E Matrimonio Improbabel di Boaz cu Rut

E PLENCHI di bati maishi banda di Betlehem ta yen di actividad. Tawata un dia largo. E holo di grano cu a caba di rooster ta laga e trahadonan hambra sa cu ta ora di come. Cada un lo disfruta di e resultado di su trabou duro.

Boaz, un homber rico, doño di tereno, ta come y bebe na su antoho y ta sosega banda di un monton di grano. Mas laat, e dia di cosecha ta yega na su fin y cada trahado ta busca un luga comodo pa sosega. Boaz, satisfecho di dje, awor ta tapa su curpa y pega soño.

Un Encuentro Secreto

Meianochi, friu ta pone Boaz spierta y tembla. Pa su sorpresa, un persona a kita e co’i tapa for di su pianan intencionalmente, y a cai drumi na su pia! Den scuridad, Boaz no ta reconoce ta ken, pesei e ta puntra: “Ta ken bo ta?” Stem di un hende mohe ta contesta: “Ami ta Rut, bo sirbiente. Pesei, habri bo clechi riba bo sirbiente, pasobra bo ta un famia yega [“recumprado”, NW].”—Rut 3:1-9.

Sin cu ningun hende por scucha nan, nan dos so ta papia den e scuridad. Hende mohe no sa presenta nan so asin’aki na un plenchi di bati maishi. (Rut 3:14) No obstante, riba invitacion di Boaz, Rut ta keda drumi na su pia y lanta bai djis prome cu solo sali, evitando asina cualkier critica infunda.

Tawata trata aki di un encuentro romantico? Acaso Rut, un biuda jong y pober di un pais pagano, a uza astucia pa seduci e homber rico aki di mas edad? Of ta Boaz a probecha di e circunstancianan y soledad di Rut e anochi ei? No. Loke a sosode e anochi ei ta un ehempel di lealtad y amor di Dios. Y e detayenan ta masha conmovedor tambe.

Pero ken ta Rut? Pakico el a actua asina? Y ken ta Boaz, e homber rico aki?

“Un Mohe Exelente”

Hopi aña prome cu e episodio aki, hamber a dal Huda. Un famia Israelita di cuater miembro—Elimelek; su casa, Noemi; y nan dos yiu hombernan, Mahlon y Kelion—a imigra bai na e tera fertil di Moab. E yiu hombernan a casa cu dos mohe Moabita, Rut y Orfa. Despues cu tur e tres hombernan a muri na Moab, e tres mohenan a tende cu e situacion na Israel a drecha. Di manera cu Noemi—awor un biuda, desilusiona, sin yiu ni nieto—a dicidi di bolbe bek su patria.—Rut 1:1-14.

Riba caminda pa Israel, Noemi a combence Orfa pa e bolbe bek na su pueblo. Despues Noemi a bisa Rut: “Mira, bo cuña [biuda] a bai bek serca su pueblo y su diosnan; bai bek tras di bo cuña.” Ma Rut a bis’e: “No keda insisti pa mi bai laga bo, . . . pasobra unda cu bo bai, lo  mi bai . . . Bo pueblo lo ta mi pueblo, y bo Dios, mi Dios. Caminda bo muri, lo mi muri, y einan lo mi wordo dera.” (Rut 1:15-17) Di manera cu e dos biudanan pober a bolbe Betlehem. Einan e biciñanan a keda asina impresiona cu e amor y atencion cu Rut tawatin pa su suegra cu nan a haya cu e ta “miho pa [Noemi] cu shete yiu homber.” Otronan a describie como “un mohe excelente.”—Rut 3:11; 4:15.

Na Betlehem, na comienso di e cosecha di cebada, Rut a bisa Noemi: “Pa fabor, laga mi bai den cunucu y piki tapushi tras di esun cu mi haya gracia den su bista.”—Rut 2:2.

Pa casualidad, Rut ta yega na e cunucu cu ta pertenece na Boaz, un famia di su suegro Elimelek. E ta pidi esun cu ta dirigi trabou permit pa piki tapushi cu a keda atras. Rut ta sobresali pa su diligencia y esun cu ta dirigi trabou ta elogi’e serca Boaz.—Rut 1:22–2:7.

