“Dos Hende A Bati na Porta”

“YA TA dos aña caba cu nos a pasa den e gran tristesa di a perde nos yiu mohe chikito.” Asina un carta habri den e corant Le Progrès, publica na Saint-Étienne, Francia, ta bisa.

“Mélissa tawatin tres luna di edad y a sufri di un abnormalidad mental grave cu yama trisomy 18. Hamas bo ta recupera completamente di un tragedia asina, cu ta parce demasiado inhusto. Aunke nos a lanta den religion catolico, nos ta puntra nos mes constantemente: ‘Mi Dios, si bo ta existi, pakico bo ta laga cosnan asina pasa?’” Ta bisto anto cu e mama cu a skirbi e carta ei a sinti su mes angustia y impotente. Su carta ta sigui:

“Un poco despues di loke a pasa, dos hende a bati na porta. Mi a reconoce nan mesora como Testigo di Yehova. Mi tawata cla pa core cu nan na un manera fini ora cu mi a tuma nota di un foyeto cu nan tawata ofreciendo, tocante pakico Dios ta permiti sufrimento. E ora ei mi a dicidi di laga nan drenta cu e intencion di proba nan cu nan ta robes. Mi a pensa cu ora ta trata di sufrimento, mi famia si a pasa den bastante y cu ya nos a tende suficiente palabra di consuelo sin sentido manera ‘Dios ta duna, Dios ta tuma.’ E Testigonan a keda mas cu un ora. Nan a scucha mi cu hopi compasion, y ora nan tawata bayendo, mi a sinti mi hopi mas miho te cu mi a bai di acuerdo pa nan bolbe bishita mi. Esei tawata dos aña pasa. Mi no a bira Testigo di Yehova, pero mi a cuminsa studia Bijbel cu nan, y ki ora cu mi por, mi ta bai nan reunionnan.”