Pregunta di Lector

Tin algun areglo cu por haci pa un cristian ungi cu ta malo y cu no por asisti na e conmemoracion cu e congregacion ta tene di e Cena di Señor?

Si. Ta posibel y importante pa haci areglo cu ta tene cuenta cu e situacion di un cristian ungi enfermo cu kisas ta na cama, y door di esei no por ta presente ora e congregacion ta celebra e Memorial di e morto di Cristo. Den un caso asina, e cuerpo di anciano por haci areglo pa un anciano of un otro ruman homber maduro hiba un parti di e emblemanan, esta, e pan y biña, pa e compañero creyente ei riba e mesun anochi, prome cu solo sali e siguiente dia.

Dependiendo di e circunstancia, e anciano of e otro ruman homber cu bishita e ruman ungi por duna algun comentario breve y lesa algun texto cu ta pas cu e ocasion. E por sigui e ehempel cu Hesus a pone ora el a institui e Cena di Señor. Por ehempel, e por lesa Mateo 26:26 y despues di haci oracion, duna e ruman e pan sin zuurdeeg. Caba e ruman di bishita por lesa Mateo capitulo 26 versiculo 27 y 28, haci un oracion mas y pasa e biña. E por comenta brevemente riba e nificacion di cada emblema y na conclusion e mester haci oracion.

Claro cu nos mester haci tur esfuerso posibel pa ta presente na e celebracion di e Cena di Señor cu e congregacion ta tene. Pero kico mester haci den un caso extremo caminda un cristian ungi ta hopi malo, den hospital of stroba di un of otro manera pa celebra e Memorial despues cu solo baha dia 14 di nisan? Den un caso asina e ruman ungi por haci uzo di loke e Lei di Moises a permiti, esta, di celebra e Memorial den priva 30 dia despues.—Numbernan 9:9-14.