Un Protector y Benefactor

Boaz ta un adorado deboto di Yehova. Tur mainta, e tawata cuminda su trahadonan cu e palabranan: “SEÑOR sea cu boso”, y nan tawata contesta: “SEÑOR bendiciona bo.” (Rut 2:4) Despues cu Boaz mira con diligente Rut ta na trabou y despues cu e haya sa con leal Rut ta na Noemi, e ta duna Rut un areglo special pa piki tapushi. Cu poco palabra, Boaz ta bis’e: ‘Keda den mi cunucu; bo no tin nodi di bai otro caminda. Keda serca e mohenan jong cu ta traha pa mi; sinti bo sigur serca nan. Mi a ordena e yoncumannan pa no molestia bo. Ora bo tin sed, nan lo saca awa fresco pa bo.’—Rut 2:8, 9.

Rut ta buig y bisa: ‘Con bin mi a haya gracia den bo bista, siendo cu mi ta un stranhero?’ Boaz ta contest’e: ‘Mi a tende di tur loke bo a haci pa bo suegra despues di morto di bo esposo, y con bo a bandona bo tata y bo mama, famianan y e tera caminda bo a nace, pa bo ta serca un pueblo cu bo no tawata conoce prome. Cu SEÑOR recompensa bo manera di actua, y cu E duna bo un pago completo.’—Rut 2:10-12.

No ta su cariño Boaz ta purba gana. Su elogio pa Rut ta sinsero. Rut ta humilde di curason y ta gradicie pa su consuelo trankilisante. Rut ta haya cu e no merece esei y ta sigui traha asta mas duro. Mas laat, ora di come, Boaz ta yama Rut: ‘Bin, come di e pan y dop bo pida pan den binager.’ Rut ta come yena bariga y ta warda cuminda pa e hiba cas pa Noemi.—Rut 2:14.

Na fin di e dia, Rut a piki rond di 22 liter di cebada. E ta hiba e cebada hunto cu e pan cu a sobra cas pa Noemi. (Rut 2:15-18) Contento cu tur loke el a haya, Noemi ta puntra: “Unda bo a piki awe? . . . Bendiciona sea esun cu a paga atencion na bo.” Ora Noemi haya sa cu ta Boaz, e ta bisa: “Esun cu no a nenga su cariño na e bibonan ni na e mortonan sea bendiciona. . . . E homber ta nos famia, e ta un di nos famianan mas yega [“recumprado”, NW].”—Rut 2:19, 20.

 Hayando un Luga di “Siguridad”

Noemi ta desea di haya un luga di “siguridad”, of hogar, pa su suegra. Pesei e ta probecha di e oportunidad pa haci un apelacion riba e areglo di e Lei di Dios pa “cumpra bek.” (Levitico 25:25; Deuteronomio 25:5, 6) Awor Noemi ta instrui Rut pa e haci algo na un manera masha eficas, asta un tiki dramatico, pa e capta e atencion di Boaz. Prepara y bon instrui, ora bira nochi, Rut ta baha bai na e plenchi di bati maishi cu ta pertenece na Boaz. E ta hañ’e na soño. Rut ta kita e co’i tapa for di su pia y ta ward’e spierta.—Rut 3:1-7.

Ora Boaz lanta, sin duda e accion simbolico di Rut ta lag’e compronde e nificacion di su peticion pa Boaz ‘habri su clechi riba su sirbiente.’ E accion di Rut ta haci e Hudiu di mas edad cu ne conciente di su obligacion pa cumpra bek, ya cu e tawata famia di Rut su defunto casa, Mahlon.—Rut 3:9.

Rut su bishita anochi tawata algo inespera. Toch, Boaz su reaccion ta indica cu e peticion di Rut pa ‘cumpra bek’ no a cai como sorpresa pa Boaz. E ultimo aki tawata dispuesto pa cumpli cu e peticion di Rut.

E stem di Rut lo a refleha cierto ansiedad, loke a motiva Boaz pa trankilis’e: “Awor, mi yiu, no tene miedo. Lo mi haci pa bo kico cu bo pidi, pasobra tur e hendenan di e stad aki sa cu bo ta un mohe excelente.”—Rut 3:11.

Loke Boaz a bisa despues ta mustra cu el a considera tur Rut su accionnan completamente corecto: “Cu SEÑOR bendiciona bo, mi yiu. Bo a mustra cu bo ultimo cariño [“bondad amoroso”, NW] ta miho cu esun prome.” (Rut 3:10) Na prome instante, Rut a desplega bondad amoroso, of amor leal, pa Noemi. E di dos of “ultimo” biaha tawata cu el a identifica su mes sin egoismo na Boaz, un homber mas grandi cu ne, pasobra Boaz tawata esun cu por a cumpra bek. Rut tawata dispuesto pa haya un yiu den nomber di Mahlon, su defunto esposo, y pa Noemi.

