Martin Luther—E Homber y Su Herencia

“NAN ta bisa cu mas buki a ser skirbi tocante [Martin Luther] cu cualkier otro persona den historia, fuera di bukinan skirbi tocante su doño, Hesucristo.” Asina e revista Time a bisa. Luther su palabra- y accionnan a yuda cu nacemento di Reformacion—un movemento religioso describi como “e cambio radical di mas importante den historia di humanidad.” Asina el a yuda cambia e ambiente religioso di Europa y termina e Edad Medio na e continente ei. Tambe Luther a pone e base pa standarisa e idioma Aleman skirbi. Su traduccion di Bijbel sin duda a keda esun di mas popular den idioma Aleman.

Ki tipo di hende Martin Luther tawata? Con bin el a logra causa un impacto asina grandi riba asuntonan Europeo?

Luther Ta Bira Experto di Bijbel

Martin Luther a nace na Eisleben, Alemania, na november 1483. Maske su tata tawata traha den mina di coper, toch el a logra gana suficiente pa percura un bon educacion pa Martin. Na 1501, Martin a bai studia na e Universidad di Erfurt. Ei den e biblioteca el a lesa Bijbel pa prome bes. “Mi a gusta e buki masha tanto mes”, el a bisa, “y mi a desea di por ta digno di por tin un buki asina un dia.”

Na edad di 22 aña, Luther a drenta e monasterio di Agustin na Erfurt. Despues el a bai e Universidad di Wittenberg, caminda el a haya su doctorado den teologia. Luther no a considera su mes digno di haya Dios su fabor y tin biaha e tawata bira hopi deprimi pa motibo di remordimento di consenshi. Pero studio di Bijbel, oracion y meditacion a yud’e haya un miho comprondemento di e manera cu Dios ta mira pecado. Luther a compronde cu bo no por cumpra e fabor di Dios. Mas bien, esnan cu eherce fe ta haya su fabor mediante su gracia of bondad inmereci.—Romanonan 1:16; 3:23, 24, 28.

Con Luther a yega na e conclusion cu su comprondemento nobo tawata corecto? Kurt Aland, profesor di historia antiguo di iglesia y investigacion textual di Testament Nobo, a skirbi: “El a medita riba henter Bijbel pa asina determina si e conocemento nobo aki ta keda valido si compar’e cu otro declaracionnan biblico, y tur caminda el a haya confirmacion cu e no ta contradeci su mes.” E doctrina di hustificacion, esta, di salbacion mediante fe y no mediante obra of penitencia, a keda e pilar principal di e siñansa di Luther.

 Indigna Tocante Indulgencia

Luther su comprondemento di e manera cu Dios ta mira pecado a pon’e na conflicto cu Iglesia Catolico Romano. E tempo ei mayoria hende tawata kere cu despues di morto, pecadonan ta haya castigo pa un periodo di tempo. Sinembargo, aparentemente e periodo aki por bira mas cortico mediante indulgencia papal (un carta cu hende ta haya di papa pa pordon di nan picanan) a cambio di placa. Bendedonan di indulgencia manera Johann Tetzel, kende a sirbi como representante di Arsobispo Albert di Mainz, tawatin un negoshi lucrativo bendiendo indulgencia na hende comun. Hopi hende a considera indulgencia manera un sorto di seguro contra picanan den futuro.

Luther tawata sintie indigna tocante bendemento di indulgencia. E tawata sa cu hende no por negosha cu Dios. Den herfst di aña 1517, el a skirbi su 95 tesisnan famoso acusando iglesia di a comete corupcion financiero, engaño doctrinal y engaño religioso. Luther kier a anima reforma, no rebelion. Ta pesei el a manda copia di e tesisnan aki pa Arsobispo Albert di Mainz y pa varios experto di Bijbel. Hopi historiado ta bisa cu Reformacion a nace mas o menos na aña 1517.

Luther no tawata e unico cu a lamenta e malechonan di iglesia. Shen aña prome, e reformador religioso Checo Jan Hus a condena benta di indulgencia. Anto prome cu Hus, John Wycliffe di Inglatera a indica cu algun di e tradicionnan di iglesia no tawata biblico. Luther su contemporaneonan Erasmus di Rotterdam y Tyndale di Inglatera a boga pa reforma. Pero danki na Johannes Gutenberg su invento di mashin di imprenta cu letter ahustabel na Alemania, Luther su mensahe tawatin un impacto mas fuerte y a bai mas leu cu di otro reformador.

Gutenberg su imprenta na Mainz a cuminsa traha na 1455. Na comienso di siglo 16, tawatin mashin di imprenta na 60 pueblo Aleman y 12 otro pais Europeo. Pa prome bes den historia, publico por a haya informacion lihe tocante cosnan cu ta interesa nan. Kisas nan a imprimi y distribui e 95 tesisnan sin aprobacion di Luther. E cuestion di reforma iglesia no tawata djis un asunto local mas. Rond mundo e asunto aki a bira un controversia, y diripiente Martin Luther a bira e homber mas famoso na Alemania.

