Storia di Bida

Gosonan Incomparabel!

SEGUN E RELATO DI REGINALD WALLWORK

“No tin nada na mundo cu por para banda di e goso cu nos tawatin den nos sirbishi di tempo completo na Yehova como misionero!” Mi a haya e nota skirbi na man aki entre e papelnan di mi esposa djis despues di su morto na mei 1994.

SEGUN cu mi a reflexiona riba e palabranan di Irene, mi a corda e 37 añanan felis y satisfecho cu nos a sirbi como misionero na Peru. For di dia nos a casa na december 1942 nos a bira a la bes dushi partner cristian pa otro, y esei ta un bon caminda pa cuminsa mi relato.

Irene a ser cria como Testigo di Yehova na Liverpool, Inglatera. Nan tawata tres ruman mohe, y el a perde su tata durante Prome Guera Mundial. Despues su mama a casa cu Winton Fraser, y nan a haya un yiu homber, Sidney. Djis prome cu Segundo Guera Mundial, e famia a muda pa Bangor, North Wales, caminda Irene a batisa na 1939. Sidney a batisa un aña prome, pesei e cu Irene a sirbi hunto como pionero—predicado di tempo completo—a lo largo di e costa nort di Wales, for di Bangor te na Caernarvon, incluyendo e isla di Anglesey.

E tempo ei mi tawata den Congregacion Runcorn, un 20 kilometer suitost di Liverpool, sirbiendo como loke nos ta yama awe superintendente presidente. Irene a acerca mi na un asamblea di sircuito pa puntra mi si e por a haya un teritorio pa e predica, como cu el a bin keda un par di dia serca Vera, su ruman mohe casa cu tawata biba na Runcorn. Ami cu Irene a bai bon cu otro durante e dos simannan cu e tawata serca nos, y despues mi a bishit’e na Bangor na varios ocasion. Esta felis mi tawata e weekend cu Irene a acepta mi proposicion pa matrimonio!

Manera cu mi a bai cas bek diadomingo, mi a cuminsa plania pa nos casamento, pero pa su  diamars mi a haya un telegram. E tawata bisa: “Ta duel mi cu e telegram aki ta bai causa bo dolor. Mi ta para nos casamento. Carta ta na caminda.” Mi a keda geshock. Ta kico lo por a pasa?

E siguiente dia mi a haya Irene su carta. El a bisa mi cu e ta bai Horsforth na Yorkshire pa traha pionero cu Hilda Padgett. * El a splica cu 12 luna mas prome el a bai di acuerdo pa sirbi caminda tin mas necesidad si nan pidie pa haci esei. Irene a skirbi: “Pa mi, esei tawata manera un voto na Yehova, y mi ta sinti cu como mi a primintie prome cu mi a conoce bo, mi tin cu cumpli cu ne.” Aunke mi tawata tristo, mi a admir’e masha pa su integridad y mi a manda un telegram p’e como contesta: “Bai numa. Mi ta warda bo.”

Durante Irene su estadia na Yorkshire, el a haya un sentencia di prizon di tres luna pasobra el a nenga di apoya actividadnan di guera pa motibo di su principionan. Pero 18 luna despues, na december 1942, nos a casa.

Mi Hubentud

Na 1919 mi mama a cumpra un set di Studio di e Scritura. * Maske, manera mi tata a remarca corectamente, mi mama nunca prome no a lesa un buki, e tawata dicidido pa studia e bukinan aki cuidadosamente hunto cu su Bijbel. El a hacie tambe y a batisa na 1920.

Mi tata tawata un persona di caracter trankil y e no a stroba mi mama di haci loke e tawata kier a haci, y esei a encera cria nan cuater yiunan den e caminda di e berdad. Tawata mi dos ruman mohenan, Gwen cu Ivy, mi ruman homber Alec, y ami. Stanley Rogers y otro Testigonan fiel di Liverpool tawata bini Runcorn pa duna discursonan biblico, y no a tarda hopi cu nan a forma un congregacion einan. Nos famia a prospera spiritualmente hunto cu e congregacion.

Gwen tawata hayando les pa e confirma den Iglesia Anglicano, pero el a stop asina cu el a cuminsa studia Bijbel hunto cu Mama. Ora cu domi a bin bishita nos pa wak dicon Gwen no tawata bini les mas, domi a hay’e cu un avalancha di pregunta cu e no tawata bon prepara pa contesta. Gwen a puntr’e tocante e nificacion di e Oracion Nos Tata, y al final ta Gwen mester a splic’e! Gwen a conclui citando 1 Corintionan 10:21, y a bisa bon cla cu e no por sigui ‘come na dos mesa.’ Ora cu e domi tawata bai, el a bisa cu lo e resa pa Gwen y bolbe bek pa contesta su preguntanan, pero e no a bolbe nunca mas. Poco despues di a batisa, Gwen a bira un predicado di tempo completo.

