Alivio pa Hende Cu Tin Hamber Ta na Caminda!

KISAS bo ta puntra: ‘Ki sorto di hamber?’ Esei ta un hamber spiritual! Un profeta Hebreo di antiguedad a profetisa di e hamber aki: “‘Mira, dianan ta bin’, SEÑOR Dios ta declara, ‘cu lo mi manda hamber riba e tera; no hamber pa pan ni sed pa awa, ma mas bien pa tende e palabranan di SEÑOR.’” (Amos 8:11) Pa yuda alivia e hamber spiritual aki, e 48 miembronan di e di 112 klas di e Scol Biblico di Galad di Watchtower, situa na Patterson, New York, ta bayendo 19 diferente pais den 5 continente y isla di lama.

Nan ta bai ekipa, no cu carni y grano literal, sino cu conocemento, experencia y preparacion. Cinco luna largo nan a participa den un studio di Bijbel intensivo diseña pa fortalece nan fe y sirbishi di misionero den teritorionan stranhero. Dia 9 di maart 2002, e 5.554 presentenan a keda encanta pa scucha e programa di graduacion.

Stephen Lett, kende ta sirbi como miembro di e Cuerpo Gobernante di Testigonan di Yehova, a cuminsa e programa cu hopi entusiasmo. El a yama tur e invitadonan cu a bini for di diferente parti di mundo bon bini na un manera special. Despues el a aplica e palabranan di Hesus, “Boso ta e lus di mundo”, na e trabou di e futuro misioneronan. (Mateo 5:14) El a splica: ‘Den boso asignacionnan boso lo “ilumina” varios aspecto di Yehova su obranan maravioso, y permiti esnan di curason honrado mira e bunitesa di Yehova y di su proposito. Ruman Lett a anima e misioneronan pa uza e lus di e Palabra di Dios pa expone e scuridad di doctrina falso y duna guia na esnan cu ta busca e berdad.

Bon Actitud Ta Vital pa Exito

Despues di e comentarionan di introduccion di parti di e presidente di programa, Baltasar Perla, miembro di e Comite di Sucursal di Merca, a duna e prome di un serie di discurso prepara pa yuda e graduadonan bira misioneronan exitoso. El a desaroya e tema “Sea Fuerte, Tene Curashi y Actua.” (1 Cronicanan 28:20) Rei Salomon di Israel di pasado a ricibi e tarea dificil di haci algo cu nunca el a yega di haci: construi un tempel den Herusalem. Salomon a pone man na obra y cu yudansa di Yehova a completa e tempel. Ruman Perla a aplica e les na e klas y a bisa: ‘Boso a ricibi un asignacion nobo, como misionero, y boso mester tin curashi y ser fuerte.’ E garantia cu Yehova lo no bandona hende tanten cu nan ta leal na dje sigur tawata un consuelo pa e studiantenan. Ruman Perla a conmove e auditorio door di conclui cu e comentario personal: ‘Boso por logra hopi como misionero. Ta misioneronan a trece e berdad pa ami cu mi famia!’

 “Acudi na Yehova pa Exito” tawata e tema di e discurso cu Samuel Herd, otro miembro di e Cuerpo Gobernante, a duna. E studiantenan ta cuminsa un carera den e obra di misionero, y nan exito ta depende pa gran parti di nan relacion cu Yehova. Ruman Herd a urgi nan: ‘Boso a acumula hopi conocemento di Bijbel atrabes di boso estudionan na Galad. Boso a ricibi cu goso. Pero awor, pa boso haya berdadero exito, boso tin cu cuminsa comparti loke boso a siña.’ (Echonan 20:35) E misioneronan lo tin hopi oportunidad pa haci esaki ora nan ta ‘basha nan mes’ na fabor di otro hende.—Filipencenan 2:17.

Ki conseho di despedida e instructornan tawatin pa e studiantenan? Mark Noumair a basa su tema riba Rut 3:18: “Warda te Ora Bo Sa Con e Asunto Ta Resulta.” Uzando e ehempel di Rut cu Noemi, e orado a anima esnan cu a gradua pa tene pleno confiansa den e areglonan cu e organisacion terenal di Dios a establece y pa respeta autoridad teocratico. Ruman Noumair a conmove e studiantenan ora el a bisa: ‘Por sosode cu bo no ta comprende pakico otronan a tuma un decision cu ta afecta bo of kisas bo ta haya ta miho pa haci un cierto cos na un otro manera. Kico lo bo haci? Lo bo lanta para y tuma asuntonan den  bo mes man of lo bo “warda” y confia den e direccion di Dios, cu e siguransa cu despues di tempo, lo E causa solamente loke ta bon?’ (Romanonan 8:28) E conseho pa ‘consentra riba promove interesnan di Reino, fiha riba loke e organisacion di Yehova ta haciendo en bes di riba diferencianan di personalidad’, sin duda lo resulta di ta balioso pa e futuro misioneronan den nan asignacion den stranheria.

