‘Tene Curashi y Sea Fuerte!’

“Tene curashi, mi a vence mundo.”—HUAN 16:33.

1. Ki animacion e Israelitanan a ricibi en bista di loke a spera nan na Canan?

DJIS prome cu e Israelitanan a crusa Riu Yordan pa drenta den e Tera Priminti, Moises a bisa nan: “Sea fuerte y tene curashi, no tene miedo ni tembla pa nan, pasobra SEÑOR bo Dios ta Esun cu ta bai cu bo.” Anto Moises a yama Hosue, esun scohi pa dirigi e Israelitanan pa drenta Canan, y a ripiti na dje personalmente e conseho pa tene curashi. (Deuteronomio 31:6, 7) Mas despues Yehova mes a anima Hosue, bisando: “Sea fuerte y tene curashi . . . Solamente, sea fuerte y tene hopi curashi.” (Hosue 1:6, 7, 9) E palabranan ei tawata na ora. E Israelitanan lo tawatin mester di curashi pa confronta e enemigonan poderoso cu tawata spera nan na e otro banda di Yordan.

2. Den ki situacion nos ta awe, y kico nos tin mester?

² Pronto cristiannan berdadero djawe lo drenta e mundo nobo priminti y, mescos cu Hosue, nan tin mester di curashi. (2 Pedro 3:13; Revelacion 7:14) Pero nos situacion ta otro for di esun di Hosue. Hosue a bringa cu spada y lansa. Nos ta hiba un bataya spiritual y nunca ta uza arma literal. (Isaias 2:2-4; Efesionan 6:11-17) Ademas, Hosue mester a sigui bringa hopi bataya feros asta despues cu nan a drenta e Tera Priminti. Pero nos ta confronta nos luchanan di mas feros aworaki, prome cu nos drenta e mundo nobo. Laga nos analisa algun situacion cu ta exigi curashi.

Dicon Nos Tin Cu Lucha?

3. Kico Bijbel ta revela tocante nos adversario principal?

³ Apostel Huan a skirbi: “Nos sa cu nos ta di Dios, y henter mundo ta bou di control di e malbado.” (1 Huan 5:19) E palabranan ei ta indica un motibo basico pakico cristiannan tin cu lucha pa mantene nan fe. Ora un cristian mantene su integridad, esei te na cierto grado ta un derota pa Satanas e Diabel. Pesei Satanas ta actua manera “un leon cu ta gruña”, den un intento pa intimida y devora cristiannan fiel. (1 Pedro 5:8) Si, e ta hiba un guera contra e cristiannan ungi y nan compañeronan. (Revelacion 12:17) Den e guera aki e ta uza hende cu concientemente of inconcientemente ta sirbi su proposito. Nos mester tin curashi pa por para firme contra Satanas y tur su agentenan.

4. Ki spiertamento Hesus a duna, pero ki cualidad cristiannan berdadero a desplega?

⁴ Como cu Hesus tawata sa cu Satanas y su agentenan lo a resisti e bon nobo cu tur nan forsa, El a spierta su siguidonan: “Nan lo entrega boso na tribulacion y lo mata boso, y tur nacion lo odia boso pa causa di mi nomber.” (Mateo 24:9) E palabranan ei a cumpli den prome siglo, y nan ta cumpli awe tambe. Si, e persecucion cu algun Testigo di Yehova di nos tempo a soporta tawata mes cruel cu e otro persecucionnan den transcurso di historia. Pero toch cristiannan berdadero tin curashi ora nan ta haya nan cu tal presion. Nan sa cu  “temor pa hende ta pone un trampa”, y nan no kier cai den e trampa ei.—Proverbionan 29:25.

5, 6. (a) Ki situacionnan ta rekeri curashi di nos parti? (b) Con cristiannan fiel ta reacciona ora nan curashi ser poni na prueba?

