Glorificando Dios den e Seronan di Filipinas

Bo tin rason si bo ta pensa cu Filipinas ta un grupo di isla. Pero tambe e ta un pais cu seronan impresionante. Testigonan di Yehova por a predica relativamente facil y eficas den stad- y areanan cu tereno plat. Sinembargo, e situacion den e region di seronan ta diferente.

E SERONAN magnifico di e pais aki ta forma un contraste skerpi cu e beachnan di santo, e refnan di coral, e pueblitonan di piscado y stadnan druk den e areanan plat di e islanan. Ademas e seronan ta forma un obstaculo grandi pa e predicacion di e bon nobo, e “evangelio” di e Reino di Dios.—Mateo 24:14.

E Islanan di Filipinas ta situa na un sitio caminda dos plachi tectonico ta dal den otro. * E presion den e area aki a forma lombanan di seronan stijl riba e islanan mas grandi. Mas cu 7.100 isla, cu ta forma e pais Filipinas, ta situa riba e curva west di e Renchi di Candela den Oceano Pacifico, caminda tin mas cu mita di e volcannan na mundo. Pues, e islanan tin hopi volcan, y esei tambe ta contribui na e formacion di e paisahe yen di sero. E seronan stijl y yen di mondi a pone cu e hendenan cu ta biba den sero a keda isola. Ta dificil pa yega cerca nan pasobra masha poco di nan camindanan ta adecua pa auto core ariba.

Apesar di tur e obstaculonan ei, Testigonan di Yehova ta conciente cu nan mester yega cerca “tur hende.” (1 Timoteo 2:4) Pesei, e Testigonan na Filipinas a actua na harmonia cu e nificacion di Isaias 42:11 y 12: “Laga e habitantenan di Sela [baranca stijl, NW] canta duro, laga nan grita di goso for di cabes di e seronan. Laga nan duna gloria na SEÑOR, y declara su alabansa den e teranan na costa.”

Mas cu 50 aña pasa nan a cuminsa haci esfuerso intenso pa predica na hende cu ta biba den e seronan. Despues di Segunda Guera Mundial, misioneronan a yuda duna un empuhe na e trabou. Hopi habitante local a acepta e  berdad di Bijbel y nan, na nan turno, a yuda plama e berdad aki den e pueblitonan te leu den e seronan. Esaki tawatin resultadonan excelente. Por ehempel den e Seronan di Cordiyera Central di nort Luzon, tin mas cu 6.000 publicado di e bon nobo. Mayoria di nan ta hende local, cu ta bini entre otro di e pueblonan Ibaloi, Ifugao y Kalinga.

Sinembargo, ainda tin areanan den sero cu ta dificil pa yega na dje. E Testigonan no a lubida riba e hendenan cu ta biba einan. Con nan a alcansa algun di nan, y kico tawata e reaccion?

Berdadero Fe Ta Remplasa Tradicion

Riba e isla Luzon cu ta keda na e parti nort, e pueblo Tinggiano ta biba den e areanan di sero di e provincia Abra. E nomber di e pueblo aki ta bini di e palabra antiguo na idioma Malayo, tinggi, cu ta nifica “sero.” Un nomber cu ta pas hopi bon! Tambe e pueblo ta yama nan mes y nan idioma Itneg. Nan ta kere den un dios cu yama Kabunian, y supersticion tin hopi influencia riba nan bida diario. Por ehempel, si un persona cu ta plania pa bai un caminda nister, esei ta un mal señal. E tin cu warda un par di ora pa e mal influencia kita.

Na 1572, e Spañonan a introduci catolicismo, pero nan no a siña e Tinggianonan berdadero cristianismo. E hendenan cu a bira catolico a sigui kere den Kabunian y a sigui nan custumbernan local. Conocemento exacto di Bijbel a yega na e hendenan aki ora cu den añanan ’30 di siglo 20, Testigonan di Yehova a cuminsa plama e mensahe di Reino den e seronan ei. Di e tempo ei en adelante, hopi Tinggiano sincero a cuminsa glorifica Yehova “for di cabes di e seronan.”