“Luna cu Solo” Ta Reacciona

Pa siglonan, Europa tawata den man di dos organisacion poderoso: Imperio Romano Santo y Iglesia Catolico Romano. Hanns Lilje, un expresidente di e Federacion Mundial Luterano, a splica: “Emperado y papa a traha hunto manera luna cu solo.” Sinembargo, tawatin un confusion tocante ken ta solo y ken ta luna. Na principio di siglo 16, tur dos organisacion a pasa limite di nan poder. Cambio tawata na caminda.

Papa Leo X a reacciona riba e 95 tesisnan door di menasa Luther cu excomunion (expulsion), a menos cu Luther hala atras. Luther a nenga di obedece, y publicamente el a kima e carta di papa cu a contene e menasa. Tambe el a publica obranan adicional cu a anima principado (teritorio cu ta cai bou di prins) pa  reforma iglesia sin papa su consentimento. Na 1521, Papa Leo X a excomunica Luther. Ora Luther a reclama cu nan a conden’e sin dun’e un caso imparcial, Emperado Carlos V a manda e reformador pa aparece dilanti di congreso imperial na Worms. Luther su biahe di 15 dia di Wittenberg pa Worms na april 1521 tawata manera un procesion di triunfo. Publico tawata na su banda, y hende di tur parti kier a mir’e.

Na Worms, Luther a para dilanti di e emperado, prinsnan y e nuncio papal. Jan Hus tambe a enfrenta un huicio asina na Constansa na aña 1415 y nan a kim’e na staca. Atencion di e iglesia y e imperio tawata riba Luther. El a nenga di hala atras a menos cu su opositornan proba for di Bijbel cu e ta robes. Pero ningun hende tawata conoce Bijbel mes bon cu Luther. E documento cu yama e Decreto di Worms a contene e resultado di e huicio. El a declara Luther fugitivo di lei y a prohibi su publicacionnan. Awor cu papa a expuls’e y emperado a declar’e fugitivo di lei, su bida tawata den peliger.

Despues cos a cambia den un forma dramatico, y na un manera inespera. Riba su biahe di regreso pa Wittenberg, Luther a bira victima di un supuesto secuestro cu un homber generoso cu yama Frederick di Saksen a plania. Esaki a pone cu su enemigonan no por a logra hay’e. Nan a hiba Luther den secreto na e kasteel aleha Wartburg, caminda el a laga su barba crece. Tambe el a cambia su identidad pa cabayero Junker Jörg.

Gran Demanda pa Testament Nobo di September

Pa e siguiente dies lunanan, Luther a biba na e kasteel di Wartburg como fugitivo pa asina emperado y papa no hay’e. E buki Welterbe Wartburg ta splica cu “e tempo cu el a pasa na Wartburg tawata un di e temporadanan di mas productivo y creativo di su bida.” Einan el a completa un di su logronan di mas grandi, esta, e traduccion di Erasmus su texto di e Scritura Griego na Aleman. El a wordo publica na september di aña 1522 y e no a identifica Luther como e traductor. E obra aki tawata conoci como e Testament Nobo di September. E tawata costa fl. 1,50; ekivalente na loke un cria tawata gana den un aña. No obstante, e demanda pa e Testament Nobo di september tawata masha grandi. Den 12 luna, a imprimi 6.000 ehemplar den 2 edicion, y por lo menos 69 edicion lo mester a wordo imprimi durante e siguiente 12 añanan.

Na 1525, Martin Luther a casa cu Katharina von Bora, cu antes tawata soeur. Katharina por a atende asuntonan di cas masha bon mes y tawata por a trata tambe cu e demandanan cu e generosidad di su esposo a crea. Luther su hogar a consisti no solamente di un esposa y seis yiu, sino tambe di amigo-, erudito- y refugiadonan. Mas despues den bida, como consehero, Luther tawatin hopi influencia riba e eruditonan cu a keda na su cas. Pesei e huespetnan aki a skirbi su observacionnan. E anotacionnan aki a wordo poni hunto den un coleccion titula Luthers Tischreden (Combersacionnan Informal di Luther). Pa un tempo,  ta Bijbel so a surpasa circulacion di e coleccion aki na Alemania.

Traductor Talentoso y Escritor Productivo

Pa 1534, Luther a termina su traduccion di e Scritura Hebreo. E tawatin e habilidad pa combina estilo, sabor literario y vocabulario. E resultado tawata cu hende comun por a compronde Bijbel. Comentando riba su metodo di traduci, Luther a skirbi: “Nos tin cu combersa cu mamanan den nan cas, muchanan riba caya y homber comun y coriente na plasa, anto observa nan boca pa wak con nan ta papia y despues traduci na harmonia cu esei.” E Bijbel di Luther a yuda pone e base pa standarisa idioma skirbi cu despues a wordo acepta rond Alemania.