⁵ Tin otro retonan fuera di persecucion cu ta exigi curashi di nos parti. Pa algun publicado, ta dificil pa nan papia cu hende straño tocante e bon nobo. E curashi di algun mucha di scol ta ser poni na prueba ora exigi di nan pa resita un huramento di lealtad na nan patria of na bandera of pa lanta para hunto cu e otro alumnonan ora himno ta wordo toca. Como cu e huramento di lealtad ta de echo un expresion religioso y hopi bes un himno ta eigenlijk un oracion na fabor di un nacion, muchanan cristian cu curashi ta dicidi di actua na un manera cu ta agrada Dios. Y e proceder excelente aki ta alegra nos curason.

⁶ Tambe nos tin mester di curashi ora cu opositornan ta manipula medionan di comunicacion pa nan plama informenan negativo tocante e sirbidonan di Dios of ora cu nan ta purba restringi adoracion berdadero door di conspira problema “pa medio di decreto.” (Salmo 94:20) Por ehempel, con nos mester sinti ora informenan di corant, radio of television tocante Testigonan di Yehova ta puro mentira of ta ser troci di tal manera cu nan ta malinforma pueblo? Esei mester shock nos? No. Ta cos cu nos ta verwacht. (Salmo 109:2) Y si algun hende ta kere e mentiranan y informacionnan troci cu sali publica tampoco nos no ta keda sorprendi, pasobra “hende sin experencia ta kere tur cos cu bis’e.” (Proverbionan 14:15, Beibel na papiamentu koriente) Sinembargo, cristiannan leal si ta nenga di kere tur cos cu hende ta bisa di nan rumannan, y sigur nan no ta laga publicidad negativo pone nan keda sin bai nan reunionnan cristian, participa menos den sirbishi di veld of debilita nan fe. Al contrario, nan ta “recomenda [nan] mes como sirbidonan di Dios, . . . pa medio di gloria y deshonor, pa medio di mal fama y bon fama; como gañadonan [segun opositor] y toch [en realidad] berdadero.”—2 Corintionan 6:4, 8.

7. Ki preguntanan penetrante nos lo por haci nos mes?

⁷ Den un carta na Timoteo, Pablo a bisa: “Dios no a duna nos un spirito di temor, sino di poder . . . Pesei, no tene berguensa di e testimonio di nos Señor.” (2 Timoteo 1:7, 8; Marco 8:38) Despues di lesa e palabranan ei, nos por puntra nos mes: ‘Mi tin berguensa di mi creencianan religioso, of mi tin curashi? Caminda mi ta traha (of bai scol), mi ta laga e hendenan rond di mi sa cu mi ta un Testigo di Yehova, of mi ta purba sconde esei? Mi tin berguensa di ser diferente for di otro hende, of mi ta orguyoso cu mi ta destaca pa motibo di mi relacion cu Yehova?’ Laga ken cu tin sintimentonan negativo pa cu e trabou di predica e bon nobo of pasobra su creencianan no ta popular, corda loke Yehova a conseha Hosue: “Sea fuerte y tene curashi.” No lubida nunca cu loke ta conta no ta e opinion di nos coleganan of di nos  compañeronan di scol, sino loke Yehova y Hesucristo ta pensa.—Galationan 1:10.

Con pa Haya Mas Curashi

8, 9. (a) Con e curashi di e cristiannan di prome a ser poni na prueba na un ocasion? (b) Con Pedro cu Huan a reacciona ora nan a ser menasa, y kico nan y nan rumannan a experencia?

⁸ Con nos por haya e tipo di curashi cu lo yuda nos mantene nos integridad durante e tempo dificil aki? Wel, con e cristiannan di prome aya a haya curashi? Considera loke a pasa ora cu e sacerdotenan principal y e ancianonan na Herusalem a bisa Pedro cu Huan pa stop di predica den nomber di Hesus. E disipelnan a nenga di stop, e lidernan Hudiu a menasa nan y despues a laga nan bai. Mesora nan a bai serca e rumannan y nan tur a haci oracion hunto, bisando: “Señor, tuma nota di nan menasanan y laga bo sirbidonan papia bo palabra cu tur confiansa.” (Echonan 4:13-29) Como contesta, Yehova a fortalece nan cu spirito santo, y manera e lidernan Hudiu a declara despues, e disipelnan “a yena Herusalem” cu nan siñansa.—Echonan 5:28.

