Congresonan Internacional pa Aña 2003

DIASABRA, 6 di october 2001 a tene e reunion anual di e miembronan di Watch Tower Bible and Tract Society of Pennsylvania na Jersey City, New Jersey, Merca. Despues di e reunion ei, e miembronan y nan invitadonan a disfruta di un programa special. E siguiente dia, durante un otro reunion cu nan a tene den cuater stad di Canada y Merca, e Cuerpo Gobernante di Testigonan di Yehova a haci e siguiente anuncio despues di e discurso final:

“Cu bista riba futuro, ta di sumo importancia pa ningun di nos cu ta forma parti di e pueblo di Dios no laga di bai nos reunionnan. Apostel Pablo a urgi nos pa haci esaki y tambe pa anima otro mucho mas ainda awor cu nos ta mira cu Yehova su dia grandi y inspirador di temor ta yegando serca. (Hebreonan 10:24, 25) Na harmonia cu e mandato di Bijbel aki, nos ta spera di tene nos congresonan di districto den tur parti di mundo otro aña [2002]. Anto pa aña 2003, si ta Yehova su boluntad, lo ta posibel pa nos tene congresonan internacional special den cierto region di mundo. Awor ta tempo pa keda lanta y vigila, y discerni con susesonan ta desaroya riba esena mundial.”

Aunke insiguridad y tension ta aumenta mas y mas segun cu e sistema actual ta yegando su fin, e actividad di e pueblo di Dios mester sigui padilanti. E bon nobo di Reino, incluso e mensahe di spiertamento cu Bijbel ta duna, mester ser declara na tur nacion, tribu, lenga y pueblo. Mester haci un yamada na nan pa “teme Dios y dun’e gloria, pasobra e ora di su huicio a yega.” (Revelacion 14:6, 7) Pesei, na harmonia cu nos Tata celestial su boluntad, nos ta plania pa tene congresonan internacional den varios region di mundo durante aña 2003.

Pa cuminsa, e luganan tentativo cu ta programa pa tene e congresonan aki ta algun stad na Nort America y djis despues, na Europa. Un tiki mas despues den aña 2003, lo haci areglo pa gruponan di delegado biaha bai algun stad na Asia; y pa fin di e aña otro gruponan lo bai Africa, Sur America y den e area di Lama Pacifico. Lo pidi varios sucursal pa manda un cantidad limita di delegado na cierto sitionan spesifico di congreso, pues no ta tur hende por haya invitacion pa bai. Pero pa chikito cu e delegacionnan aki ta, lo ta un animacion pa na cada luga tin representante di diferente pais.

Pronto congregacionnan di Testigonan di Yehova lo ricibi informacion relaciona cu e reunionnan aki. Nan respectivo sucursalnan lo duna informacion tocante fecha y luga exacto caminda e delegadonan invita por asisti. Pesei, nos ta pidi boso pa no skirbi ni haci pregunta tocante e asunto aki aworaki.

Finalmente, ta unicamente Testigonan dedica y batisa cu ta un bon ehempel y cu lo mustra amor fraternal na e rumannan local lo ser selecciona como delegado. Testigonan local, na nan turno, lo tin e excelente oportunidad pa duna e bishitantenan un bonbini amoroso y mustra berdadero hospitalidad na nan. (Hebreonan 13:1, 2) Tur lo por “curasha” otro. (Romanonan 1:11, 12) E sucursalnan cu haya invitacion pa manda delegado na un pais en particular of varios pais, lo duna mas detaye relaciona cu e areglo aki.

Manera ta custumber, lo haci areglo pa tene e congresonan di districto di tres dia pa aña 2003 den mayoria pais. Door di reuni hunto, tur hende lo tin oportunidad pa ‘tende, siña y ser exhorta.’ (Deuteronomio 31:12; 1 Corintionan 14:31) Esaki lo duna henter e pueblo di Dios e oportunidad pa “purba y mira cu SEÑOR ta bon.” (Salmo 34:8) Na tur congreso internacional y tambe na hopi congreso di districto lo tin misionero presente y algun di nan lo participa den e programa.

Durante e aña aki nos ta disfrutando di e Congreso di Districto “Proclamadonan Celoso di e Reino”, cu ta stimula nos pa duna mas testimonio. Segun cu nos ta haci esaki, nos espectativanan pa loke Yehova tin warda pa otro aña lo aumenta sigur. Esaki lo yuda nos ‘sigui vigila, keda lanta y duna prueba cu nos ta prepara’ durante e tempo critico y crucial aki.—Mateo 24:42-44.