Nos congregacion tawata ehemplar den su manera di trata hobennan. Mi ta corda cu tempo mi tawatin shete aña mi a scucha un discurso di un anciano cu tawata di bishita. Despues el a bin papia cu mi y mi a cont’e cu mi a lesa tocante Abraham y con el a purba ofrece su yiu Isaak. E anciano a bisa mi: “Bai den skina di e plataforma y conta mi henter e relato.” Mi tawata masha emociona di por a para einan y duna mi prome “discurso publico”!

Mi a batisa cu 15 aña na 1931, e aña cu mi mama a muri, y mi a stop di bai scol pa mi bira un leerling electricien. Na 1936 nos tawata toca discursonan biblico graba pa publico, y un ruman mohe di edad a anima ami cu mi ruman homber pa envolve nos mes den e actividad ei. Pesei ami cu Alec a bai Liverpool pa nos cumpra un bais y laga nan traha un baki na banda di e bais pa nos transporta nos tocadisco. Parti patras di e baki nos a pega un loudspeaker na un tubo cu por a rek bira 2 meter halto. E persona cu a trah’e a bisa nos cu nunca e no a traha nada paresido, pero el a funciona bon! Nos a cubri nos teritorio cu smak, y tawata masha gradicido pa e animacion cu e ruman mohe a duna nos y pa e privilegionan cu nos a ricibi.

 Segundo Guera Mundial: Un Tempo di Prueba

Segun cu guera a cuminsa menasa na horizonte, ami cu Stanley Rogers tawata druk ta anuncia e discurso publico “Enfrenta e Echonan”, cu lo a ser duna na Royal Albert Hall di Londen dia 11 di september 1938. Mas despues mi a yuda distribui e discurso aki den forma di un foyeto chikito, hunto cu e foyeto Fasismo of Libertad, cu a ser publica e aña siguiente. Ambos foyeto a revela bon cla e ambicionnan totalitario di Alemania bou di Hitler. Pa e tempo aki ya mi tawata bon conoci na Runcorn pa mi sirbishi publico y hende tawata respeta mi pa esei. E echo cu semper mi tawata hiba delantera den actividad teocratico realmente a beneficia mi despues.

E compania cu mi tawata traha p’e a sera un contract pa pasa waya di coriente pa un fabrica nobo djis pafo di stad. Ora mi a haya sa cu esaki lo bai bira un fabrica di arma, mi a bisa nan bon cla cu lo mi no por a traha einan. Aunke mi doñonan di trabou tawata malcontento, mi forman a defende mi, y nan a duna mi un otro job. Despues mi a haya sa cu e forman tawatin un tanta cu tambe ta Testigo di Yehova.

Un colega a anima mi masha ora el a bisa mi: “Nos no a spera nada otro di bo, Reg, pasobra ta hopi aña bo tin den e trabou di Bijbel ei.” No obstante, mi mester a paga masha tino pasobra hopi di mi coleganan kier a hinca mi den problema.

E corte di Liverpool na 1940 a acepta pa mi wordo registra como un hende cu no ta bai guera pa motibo di mi principionan, bou di e condicion cu mi ta keda cu mi trabou actual. Y claro cu esaki a permiti mi sigui cu mi sirbishi cristian.

Den Sirbishi di Tempo Completo

Ora cu guera a caba, mi a dicidi di kita for di trabou pa mi join Irene den sirbishi di tempo completo. Na 1946, mi a traha un caravan di 5 meter cu a bira nos cas, y e siguiente aña nan a pidi nos muda bai Alveston, un pueblito na Gloucestershire. Despues di esei, nos a traha pionero den e stad antiguo di Cirencester y den e stad Bath. Na 1951, mi a haya e invitacion pa bishita e congregacionnan den parti suit di Wales como un superintendente biahero, pero menos cu dos aña despues, nos tawata rumbo pa e Scol Biblico di Galad di Watchtower pa ricibi entrenamento como misionero.

