Sirbidonan di Yehova Tin un Berdadero Speransa

“E restante di Yacob lo ta meimei di hopi pueblo, manera serena for di SEÑOR . . . cu no ta warda riba hende.”—MIKEAS 5:7.

1. Den ki sentido Israel spiritual ta un fuente di refrescamento?

YEHOVA ta e gran Creador di awasero y serena. No tin sentido pa warda riba hende pa haya sea serena of awasero. Profeta Mikeas a skirbi: “E restante di Yacob lo ta meimei di hopi pueblo, manera serena for di SEÑOR, manera yobidanan di awa riba vegetacion cu no ta warda riba hende, ni ta tarda pa e yiunan di hende.” (Mikeas 5:7) Ken ta e “restante di Yacob” djawe? Eseinan ta Israelitanan spiritual, e resto di “e Israel di Dios.” (Galationan 6:16) Pa “hopi pueblo” riba tera, nan ta manera “serena [refrescante] for di Señor” y “yobidanan di awa riba vegetacion.” Si, cristiannan ungi djawe ta un bendicion di Dios riba hende. Como proclamadonan di Reino, Yehova ta uza nan pa duna hende su mensahe di berdadero speransa.

2. Pakico nos tin berdadero speransa apesar cu nos ta biba den e mundo turbulento aki?

2 No ta nada straño cu no tin berdadero speransa den e mundo aki. Instabilidad politico, decadencia moral, crimen, crisis economico, terorismo y guera ta cosnan cu ta caracterisa e mundo domina pa Satanas e Diabel. (1 Huan 5:19) Hopi hende tin miedo di loke lo por sosode den futuro. Pero como adoradonan di Yehova, nos si no tin miedo pasobra nos tin un speransa sigur pa futuro. E ta un berdadero speransa pasobra e ta basa riba e Palabra di Dios. Nos tin fe den Yehova y den su Palabra pasobra semper e ta cumpli cu loke e ta bisa.

3. (a) Pakico Yehova tawata bai tuma accion contra Israel y Huda? (b) Pakico e palabranan di Mikeas ta conta pa nos tambe?

3 E profecia di Mikeas inspira pa Dios ta fortalece nos pa cana den nomber di Yehova, y tambe e ta duna nos un base pa carga berdadero speransa. Den siglo 8 prome cu nos era, tempo cu Mikeas a profetisa, e pueblo cu tawatin un pacto cu Dios tawata parti den dos nacion, Israel y Huda, y tur dos tawata ignora e pacto di Dios. Esei a resulta den un decadencia moral, apostasia religioso y materialismo extremo. Pesei Yehova a spierta nan cu lo e tuma accion contra nan. Claro cu e spiertamentonan di Dios tawata dirigi na e hendenan cu a biba den tempo di Mikeas. Pero e situacion den nos tempo ta masha paresido na esun di e tempo ei, pesei su palabranan ta conta pa nos tambe. Esaki lo bira bisto segun cu nos ta considera algun punto sobresaliente di e shete capitulonan di e buki di Mikeas.

 Un Resumen di e Buki di Mikeas

4. Ki informacion Mikeas capitulo 1 pa 3 ta duna?

4 Laga nos analisa e contenido di Mikeas brevemente. Na capitulo 1, Yehova ta saca na cla e rebeldia di Israel y Huda. Como resultado di nan mal comportacion, Israel lo ser destrui y e castigo di Huda lo yega te na entrada di Herusalem. Capitulo 2 ta revela cu hende rico y poderoso ta abusa di esnan suak y indefenso. Pero tambe e capitulo ta menciona un promesa di Dios. Dios lo trece su pueblo hunto den unidad. Capitulo 3 ta informa di Yehova su declaracionnan di huicio contra e lidernan nacional y e profetanan corupto. E lidernan ta troce husticia y e profetanan ta gaña. Apesar di esaki, spirito santo ta duna Mikeas poder pa e proclama Yehova su huicio cu ta na caminda.

5. Kico ta e esencia di Mikeas capitulo 4 y 5?

5 Capitulo 4 ta profetisa cu den e ultimo dianan, tur nacion lo bin na e sero eleva di e cas di Yehova pa e instrui nan. Pero prome cu esei, Huda lo ser hiba preso na Babilonia. Sinembargo, Yehova lo libr’e. Capitulo 5 ta revela cu e Mesias lo nace na Betlehem di Huda. Lo e pastorea su pueblo y libra nan for di e nacionnan cu ta oprimi nan.