Un Recumprado Ta Hala Atras

E siguiente mainta, Boaz ta bai busca un famia, un tal “Amigo”, kende ta mas yega na Noemi cu Boaz. Dilanti e habitantenan y e ancianonan di e stad, Boaz ta bisa: ‘Mi a pensa di informa bo di bo derecho pa cumpra bek di Noemi e pida tera cu tawata pertenece na su esposo Elimelek, pasobra Noemi tin cu bend’e.’ Boaz ta continua: ‘Abo kier cumpr’e bek? Si no, e ora ei ami si lo cumpr’e bek.’ Despues di scucha Boaz, e Amigo ta indica cu lo e cumpra bek.—Rut 4:1-4.

Pero tin un sorpresa ta warda e Amigo! Awor Boaz ta bisa dilanti tur e testigonan: “Riba e dia cu bo cumpra e cunucu for di man di Noemi, bo mester tuma Rut e Moabita, biuda di e defunto, tambe, pa asina lanta e nomber di e defunto riba su herencia.” Cu miedo di pone su mes herencia na peliger, e famia  mas yega ta renuncia su derecho di cumpra bek, bisando: ‘Mi no por cumpra bek.’—Rut 4:5, 6.

Segun custumber, e homber cu a nenga di cumpra bek mester a kita su sandalia y dun’e na su prohimo. Pues ora e recumprado bisa Boaz, ‘Cumpr’e bo mes’, e ta kita su sandalia. E ora ei Boaz ta bisa e ancianonan y tur e hendenan: “Boso ta testigo awe cu mi a cumpra for di man di Noemi tur loke tawata pertenece na Elimelek y tur loke tawata pertenece na Kelion y Mahlon. Ademas, mi a haya Rut e Moabita, biuda di Mahlon, pa ta mi esposa pa lanta nomber di e defunto riba su herencia . . . Boso ta testigo awe.”—Rut 4:7-10.

Tur e hendenan cu tawata den e porta ta bisa Boaz: “Cu SEÑOR haci e mohe cu ta bin den bo cas manera Raquel y Lea, kendenan tur dos a edifica e cas di Israel; y cu bo haya prosperidad na Efrata y bira famoso na Betlehem.”—Rut 4:11, 12.

Cu e bendicion di e pueblo, Boaz ta tuma Rut como esposa. E ta haya un yiu cu ne cu yama Obed, y asina Rut cu Boaz a bira antepasado di Rei David y consecuentemente di Hesucristo.—Rut 4:13-17; Mateo 1:5, 6, 16.

‘Un Pago Completo’

Atrabes di henter e relato, na prome instante, for di e manera bondadoso cu Boaz ta cuminda su trahadonan te ora cu e acepta e responsabilidad di conserva e nomber di famia di Elimelek, e ta mustra di ta un homber sobresaliente—un homber di accion y autoridad. Na mesun tempo, e tawata un homber di dominio propio, fe y integridad. Tambe Boaz tawata generoso, bondadoso, moralmente limpi y completamente obediente na Yehova su mandamentonan.

Rut ta sobresali pa su amor pa Yehova, pa su amor leal pa cu Noemi, y pa su diligencia y humildad. Nada straño cu e pueblo a haya cu e tawata “un mohe excelente.” E no a come “pan di flohedad”, y pa motibo di su trabou duro, e tawatin algo di parti cu su suegra pober. (Proverbionan 31:27, 31) Asumiendo responsabilidad pa Noemi, Rut mester a sinti e felicidad cu ta bini di duna.—Echonan 20:35; 1 Timoteo 5:4, 8.

E ehempelnan den e buki di Rut ta masha bunita! Yehova lo corda riba Noemi. Rut ta ricibi ‘un pago completo’ como antepasado di Hesucristo. Boaz ta ser bendiciona cu “un mohe excelente.” Pa loke ta nos, nos ta haya ehempelnan di fe den e personanan ei.

[Cuadro na pagina 26]

Un Rayo di Speransa

Si bo ta sinti cu bo ta biba den un tempo di miseria, e historia di Rut por duna bo un rayo di speransa. E ta resalta como un conclusion importante di e buki di Huesnan. E buki di Rut ta conta con Yehova a uza un biuda humilde for di e nacion pagano di Moab pa produci un rei pa su pueblo. Banda di e buki di Huesnan, e fe di Rut ta briya manera un lus den e epoca ei.

Ora bo lesa e relato di Rut, bo por tin e garantia cu sin importa con teribel tempo por ta, semper Dios ta percura pa su pueblo y cumpli cu su proposito.