Nan a tene e di 21 klas di e scol na South Lansing, den nort di estado di New York, y nos a gradua na 1953 na e Asamblea Sosiedad di Mundo Nobo na New York City. Ta te riba e dia di graduacion numa ami cu Irene lo a haya sa unda  nos lo a wordo asigna. Nos a keda masha emociona ora nos a tende cu nos destinacion lo ta Peru. Dicon? Pasobra Sidney Fraser, Irene su mita ruman, cu su casa Margaret, tawatin mas cu un aña ta sirbi na e oficina di sucursal na Lima despues cu nan a gradua di e di 19 klas di Galad!

Mientras nos tawata warda riba nos visa, nos a keda traha pa un tempo cortico na Betel di Brooklyn, pero poco despues nos a cohe rumbo pa Lima. E prome di e dies asignacionnan di misionero cu nos tawatin, tawata Callao, e haf principal di Peru, djis west di Lima. Aunke nos a siña algun cos basico di Spaño, ni ami ni Irene no por a hiba un combersacion den e idioma ei. Con nos lo a haci?

Problema- y Privilegionan den e Predicacion

Na Galad nan a bisa nos cu un mama no ta siña su baby un idioma. Mas bien, e baby ta siña segun cu su mama ta papia cu ne. Pesei nan a conseha nos: “Sali bai predica mesora, y siña e idioma for di e publico. Nan lo yuda boso.” Segun cu mi tawata purba compronde y maneha e lenga nobo aki, mi a ser nombra como superintendente presidente di Congregacion Callao dos siman despues di nos yegada! Bo por imagina con mi a sinti. Mi a bai bishita Sidney Fraser, pero el a duna mi e mesun conseho cu mi a haya na Galad: asocia cu e congregacion y cu e hendenan den bo teritorio. Mi a dicidi di sigui e conseho aki.

Un diasabra mainta, mi a topa un carpinte den su shop. E di cu mi: “Mi tin cu sigui haci mi trabou, pero sea asina bon di tuma asiento y papia cu mi.” Mi a bis’e cu lo mi a haci esaki bou di un condicion: “Ora mi haci un fout, por fabor, corigi mi. Lo mi no rabia.” El a hari y a bai di acuerdo cu mi peticion. Mi tawata bishit’e dos bes pa siman y a descubri cu esei tawata un manera ideal pa familiarisa mi mes cu e idioma, net manera nan a bisa mi.

Pa casualidad na e stad Ica, nos segundo asignacion di misionero, mi a topa un otro carpinte y mi a splic’e di e areglo cu mi tawatin na Callao. El a bai di acuerdo pa yuda mi na e mesun manera, y asina mi Spaño a sigui bai dilanti, aunke a dura mi tres aña prome cu mi tawata realmente bon den dje. E homber aki semper tawata hopi ocupa, pero mi a logra conduci un studio di Bijbel cu ne door di lesa e textonan anto caba splic’e kico nan ta nifica. Un siman cu mi a bai bishit’e, su doño di trabou a bisa mi cu el a kita pa bai traha na Lima. Poco tempo despues ora ami cu Irene a bai Lima pa un congreso, mi a bolbe topa e homber aki. Mi a keda masha emociona ora mi a tende cu el a tuma contacto cu e Testigonan local pa e por a sigui cu su studio y cu e cu henter su famia a bira sirbidonan dedica di Yehova!

Den un congregacion, nos a descubri cu un pareha jong no tawata casa, pero toch nan a ser batisa. Ora nos a papia cu nan tocante e principionan biblico relaciona cu esaki, nan a dicidi di legalisa nan union, locual lo a laga nan cualifica pa ser considera como Testigo batisa. Pesei mi a haci areglo pa hiba nan stadhuis pa registra nan matrimonio. Pero e ora ei un problema a presenta pasobra nan tawatin cuater yiu cu tampoco nan no a registra, y esaki tawata un rekisito legal. Claro cu nos a puntra nos mes ta kico e alcalde lo bai haci. Wel, el a bisa: “Como cu e bon hendenan aki, boso amigonan Testigonan di Yehova, a haci sigur pa boso ta legalmente casa, lo mi no manda yama e yiunan den corte manera lei ta prescribi y lo mi registra nan gratis.” Nos tawata masha gradicido pa esei, ya cu tawata trata di un famia pober y un but lo tawata un carga hopi pisa pa nan.

Albert D. Schroeder di e sede mundial di Testigonan di Yehova na Brooklyn, a bishita nos mas despues y a recomenda pa establece un cas di misionero nobo den un otro parti di Lima. Pesei ami cu Irene hunto cu dos ruman mohe, Frances y Elizabeth Good di Merca, y un pareha Canades a muda pa e districto di San Borja. Despues di dos pa tres aña nos a ser bendiciona cu un otro congregacion progresivo.