6, 7. Ki puntonan e profecia di Mikeas capitulo 6 y 7 ta trece dilanti?

6 Mikeas capitulo 6 ta presenta Yehova su acusacionnan como si fuera ta un caso e ta lanta contra su pueblo den corte. Ta kico Yehova a haci cu a pone su pueblo bira rebelde asina? Nada. Loke e ta pidi di nan mas bien ta masha rasonabel. E kier pa hende cu ta ador’e eherce husticia, stima bondad y sea modesto segun cu nan ta cana cu ne. Pero en bes di esei, Israel y Huda a actua di un manera rebelde, y nan lo tin cu sufri e consecuencianan.

7 Den e ultimo capitulo, Mikeas ta lamenta con malbado e hendenan di su tempo ta. Sinembargo, e no ta descurasha. E ta keda determina pa “spera” riba Yehova. (Mikeas 7:7) Mikeas ta termina e buki expresando confiansa cu Yehova lo tene misericordia di Su pueblo. Historia ta testigo di e echo cu e speransa aki a bira realidad. Na aña 537 prome cu nos era, Yehova a mustra misericordia na su pueblo  ora nan periodo di disiplina a caba door di laga un resto regresa nan pais.

8. Con lo bo resumi e contenido di e buki di Mikeas?

8 E informacion cu Yehova ta revela pa medio di Mikeas ta hopi bon! E buki inspira aki ta duna ehempelnan cu ta spierta nos con Dios ta trata cu esnan cu ta pretende di ta sirbie, y cu sinembargo ta infiel. E ta predeci susesonan cu ta tumando luga awendia. Ademas, e ta duna conseho dibino tocante con nos mester comporta nos den e temponan dificil aki, pa nos speransa por bira sigur.

Señor Soberano Yehova Ta Papia

9. Segun Mikeas 1:2, kico Yehova tawata bai haci?

9 Awor, laga nos examina e buki di Mikeas mas en detaye. Na Mikeas 1:2 nos ta lesa: “Tende, o pueblonan, boso tur; scucha, o tera y tur loke cu e ta contene, y laga Señor Dios ta testigo contra boso, Señor for di su tempel santo.” Si abo a biba den tempo di Mikeas, no tin duda cu e palabranan ei lo a hala bo atencion. Si, nan ta hala nos atencion awe debi cu Yehova ta papia for di su tempel santo, y no ta na Israel y Huda so e ta dirigi su mes, sino na tur hende. Den e dianan di Mikeas, pa hopi tempo caba e pueblo ta ignora Señor Soberano Yehova. Pronto esaki lo cambia. Yehova tawata determina pa tuma medida drastico.

10. Pakico e palabranan di Mikeas 1:2 ta importante pa nos?

10 Mescos ta conta pa nos tempo. Revelacion 14:18-20 ta mustra cu, un biaha mas, Yehova ta comunica cu hende for di su tempel santo. Pronto Yehova lo tuma medida drastico, anto lo tin susesonan importante cu lo sagudi humanidad. E biaha aki lo e tira ‘e mata di wendruif di henter e tera’ den e gran baki di pers wendruif di e furia di Yehova, y asina destrui e sistema di cosnan di Satanas por completo.

11. Kico e palabranan di Mikeas 1:3 y 4 ta nifica?

11 Scucha kico Yehova ta bai haci. Mikeas 1:3 y 4 ta bisa: “Mira, SEÑOR ta sali for di su luga. E lo baha bini y trapa riba e luganan halto di tera. E seronan lo dirti bou di dje, y e vayenan lo wordo gesplijt, manera was dilanti di candela, manera awa basha for di un luga steil.” Yehova ta bai sali for di su luga di biba den shelo y literalmente trapa e seronan y e vayenan di e Tera Priminti? No. Esei no ta necesario. Tur loke e tin cu haci ta dirigi su atencion na tera, y su boluntad lo cumpli. Ademas, no ta e paisahe literal, sino ta e habitantenan, ta bai pasa den e cosnan cu e profecia ta describi. Ora Yehova actua, e consecuencia lo ta desastroso pa hende infiel. Lo ta como si fuera e seronan ta dirti manera was of bela, y un temblor ta parti e vayenan na dos.

12, 13. Na harmonia cu 2 Pedro 3:10-12, kico ta haci nos speransa sigur?

