon su garoshi ta tarda pa bin?” Anto e mama “su princesnan di mas sabi” ta purba trankilis’e door di bisa cu sigur Sisara lo ta ocupa ta parti e botin di bataya: pañanan bunita borda y hende mohe pa e hombernan. E damanan aki ta puntra: “Ta parti nan no ta parti e botin? Un mucha mohe, dos mucha mohe pa cada guerero; pa Sisara un botin di paña di diferente colo, un botin di paña borda, . . . paña di colo, borda na tur dos banda, pa garganta di e sakeado?”—Huesnan 5:24, 28-30.

Les pa Nos

E relato di Barak ta siña nos un les importante. Ken cu bandona Yehova lo hay’e cu problema y frustracion. Esnan cu repenti y bolbe bek na Dios y eherce fe den dje lo por wordo libra di varios tipo di opresion. Anto nos tambe no mester cultiva e spirito di obediencia? Asta ora Dios su rekisitonan ta parce di bai contra rasonamento humano, nos por tin e confiansa cu su instruccionnan semper ta pa nos bienestar eterno. (Isaias 48:17, 18) Ta solamente door di eherce fe den Yehova y obedece instruccion dibino, Barak a logra “pone ehersitonan stranhero hui.”—Hebreonan 11:32-34.

E conclusion conmovedor di e cantica di Debora cu Barak ta: “Laga tur bo enemigonan perece, o SEÑOR; ma laga esnan cu ta stima [Yehova] ta manera solo cu ta sali den tur su forsa.” (Huesnan 5:31) Definitivamente esaki lo resulta di ta asina ora cu Yehova trece un fin na e mundo malbado di Satanas!

[Plachi na pagina 29]

Yehova a uza Debora pa manda yama Barak

[Plachi na pagina 31]

Riu Kison ta desborda

[Reconocemento]

Pictorial Archive (Near Eastern History) Est.

[Plachi na pagina 31]

Sero Tabor