⁹ Laga nos analisa loke a sosode na e ocasion ei. Ora cu e lidernan Hudiu a menasa e disipelnan, esakinan no a pensa ningun ora so di stop di predica debi na e presion. Mas bien, nan a resa pidi Dios pa duna nan confiansa of curashi pa sigui predica. Caba nan a actua di acuerdo cu loke nan a pidi den oracion, y Yehova a fortalece nan cu su spirito. Nan experencia ta mustra cu loke Pablo a skirbi algun aña despues, den un otro contexto, ta aplica na cristiannan ora nan ta ser persigui. Pablo a bisa: “Mi por enfrenta tur cos pa medio di esun cu ta duna mi forsa.”—Filipensenan 4:13, BPK.

10. Con e experencia di Yeremias ta yuda esnan cu di naturalesa ta timido?

¹⁰ Pero supone cu un persona ta timido di naturalesa. Lo e por sirbi Yehova toch cu curashi ora e hay’e cu oposicion? Sigur cu si! Corda con Yeremias a reacciona ora Yehova a nombr’e como profeta. E yoncuman a bisa: “Mi ta un mucha.” Ta bisto cu el a sinti su mes inadecua. Sinembargo, Yehova a curash’e cu e palabranan aki: “No bisa: ‘Mi ta un mucha’, pasobra unda cu ami manda bo, lo bo bai, y tur loke ami manda bo papia, lo bo papia. No tene miedo di nan, pasobra ami ta cu bo pa libra bo.” (Yeremias 1:6-10) Yeremias tawatin confiansa den Yehova, y como resultado, cu Yehova su poder el a vence su mala gana di predica y a bira un testigo cu un curashi remarcabel den Israel.

11. Kico ta yuda cristiannan djawe pa nan tin curashi manera Yeremias?

¹¹ Cristiannan ungi djawe tin casi mesun tarea cu Yeremias, y cu apoyo di e “multitud  grandi” di ‘otro carne’, nan ta sigui proclama Yehova su proposito, apesar cu nan oyentenan ta indeferente, ta haci bofon of ta persigui nan. (Revelacion 7:9; Huan 10:16) Loke Yehova a bisa Yeremias ta duna nan curashi: “No tene miedo.” Nunca nan no ta lubida cu ta Dios a duna nan e tarea y cu ta su mensahe nan ta predica.—2 Corintionan 2:17.

Ehempelnan di Curashi Digno pa Nos Imita

12. Ki excelente ehempel di curashi Hesus a pone y con el a curasha su siguidonan?

¹² Un cos cu por yuda nos haya mas curashi ta si nos medita riba e ehempelnan di otro hende cu, mescos cu Yeremias, a actua cu curashi. (Salmo 77:12) Por ehempel, ora nos analisa Hesus su sirbishi, nos ta admira e curashi cu e tawatin ora cu Satanas a tent’e y ora cu el a confronta e oposicion dicidido di e lidernan religioso. (Lucas 4:1-13; 20:19-47) Cu poder di Yehova, Hesus tawata asina firme den su conviccion cu nada no por a pon’e basila. Anto djis prome cu su morto el a bisa su disipelnan: “Den mundo boso tin tribulacion, ma tene curashi, mi a vence mundo.” (Huan 16:33; 17:16) Si Hesus su disipelnan a sigui su ehempel, nan tambe lo a vence mundo. (1 Huan 2:6; Revelacion 2:7, 11, 17, 26) Pero pa logra esei nan mester a “tene curashi.”