12 Kisas e palabranan profetico di Mikeas 1:3 y 4 ta pone bo pensa riba un otro profecia inspira cu ta papia di desasternan grandi cu lo bai tuma luga riba tera. Na 2 Pedro 3:10, apostel Pedro a skirbi: “E dia di Señor lo bini manera un ladron, den cual e shelonan lo pasa bai cu un boroto inmenso, y e elementonan lo wordo destrui cu un calor intenso, y e tera y su obranan lo wordo kima completamente.” Mescos cu e profecia di Mikeas, Pedro su palabranan tampoco no ta papia di shelo y tera literal. Loke nan ta referi na dje ta e gran tribulacion cu ta bin riba e mundo sin Dios aki.

13 Apesar cu e desaster ei ta na caminda, cristiannan por mira futuro cu confiansa, mescos cu Mikeas a haci. Con? Door di sigui e conseho cu tin para den e siguiente versiculonan di e carta di Pedro: “Ki sorto di hende boso mester ta den un conducta santo y deboto, sperando y purando e binida di e dia di Dios.” (2 Pedro 3:11, 12) Nos speransa pa futuro lo ta sigur si nos cultiva un curason obediente, anto haci sigur cu nos conducta ta santo y cu nos ta hiba un bida deboto na Dios. Ademas, nunca nos no mester lubida cu e dia di Yehova ta bin sigur.

14. Pakico Israel y Huda a merece castigo?

 14 Yehova ta splica dicon su pueblo di antiguedad merece castigo. Mikeas 1:5 ta declara: “Tur esaki ta pa motibo di e rebeldia di Yacob y pa motibo di e picanan di e cas di Israel. Kico ta e rebeldia di Yacob? No ta Samaria? Kico ta e luga halto di Huda? No ta Herusalem?” Ta Yehova ta permiti Israel y Huda existi. Pero toch nan a rebela contra dje, y nan rebeldia ta yega te na nan capital, esta, Samaria y Herusalem.

Maldad A Reina Tur Caminda

15, 16. E hendenan cu a biba den tempo di Mikeas a haci nan mes culpabel di kico?

15 Mikeas 2:1 y 2 ta duna un descripcion bibo di e maldad di e hendenan cu a biba den tempo di Mikeas: “Ai di esnan cu ta plania inikidad, cu ta pensa maldad riba nan cama! Ora bira mainta nan ta ehecuta esaki, pasobra ta den poder di nan man pa haci esaki. Nan ta cudisha cunucunan y despues ta gara nan, y casnan, y ta cohe nan. Nan ta horta un homber y su cas, un homber y su herencia.”

16 Hende haragan pa cos ta keda henter anochi lanta ta traha plan pa kita cas y cunucu for di nan biciña. Ora bira mainta nan ta core bai haci loke nan a plania. Si nan a corda Yehova su pacto, nan lo no a comete e malechonan ei. E Lei di Moises ta contene reglanan pa proteha hende pober. Bou di e Lei ei, ningun famia no tin mag di perde nan propiedad hereda pa semper. Pero e haragannan ei no ta precupa cu esei. Nan ta ignora e palabranan di Levitico 19:18, cu ta bisa: “Stima bo prohimo manera bo mes.”

17. Kico por sosode ora hende cu ta bisa cu nan ta sirbi Dios ta pone cos material na prome luga den nan bida?

17 E ehempel aki ta mustra kico por pasa ora hende cu ta bisa cu nan ta sirbi Dios ta perde metanan spiritual for di bista, anto ta cuminsa busca cos material na prome luga. Pablo a spierta e cristiannan di su tempo, bisando: “Esnan cu kier bira rico ta cai den tentacion y den trampa y den hopi deseonan loco y dañino, cuanan ta hundi hende den ruina y destruccion.” (1 Timoteo 6:9) Ora un hende haci ganamento di placa su meta principal den bida, den un sentido e ta adorando un dios falso, esta, rikesa. E dios falso ei no ta dun’e ningun speransa sigur pa futuro.—Mateo 6:24.

18. Kico lo a bai pasa cu hende materialista den tempo di Mikeas?

18 Mal experencia a siña hopi hende den tempo di Mikeas cu ta un banidad pa confia den cos material. Segun Mikeas 2:4, Yehova ta bisa: “Riba e dia ei nan lo traha un proverbio contra boso y lamenta cu un lamentacion amargo y bisa: ‘Nos ta completamente destrui! E ta cambia e herencia di mi pueblo; mira con e ta kit’e for di mi! Entre e traidonan e ta parti nos cunucunan.’” Si, e ladronnan di cas y cunucu ei ta bai perde nan propio herencia di famia. Nan lo ser deporta pa un otro pais, y nan pocesionnan lo bira botin pa “e traidonan”, esta, hende di otro nacion. Tur nan speransa pa un futuro prospero lo caba na nada.