Por ehempel, Lingbaoan tawata un lider di tribu respeta den e area. E tawata hopi envolvi den e cultura Tinggiano. E ta conta: “Mi tawata sigui e tradicionnan Tinggiano fielmente.  Ora un persona ser asesina, despues di entiero nos tawata balia y bati clok. Tambe nos tawata sacrifica bestia. Nos a kere den Kabunian, y mi no tawata conoce e Dios di Bijbel.” Esaki tawata e caso apesar di e echo cu e tawata un catolico pa nomber.

Testigonan di Yehova a bin predica den e area ei. Nan a topa cu Lingbaoan y a anim’e pa lesa Bijbel. E ta corda: “Ta Bijbel a combence mi cu Yehova ta e Dios berdadero.” Anto un Testigo a studia Bijbel cu Lingbaoan, y el tuma e decision di sirbi e Dios berdadero. El a leumai su procedernan di antes, incluso su posicion como lider di tribu, un paso cu a pone e sacerdote local y su examigonan rabia masha. Sinembargo, Lingbaoan tawata determina pa sigui e berdad cu el a haya den Bijbel. Awor e ta sirbi como un anciano di congregacion.

Shete Dia y Seis Anochi

Aunke actualmente tin cierto partinan di Abra cu ta tende e bon nobo regularmente, tin otro partinan hopi aisla cu ta de bes en cuando so Testigonan ta bishita. Algun tempo pasa nan a haci un esfuerso pa yega na un di e areanan aki. Un grupo di 35 Testigo a sali pa bai predica na Tineg, Abra, un teritorio cu no tawata asigna na ningun congregacion. E tawata un sitio cu nan tawatin 27 aña sin bishita.

Nan a cana shete dia pa haci e biahe aki. Imagina bo ta crusa brugnan traha di cabuya y riunan hundo, y cana oranan largo, subi y baha sero cu bo ekipahe carga. Tur e esfuerso aki ta pa predica e bon nobo na hende cu masha poco bes ta tend’e! Cuater di e seis anochinan, nan a drumi na aire liber den sero.

Maske e Testigonan fuerte cu a haci e biahe a bai cu algun cuminda, nan no por a carga suficiente cuminda pa henter e biahe. Pero esaki no tawata un problema pasobra e pueblo tawata masha contento di por a cambia cuminda pa publicacionnan basa riba Bijbel. E Testigonan a ricibi hopi producto di cunucu, pisca y carni di bina. Aunke nan a haya nan cu algun incumbiniencia, e grupo a bisa: “E gran goso cu nos a experencia a compensa tur e sacrificionan aki.”

Durante e shete dianan, e rumannan aki a predica den dies pueblito y a laga 60 buki, 186 revista, 50 foyeto y hopi tratado. Nan a duna 74 grupo di hende demostracion di un studio di Bijbel. Den e stad Tineg, riba peticion di funcionarionan local y algun ciudadano prominente, nan a tene un reunion di congregacion na cua 78 persona a asisti. Mayoria di e personanan cu a asisti tawata maestro di scol y polis. Nos ta spera cu mas Tinggiano lo join e personanan aki cu ta “canta duro” y alaba Yehova for di cabes di e seronan.

Algu Miho cu Oro

Mas den suit di Filipinas tin algun isla caminda e Spañonan a haya oro. Esaki a pone cu a surgi e nomber Mindoro, un contraccion di e palabranan Spaño mina de oro. Sinembargo, actualmente e Testigonan ta hayando algo miho cu oro riba e islanan aki: hende cu kier sirbi e Dios berdadero, Yehova.

Rond di 125.000 nativo cu yama Mangyan ta biba leu den interior di e selvanan di Mindoro. Nan ta hiba un bida simpel y tin masha poco contacto cu hende pafo di nan pueblo,  y nan tin nan propio idioma. Mayoria di nan ta animista y politeista, es decir, nan ta kere cu obhetonan natural tin bida conciente y ta adora hopi dios. Tambe nan ta kere cu tin varios ser sobrenatural.

De bes en cuando ora nan no tin cuminda of falta otro cos, Mangyannan individual ta baha bai na e areanan cant’i costa pa busca trabou. Esaki tawata e caso cu Pailing, cu ta bini di un grupo secundario di Mangyan cu yama Batangan. El a crece entre su pueblo aya den e selvanan den sero, y tawatin e creencia- y practicanan di Batangan. Nan paña di bisti ta un simpel lapi rond di nan hep. Pa garantisa un bon cosecha, segun e tradicion Batangan, e adoradonan mester mata un galiña y laga su sanger lek den awa mientras nan tawata haci oracion.