13. Ki animacion Pablo a duna e Filipensenan?

¹³ Algun aña despues di Hesus su morto, Pablo cu Silas a ser encarsela na Filipos. Mas despues Pablo a anima e congregacion Filipense pa sigui “para firme den un spirito, di un acuerdo, luchando hunto pa e fe di evangelio, sin ningun sorto di miedo di esnan cu ta opone [nan].” Pa fortalece nan den esaki, Pablo a bisa: “[E persecucion di e cristiannan] ta un señal di destruccion pa [e persiguidonan], ma di salbacion pa boso, y esei for di Dios. Pasobra na boso esaki a wordo duna pa causa di Cristo, no solamente pa kere den dje, ma tambe pa sufri pa su motibo.”—Filipensenan 1:27-29.

14. Ki resultado Pablo su curashi tawatin na Roma?

¹⁴ Ora Pablo a skirbi e congregacion na Filipos, e tawata den prizon atrobe, pero e biaha aki na Roma. Toch el a sigui predica na otro hende cu curashi. Cu ki resultado? El a skirbi: “Mi cadenanan pa e causa di Cristo a bira bon conoci den henter e guardia di palacio y na tur otro hende, y cu mayoria di e rumannan, confiando den Señor pa motibo di mi cadenanan, tin mucho mas curashi pa papia e palabra di Dios sin miedo.”—Filipensenan 1:13, 14.

15. Unda nos por haya excelente ehempel di fe cu lo fortalece nos determinacion pa mustra curashi?

¹⁵ E ehempel di Pablo ta curasha nos. Nos ta ser curasha tambe door di e excelente ehempel di cristiannan di nos tempo, cu a soporta persecucion den paisnan bou di dictadura of bou di mando di clero. Hopi di nan su relato a sali publica den e revistanan Toren di Vigilancia y Spierta! y den Anuario di Testigonan di Yehova. Segun cu bo ta lesa e relatonan ei, corda cu e personanan cu e relatonan ta conta di dje tawata hende comun y coriente mescos cu nos; pero ora nan tawata den circunstancianan hopi dificil, Yehova a duna nan poder mas aya di loke ta normal y nan a persevera. Nos por tin sigur cu Yehova lo haci mescos pa nos si nos circunstancia ta rekeri esei.

 Nos Posicion di Curashi Ta Agrada y Honra Yehova

16, 17. Con nos awe por cultiva un actitud di curashi?

¹⁶ Si un cristian para firme pa berdad y husticia, esei ta indica cu e tin curashi. Si e cristian haci esei apesar cu e ta sinti miedo, esei ta mustra asta mas curashi. En realidad, tur cristian por demostra curashi si di berdad nan kier haci Yehova su boluntad, si nan ta dicidido pa keda fiel, si constantemente nan ta depende riba Dios, y si semper nan corda cu den pasado Yehova a fortalece masha hopi persona mescos cu nan. Ademas, ora nos realisa cu nos posicion di curashi ta agrada y honra Yehova, nos lo ta asta mas determina pa no bira debil. Nos lo ta dispuesto pa soporta bofon of cos piyo pasobra nos stim’e profundamente.—1 Huan 2:5; 4:18.

¹⁷ No lubida nunca cu ora nos ta sufri pa causa di nos fe, esei no kiermen cu nos a haci algo malo. (1 Pedro 3:17) Nos ta sufri pasobra nos ta apoya Yehova su derecho como Soberano, pasobra nos ta haci bon y pasobra nos no ta parti di mundo. Relaciona cu esaki, apostel Pedro a bisa: “Ma si ora boso haci loke ta corecto y cu pasenshi boso sufri pa e motibo ei, esaki ta haya aprobacion serca Dios.” Tambe Pedro a bisa: “Laga esnan tambe cu ta sufri segun e boluntad di Dios encomenda nan almanan na e fiel Creador den e hacimento di loke ta corecto.” (1 Pedro 2:20; 4:19) Si, nos fe ta agrada nos Dios amoroso, Yehova, y ta dun’e honor. Ki un motibo fuerte pa nos tin curashi!