19, 20. Kico a sosode cu e Hudiunan cu a confia den Yehova?

19 Sinembargo, esnan cu confia den Yehova si lo no keda desapunta. Yehova ta fiel na e pactonan cu el a sera cu Abraham y David, y e ta tene misericordia di hende manera Mikeas, cu ta stim’e y cu ta sinti duele pa e manera cu nan paisanonan a aleha for di Dios. Door cu Dios tin hende asina na mente, lo e trece un restauracion na su debido tempo.

20 Esei ta sosode na aña 537 prome cu nos era, ora cu un resto di Hudiu bolbe nan patria despues di e caida di Babilonia. Na e tempo ei e palabranan di Mikeas 2:12 ta cumpli pa prome bes. Yehova ta bisa: “Siguramente lo mi reuni tur di boso, o Yacob, siguramente lo mi recohe e restante di Israel. Lo mi trece nan hunto manera carne den cura; manera un tou  meimei di su luga di yerba berde. E luga lo ta yen di boroto pa motibo di tanto hende.” Esta amoroso Yehova ta! Despues cu e disiplina su pueblo, e ta laga un resto di nan bolbe pa nan sirbie den e tera cu el a duna nan antepasadonan.

Paralelonan Remarcabel den Nos Tempo

21. Con e situacion djawe ta na comparacion cu esun den tempo di Mikeas?

21 Segun cu nos a considera e prome dos capitulonan di Mikeas, bo a realisa con paresido e situacion djawe ta? Mescos cu den tempo di Mikeas, hopi hende djawe ta pretende cu nan ta sirbi Dios. Pero mescos cu Huda y Israel, nan ta dividi, y asta nan a bringa contra otro den guera. Hopi hende rico den cristiandad a oprimi hende pober. Cu mas y mas frecuencia, lidernan religioso ta tolera practicanan cu Bijbel ta condena spesificamente. Nada straño cu pronto cristiandad lo yega na su fin, hunto cu tur sobra parti di ‘Babilonia e grandi’, e imperio mundial di religion falso! (Revelacion 18:1-5) Sinembargo, mescos cu den tempo di Mikeas, awe tambe Yehova tin un resto di sirbido fiel riba tera.

22. Cua dos grupo a pone nan speransa den e Reino di Dios?

22 Na 1919, fiel cristiannan ungi a aparta nan mes totalmente for di cristiandad y a cuminsa proclama e bon nobo di e Reino na tur nacion. (Mateo 24:14) Na prome instante nan a busca esnan cu a resta di Israel spiritual. Despues, “otro carnenan” a join nan, y e dos gruponan a bira “un tou cu un wardado.” (Huan 10:16) Maske awendia e adoradonan fiel aki ta sirbi Dios den 234 pais, Yehova a ‘trece nan tur hunto’ den un berdadero unidad. Y awor ya caba e cura di carne ta “yen di boroto pa motibo di tanto hende”, homber, mohe y mucha. Nan speransa no ta den e mundo aki, sino den e Reino di Dios cu pronto ta bai haci e tera aki un paradijs.

23. Pakico bo ta combenci cu bo speransa ta sigur?

23 Relaciona cu e adoradonan fiel di Yehova, e ultimo versiculo di Mikeas capitulo 2 ta bisa: “Nan rei ta pasa bai nan dilanti, y SEÑOR na cabes.” Abo ta mira bo mes den e marcha triunfal ei, siguiendo tras di bo Rei Hesucristo, y cu Yehova mes na cabes? Si ta asina, bo por tin e conviccion cu bo ta riba caminda pa victoria y cu bo speransa ta sigur. Esaki lo bira mas cla ainda segun cu nos ta analisa mas punto sobresaliente di e profecia di Mikeas.

Con Lo Bo Contesta?

• Den e tempo di Mikeas, pakico Yehova a dicidi di tuma medida contra Huda y Israel?

• Kico por sosode cu esnan cu ta bisa cu nan ta sirbi Dios pero ta pone interes material na prome luga den bida?

• Despues cu bo a analisa Mikeas capitulo 1 y 2, pakico bo ta combenci cu bo speransa ta sigur?

[Preguntanan di Estudio]

[Plachi na página 9]

E profecia di Mikeas por fortalece nos spiritualmente

[Plachi na página 10]

Mescos cu e resto Hudiu na 537 prome cu nos era, e Israelitanan spiritual y nan compañeronan ta promove adoracion berdadero