Pailing no ta sigui e tradicionnan ei mas. Dicon no? Ora a el a bai den e areanan plat, el a haya trabou cerca famianan Testigo di Yehova. Un di e famianan aki a probecha di e oportunidad pa papia cu Pailing tocante e berdad di Bijbel. El a reacciona bon y a echt aprecia loke e tawata siña tocante e proposito cu Yehova tin pa hende y e tera. Nan a haci areglo pa e bai scol basico y tambe haya un studio di Bijbel. Ora Pailing tawatin 24 aña el a batisa como un Testigo di Yehova. Ora e tawatin 30 aña e tawata den su di dos aña di scol secundario, y el a haci e scol su teritorio pa predica. Awor nan ta yam’e Rolando (un nomber cu nan ta uza den e areanan plat).

Ora bo topa Rolando, bo ta haya bo cu un yoncuman sonriendo, bon bisti, y cu ta sirbi como un predicado full-time y como sirbido ministerial den un congregacion na Mindoro. Resientemente Rolando a bai bek den e seronan, no pa join e pueblo Batangan den nan tradicionnan, sino pa comparti cu nan e berdad di Bijbel cu ta duna bida.

Ansioso pa Haya un Salon di Reino

E provincia Bukidnon—cu na idioma Cebuano ta nifica “Hende di Sero”—ta situa riba e isla den suit cu yama Mindanao. Esaki ta un area yen di sero, kloofnan hundo, vayenan di riu y plateau. E tereno fertil ta produci cosecha di anasa, maishi, cofi, aros y bacoba. Ei e tribunan di sero, Talaandig y Higaonon ta biba. E hendenan aki tambe mester siña di Yehova. Resientemente, e oportunidad aki a habri di un manera masha interesante den bicindario di e stad Talakag.

E Testigonan cu a subi e seronan a haya un temperatura friu, pero un bon bini caloroso. E pueblo local tawata bisa cu nan ta kere den e Dios todopoderoso, e Tata, pero nan no tawata sa su nomber. Door cu nan ta pasa mayoria di nan tempo den selva, tawata e prome bes cu nan a topa cu Testigonan di Yehova. E Testigonan a siña nan e nomber di Dios y tambe e proposito maravioso cu Dios tin relaciona cu e Reino. E pueblo a keda encanta, pues e Testigonan a dicidi cu mester bishita e pueblo aki mas biaha.

Varios bishita a sigui. Como resultado, e habitantenan local a ofrece un sitio como un “cas” di Testigonan di Yehova. Contento e Testigonan a acepta e oferta. Tawata un sitio riba top di e sero mas halto den e area, for di cua bo por a wak e caminda. Nan a construi e edificio cu palo, bambu y blachi di palma. Nan a completa e proyecto aki den tres luna y dies dia. E borchi “Salon di Reino di Testigonan di Yehova” ta resalta dilanti e edificio. Imagina bo, nan a traha un Salon di Reino prome cu nan a forma un congregacion!

Desde e tempo ei un anciano cu ta predicado full-time y tambe un sirbido ministerial a muda bai einan. Hunto cu Testigonan den e area, nan a traha cu e meta pa forma un congregacion. Esaki a bira realidad na augustus 1998. Actualmente un congregacion chikito ta haci pleno uzo di e Salon di Reino aki, yudando hendenan cu ta biba den sero pa siña e berdadnan di Bijbel.

Si, di un manera poderoso Yehova a uza su sirbidonan dispuesto na Filipinas pa plama e berdad di Reino asta den e seronan cu ta dificil pa alcansa. Esaki ta haci nos corda Isaias 52:7, cu ta bisa: “Ki bunita riba e seronan ta e pianan di esun cu ta trece bon nobo.”

[Nota]

[Mapa na pagina 11]

(Pa texto den su formato completo, wak publicacion)

ABRA

MINDORO

BUKIDNON

[Reconocemento]

Globo: Mountain High Maps® Copyright © 1997 Digital Wisdom, Inc.

[Plachinan na pagina 10]

Predica den e seronan ta nifica cana oranan largo door di mondi y terenonan stijl

[Plachi na pagina 10]

Bautismo den un riu den sero