Ora Nos Tin Cu Papia cu Autoridadnan

18, 19. Ora nos tuma un posicion di curashi dilanti di un hues, ki mensahe eigenlijk nos ta entregando na dje?

¹⁸ Ora Hesus a bisa su siguidonan cu nan lo ser persigui, el a bisa tambe: “[Hende] lo entrega boso na consilio [of tribunal] y suta boso den nan sinagoganan; tambe boso lo wordo hiba dilanti di gobernantenan y reinan pa mi causa, como un testimonio pa nan y pa e paganonan.” (Mateo 10:17, 18) Nos mester tin curashi pa presenta dilanti di un hues of gobernante pa motibo di acusacionnan falso. Pero si nos tuma curashi pa uza ocasionnan asina pa duna un testimonio na e personanan ei, nos ta probecha di un situacion dificil pa logra algo importante. Eigenlijk nos ta entrega na esnan cu ta husga nos e palabranan di Yehova cu tin para skirbi na Salmo 2: “Pesei anto, o reinan, uza sabiduria; acepta spiertamento, o huesnan di tera. Sirbi SEÑOR cu temor.” (Salmo 2:10, 11) Hopi bes ora cu Testigonan di Yehova a ser acusa falsamente dilanti tribunal, huesnan a apoya libertad di adoracion, y nos ta aprecia esei. Sinembargo, algun hues a permiti opositornan influencia nan. Na e huesnan ei e Scritura ta bisa: “Acepta spiertamento”, of segun e idioma original: “Laga boso mes ser corigi.” [NW]

¹⁹ Huesnan mester sa cu ta Yehova Dios su lei ta e lei supremo. Nan mester corda cu tur  hende, incluso huesnan, tin cu rindi cuenta na Yehova Dios y Hesucristo. (Romanonan 14:10) Pa loke ta nos, sea cu nos ricibi husticia na man di un hues humano of no, nos tin tur motibo pa demostra curashi pasobra Yehova ta apoya nos. Bijbel ta bisa: “Bendiciona ta tur esnan cu ta tuma refugio den dje.”—Salmo 2:12.

20. Dicon nos por ta felis apesar cu kisas nos tin cu soporta persecucion y calumnia?

²⁰ Den e Sermon Riba Sero, Hesus a bisa: “Bendiciona boso ta ora cu hende insulta boso y persigui boso, y ta gaña tur clase di maldad riba boso pa mi causa. Regociha y sea contento, pasobra boso recompensa den shelo ta grandi; pasobra asina nan a persigui e profetanan cu tawata prome cu boso.” (Mateo 5:11, 12) Claro cu persecucion riba su mes no ta agradabel, pero nos posicion firme apesar di persecucion, y di calumnia cu ta sali den medionan di comunicacion, ta un motibo pa nos ta contento. Esei ta nifica cu nos ta agrada Yehova y lo ricibi un recompensa. Nos posicion di curashi ta mustra cu nos tin berdadero fe y ta garantisa nos cu nos tin Dios su aprobacion. En berdad esei ta mustra cu nos tin pleno confiansa den Yehova. Anto e confiansa ei ta masha importante pa un cristian, manera e siguiente articulo lo mustra.

Kico Bo A Siña?

• Ki situacionnan awe ta exigi pa nos tin curashi?

• Con nos por haya curashi?

• Ken ta algun ehempel excelente di curashi?

• Dicon nos kier actua cu curashi?

[Preguntanan di Estudio]

[Plachi na pagina 9]

Simone Arnold (awor Liebster) na Alemania, Widdas Madona na Malawi, y Lydia y Oleksii Kurdas na Ucrania a demostra curashi y a resisti e malbado

[Plachi na pagina 10]

Nos no tin berguensa di e bon nobo

[Plachi na pagina 11]

Pablo su curashi den prizon a yuda promove e bon nobo

[Plachi na pagina 12]

Si nos tuma curashi y splica nos posicion biblico na un hues, nos ta entregando un mensahe importante