Wallace Liverance, kende tawata un misionero y kende awor ta sirbi como instructor di Galad, a duna e discurso final den e prome serie di discurso. E tema di su discurso tawata “Mantene Bo Enfoke, Keda den Sirbishi di Dios.” El a mustra cu profeta Daniel a discerni for di e caida di Babilonia y for di loke Yeremias a profetisa cu e liberacion di e Israelitanan for di sclabitud tawata serca. (Yeremias 25:11; Daniel 9:2) Daniel tawata sa cu Yehova tin un tempo pa haci tur cos, y esei a yud’e mantene su enfoke riba con e proposito di Dios ta desaroya. En cambio, e Israelitanan den e tempo di profeta Hageo a bisa: “E tempo no a yega.” (Hageo 1:2) Nan no a enfoca riba e tempo den cua nan tawata biba, pero nan a cuminsa consentra riba nan mes comodidadnan y logronan personal, y a bandona e trabou pa cua nan a ser libra for di Babilonia, esta, e reconstruccion di e tempel. Ruman Liverance a conclui: “Pues, mantene boso enfoke door di corda semper riba e proposito di Yehova.”

E instructor di Galad Lawrence Bowen a sirbi como moderador di un parti cu e tema “Yehova Ta Bendiciona Esnan Cu Ta Uza e Palabra Bibo.” (Hebreonan 4:12) E parti aki a trata cu e experencianan di sirbishi cu e klas tawatin y cu a resalta con Yehova ta bendiciona esnan cu ta uza Bijbel ora di predica y siña. E moderador a mustra cu Hesucristo a pone un ehempel excelente pa tur minister di Dios: ‘Hesus tawatin rason berde ora el a bisa cu loke el a siña no a origina di dje, sino cu el a papia e Palabra di Dios.’ Hende di curason honrado a reconoce e berdad y a responde faborablemente na dje. (Huan 7:16, 17) Awe ta mescos.

Galad Ta Prepara Bo pa Tur Bon Obra

Siguientemente, miembronan di famia di Betel di hopi aña, Richard Abrahamson y Patrick LaFranca a entrevista seis graduado di Galad cu awor ta sirbiendo den otro formanan di sirbishi di tempo completo. Tawata un gran animacion pa esnan cu a gradua di e di 112 klas tende cu añanan despues, e seisnan ei, apesar di tin un otro asignacion aworaki, ainda ta beneficia di e entrenamento cu nan a ricibi na Galad en conexion cu studio di Bijbel, proyectonan di investigacion y con pa sali bon cu hende.

Theodore Jaracz, miembro di e Cuerpo Gobernante, a duna e discurso principal di e programa. E tawata titula “Loke Nos Ta Logra Ora Nos Ta Wanta Odio Satanico.” Durante e ultimo cinco lunanan, e studiantenan a biba den un ambiente teocratico di amor. Sinembargo, manera a bini dilanti den e sesionnan di klas, nos ta biba den un mundo enemigo. Rond mundo e pueblo di Yehova ta bou di atake. (Mateo 24:9) Uzando varios relato di Bijbel, ruman Jaracz a mustra cu ‘nos ta e blanco special di Diabel. Nos tin cu fortalece nos relacion cu Yehova y bira fuerte pa enfrenta prueba.’ (Job 1:8; Daniel 6:4; Huan 15:20; Revelacion 12:12, 17) Ruman Jaracz a conclui cu apesar di e odio continuo contra e pueblo di Dios, ‘ningun arma forma contra nos lo tin exito, manera Isaias 54:17 ta bisa. Yehova ta garantisa nos cu lo E libra nos na su debido tempo y manera.’

‘Bon ekipa’, e graduadonan di e di 112 klas di Galad sin duda lo contribui hopi pa alivia e hamber di alimento spiritual den e paisnan caminda nan lo bai sirbi. (2 Timoteo 3:16, 17) Nos tin masha gana di tende despues con nan ta proclama e mensahe nutritivo na e poblacionnan den e paisnan aki.

[Cuadro na pagina 23]

ESTADISTICANAN DI E KLAS

Cantidad di pais representa: 6

Cantidad di pais na cua a asigna nan: 19

Cantidad di studiante: 48

Edad promedio: 33,2

Promedio di aña den e berdad: 15,7

Promedio di aña den sirbishi di tempo completo: 12,2

[Plachi na pagina 24]

E di 112 Klas di Graduadonan di e Scol Biblico di Galad di Watchtower

Den e lista aki bou, e reinan ta numera di dilanti bai patras, y e nombernan ta bai di robes pa drechi den cada rei.

(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.