Ora nos tawata sirbi na Huancayo, mas cu 3.000 meter halto den e seronan central, nos a  asocia cu e congregacion di 80 Testigo cu tawatin ei. Einan mi a participa den e construccion di e segundo Salon di Reino cu nan a traha den e pais. Mi a ser nombra representante legal di Testigonan di Yehova, como cu tres biaha nos mester a bai corte pa establece nos derecho legal di e tereno cu nos a cumpra. Tal accion, hunto cu e trabou extenso di haci disipel di hopi misionero fiel den e añanan ei, a pone un fundeshi solido pa e bunita aumento cu nos ta mira awor na Peru: di 283 Testigo na 1953 pa mas cu 83.000 awe.

Un Despedida Tristo

Nos a disfruta di masha dushi asociacion cu otro misioneronan den tur nos casnan di misionero, caminda hopi bes mi tawatin e privilegio di sirbi como superintendente di hogar. Tur dialuna mainta, nos a reuni hunto pa papia tocante nos actividadnan pa e siman nos dilanti y pa asigna ken ta haci e tareanan pa cuida nos cas. Nos tur a realisa cu e cos principal tawata e predicacion, y pa logra esei nos tur a traha hunto den harmonia. Mi ta contento cu nunca nos no tawatin ningun disputa grandi den ningun di nos casnan.

Nos ultimo asignacion tawata na Breña, un otro bario di Lima. Su congregacion amoroso di 70 Testigo a crece rapidamente na mas cu 100, y a forma un congregacion nobo na Palominia. Tawata durante e tempo aki cu Irene a bira malo. Na principio mi a ripara cu de bes en cuando e no por a corda kico el a bisa, y tawatin bes cu e tawatin problema pa corda con pa yega cas. Aunke el a haya masha bon atencion medico, su condicion a sigui bai atras pocopoco.

Lamentablemente, na 1990 mi mester a haci areglo pa nos bai Inglatera bek, caminda mi ruman mohe Ivy bondadosamente a tuma nos den su cas. Cuater aña despues Irene a muri na edad di 81 aña. Ami a sigui den sirbishi di tempo completo, y ta sirbi como anciano den un di e tres congregacionnan den mi pueblo natal. De bes en cuando, mi ta bai Manchester pa anima e grupo Spaño cu tin einan.

Poco tempo pasa mi tawatin un dushi experencia cu a cuminsa hopi aña pasa tempo cu mi tawata toca sermon di cinco minuut riba mi tocadisco pa doñonan di cas tende. Mi ta corda cla cla con tawatin un mucha di scol cu tawata para tras di su mama na porta ta scucha e mensahe.

E mucha mohe aki cu tempo a imigra pa Canada, y un amiga cu ainda ta biba na Runcorn y cu awor ta un Testigo a sigui den contacto cu ne. Poco tempo pasa esun na Canada a skirbi cu dos Testigo a bishit’e y a uza palabranan cu di un manera inespera a trece recuerdonan di loke el a tende den e grabacion ei di cinco minuut. Reconociendo esei como e berdad, awor e ta un sirbido dedica di Yehova y a pidi su amiga gradici e yoncuman cu a bishita cas di su mama mas cu 60 aña pasa! Di berdad nos no sa nunca con simiña di e berdad lo saca raiz y crece.—Eclesiastes 11:6.

Si, cu un gratitud profundo mi ta corda riba e bida cu mi a pasa den Yehova su sirbishi precioso. Desde mi dedicacion na 1931, nunca mi no a perde un asamblea di e pueblo di Yehova. Aunke ami cu Irene no tawatin yiu, mi ta contento cu mi tin mas cu 150 yiu homber y yiu mohe den sentido spiritual, tur sirbiendo nos Tata celestial, Yehova. Manera mi casa stima a expres’e, e privilegionan cu nos tawatin, di berdad tawata un goso incomparabel.

[Nota]

[Plachi na pagina 24]

Mama, na principio di añanan 1900

[Plachi na pagina 25]

Ariba: Ami cu Irene dilanti nos caravan

[Plachi na pagina 24, 25]

Man robes: Hilda Padgett, ami, Irene y Joyce Rowley na Leeds, Inglatera, 1940

[Plachi na pagina 27]

Anunciando un discurso publico na Cardiff, Wales, 1952