E Palo Cu Ta “Yora” y Su “Lagrimanan”

‘Trece balsamo pa dolo’, Jeremias 51:8 ta bisa. Pa haya sa di unda e substancia relahante y sumamente curativo aki ta bini, nos tin cu bai entre otro na e isla di Kios, den Lama Egeo.

NA PRINCIPIO di zomer, cunukeronan na Kios ta prepara pa cosecha di un manera straño. Despues cu nan caba di bari rond di e matanan cu ta produci gom (hars) y cu semper ta berde, nan ta traha un capa di klei blanco. Despues e cunukeronan ta skerf e casca di e palo y pone esaki “yora.” “Lagrimanan” palido di gom ta cuminsa lek for di e palo. Despues di dos of tres siman, e gotanan di gom ta cuaha y e cunukero ta pasa recohe nan, sea directamente for di e troncon of for di riba e capa di klei abou. Cu e “lagrimanan” di gom aki nan ta traha balsamo.

Pero prome cu cosecha, pasenshi y trabou duro ta necesario. E troncon shinishi tur troci ta crece masha pocopoco mes. Ta dura 40 pa 50 aña prome cu e palo crece completamente; normalmente e ta yega 2 te 3 meter.

Fuera di skerf e tronconnan y recohe e “lagrimanan”, mas trabou ta necesario pa produci gom. Ora e cunukeronan caba di recohe e “lagrimanan” di gom, nan ta separa e mihonan, laba nan y sortia nan segun nan tamaño y calidad. Despues, nan ta limpia e gom un biaha mas, anto e ora ei por uz’e pa diferente cos.

Historia di un Mata Precioso

E palabra Griego pa “gom” ta relaciona cu un termino cu ta nifica ‘morde riba djente.’ E nomber aki ta indica cu for di hopi tempo pasa, a uza gom como bals pa refresca aliento.

E informacion mas bieu tocante gom ta bin di Herodoto, historiado Griego di siglo 5 prome cu Era Comun. Otro autornan y docternan di pasado—manera Apolodoro, Dioscorides, Teofrasto y Hipocrates—a menciona e uzo medicinal di gom. Maske palo cu ta produci gom ta crece cant’i henter e costa Mediteraneo, casi ta Kios so ta procesa gom desde aña 50 E.C. Y gom tawata e cos cu mas a interesa esnan cu a conkista Kios: prome e Romanonan, despues e Genovesnan, anto mas despues e Ottomannan.

Uzo Amplio di Gom

Antes docternan Egipcio tawata uza gom pa varios malesa manera diarea y artritis. Tambe  nan tawata uz’e como sencia y pa balsama cadaver. Kisas ta for di e palo aki entre otro tawata saca ‘enguente di Galad’, bon conoci den Bijbel pa su efecto curativo y pa su uzo den cosmetica y como balsamo. (Jeremias 8:22; 46:11) Tin hende asta ta pensa cu tal bes e palo cu ta produci un specerij dushi ta pertenece na e famia di palonan cu ta produci gom. E specerij dushi ei ta un di e ingredientenan di e sencia santo perfuma cu nan a uza solamente pa cosnan sagrado.​—⁠Exodo 30:​34, 35.

Awendia bo por haya gom den vernis pa proteha pintura traha cu ferf di zeta, mueblenan y instrumentonan musical. E ta ser uza como material waterproof y di isolacion, y tambe nan ta consider’e como un di e miho productonan pa conserva colo di paña y pintura artistico. Tambe ta uza gom den lijm y pa duna cuero colo. Door cu e ta hole dushi y tin otro caracteristicanan, ta uza gom den habon, cosmetica y perfume.

Gom ta riba 25 lista oficial di remedi rond mundo. Ainda e mundo Arabir ta uz’e hopi den remedi tradicional. Ademas bo ta hay’ele den plom di djente y den e capa interior di capsula di remedi.

Como fuente di balsamo, e “lagrimanan” di e palo di gom cu ta “yora” y cu tin diferente uzo, a trankilisa y cura hende pa siglonan caba. Ta na su luga anto cu Jeremias su profecia ta bisa: ‘Tuma enguente di Galad pa dolo.’

[Plachi na pagina 31]

Kios

Cosechando gom

Ta recohe “lagrimanan” di gom cuidadosamente

[Reconocemento]

Kios y arte di cosecha: Cortesia di Korais Library; tur otro: Kostas Stamoulis