Luther por a combina su talento como traductor, cu su habilidad como escritor hopi bon. Nan ta bisa cu el a skirbi un tratado cada dos siman atrabes di henter su bida. Algun di e informacionnan aki a refleha e mesun spirito pleitista cu nan autor. E estilo di su skirbimentonan mas prome tawata sarcastico, y su estilo di skirbi no a cambia ora el a bira bieu. Loke el a skirbi mas despues a bira hopi fuerte. Segun Lexikon für Theologie und Kirche, Luther su obranan ta revela e “rabia cu e tawatin”, su “falta di humildad y amor”, y tambe “un sintimento fuerte pa cumpli cu su mision.”

Ora cu e Guera di Campesino a dal aden y a mata hopi principado, nan a puntra Luther kico e ta pensa di e lantamento. E campesinonan tawatin motibo valido pa keha contra nan señornan feodal? Luther no a busca manera pa keda cu su popularidad door di duna un contesta cu lo a agrada e mayoria. El a kere cu sirbidonan di Dios mester obedece esnan na poder. (Romanonan 13:1) Luther a duna nan su opinion franco, y a bisa cu mester para e lantamento uzando violencia. “Laga tur cu por, hinca, dal y mata”, el a bisa. Hanns Lilje a remarca cu e contesta aki a costa Luther “su popularidad unico cu e tawatin te na e momento ei cerca e pueblo.” Ademas, loke Luther a skirbi mas despues tocante hudiu cu a nenga di comberti na cristianismo, specialmente esun titula On the Jews and Their Lies [Tocante Hudiu y Nan Mentiranan], a pone hopi hende clasifica Luther como antisemita.

E Herencia di Luther

E Reformacion, cu hombernan manera Luther, Calvijn y Zwingli a cuminsa, a hiba na e formacion di protestantismo, cu tawata un manera nobo di mira e religion aki. E herencia mas grandi cu Luther a laga atras pa protestantismo tawata su siñansa central di hustificacion pa medio di fe. Cada un di e principadonan Aleman a apoya sea e fe protestant of e fe catolico. Protestantismo a plama, bira popular y a haya apoyo na Scandinavia, Suisa, Inglatera y Hulanda. Awe e tin miyones y miyones di siguido.

Tin hopi hende cu no ta di acuerdo cu tur e siñansanan di Luther, pero cu toch  ta apreci’e masha. Na aña 1983 e ex Republica Democratico Aleman, cu a inclui Eisleben, Erfurt, Wittenberg y Wartburg denter di su fronteranan, a celebra e di 500 aniversario di Luther su nacemento. E Estado Socialista aki a reconoc’e como un figura sobresaliente den historia y cultura Aleman. Ademas, un teologo catolico di decadanan ’80 a resumi e impacto cu Luther a causa y a remarca: “Niun hende cu a bin despues di Luther lo no por ser compara cu ne.” Profesor Aland a skirbi: “Tur aña tin por lo menos 500 publicacion nobo tocante Martin Luther y e Reformacion—y nan ta wordo publica den casi tur idioma principal di mundo.”

Martin Luther tawatin un excelente memoria, e tawata hopi inteligente, e por a domina e idioma hopi bon y tawata un trahado diligente. Ademas e no tawatin masha pasenshi, e tawata fresco, y e tawata reacciona di un manera agresivo riba loke el a considera hipocresia. Ora e tawata muriendo na Eisleben na februari 1546, su amigonan a puntr’e si el a keda tene firme na e creencianan cu el a siña otro hende. Su contesta tawata: “Si.” Luther a muri, pero hopi hende ainda ta pega na e creencianan ei.

[Plachi na pagina 27]

Luther a opone benta di indulgencia

[Reconocemento]

Mit freundlicher Genehmigung: Wartburg-Stiftung

[Plachi na pagina 28]

Luther a nenga di hala atras a menos cu su opositornan proba for di Bijbel cu e tawata robes

[Reconocemento]

Di e buki The Story of Liberty, 1878

[Plachinan na pagina 29]

Luther su camber na kasteel di Wartburg, caminda el a traduci Bijbel

[Reconocemento]

Ambos potret: Mit freundlicher Genehmigung: Wartburg-Stiftung

[Reconocemento pa Potret na pagina 26]

Di e buki Martin Luther The Reformer, di Tres Edicion, publica pa Toronto Willard Tract Depository, Toronto, Ontario

[Reconocimento pa Potret na pagina 30]

Di e buki The History of Protestantism (Vol. I)