TOPICO PRINCIPAL | BIJBEL SU STORIA DI SOBREVIVENCIA
Bijbel A Keda Conserva
E PELIGER: E escritor- y copistanan di Bijbel a skirbi riba materialnan manera papiro y percament. * (2 Timoteo 4:13) Con e materialnan ey a pone Bijbel su sobrevivencia na peliger?
Papiro ta kibra, perde color y bira fini hopi lihe mes. Richard Parkinson y Stephen Quirke, expertonan cu a studia e civilisacion Egipcio, a bisa cu “un papel di papiro cu tempo por bira un skelet di fibra y caba na stof.” Nan a sigui bisa: “Ora bo warda un rol di papiro, humedad por lag’e haya beskem of putri, y si e ta bou di tera, djaca of insecto, vooral fruminga blanco, por com’e.” Despues cu hende a descubri algun papiro, algun di nan a haya mucho luz of humedad, y como resultado, nan a daña mas lihe.
Percament ta mas duradero cu papiro, pero e tambe ta daña si no trat’e bon of si e keda exponi na temperatura extremo, demasiado humedad of luz. * Anto, insecto tambe por destrui percament. E buki Everyday Writing in the Graeco-Roman East ta bisa cu no ta comun pa manuscritonan antiguo keda conserva pa un tempo largo. Pues si Bijbel tambe lo a caba na nada, su mensahe lo a bay perdi.
CON BIJBEL A SOBREVIVI: E Ley Hudiu a manda tur rey “skirbi pa [nan] mes un copia di e ley aki riba un rol”, esta, e prome cinco bukinan di Bijbel. (Deuteronomio 17:18) Ademas, copistanan profesional a traha asina tanto copia di e manuscritonan cu den e prome siglo tabatin copia di e Scritura den e sinagoganan tur rond di Israel y hasta te na Macedonia. (Lucas 4:16, 17; Echonan 17:11) Con algun di e manuscritonan bieu ey a logra sobrevivi te awe?
E manuscritonan conoci como e Rolnan di Lama Morto a sobrevivi pa siglonan den purunnan di klei cu hende a warda den cuebanan den region seco
Philip W. Comfort, un experto riba tereno di e Testament Nobo, a bisa: “E Hudiunan tabatin custumber di warda rolnan di e Scritura den canica of purun pa preserva nan.” Evidentemente, e cristiannan a sigui e tradicion ey. Pesey, algun di e prome manuscritonan di Bijbel a ser descubri den purun di klei, den luga scur, den cueba y den regionnan hopi seco.
E RESULTADO: Miles di fragmento di manuscrito di Bijbel, algun di nan mas cu 2.000 aña bieu, a sobrevivi te dia di awe. Niun otro texto di antiguedad tin asina tanto manuscrito di asina tanto tempo pasa.
^ par. 3 Papiro ta un material pa skirbi riba dje cu hende ta traha di un mata di awa cu tin e mesun nomber. Percament ta traha di cuero di bestia.
^ par. 5 Por ehempel, e acta oficial firma di e Declaracion di Independencia di Merca a ser skirbi riba percament. Awor, menos cu 250 aña despues, el a bira asina dof cu casi hende no por les’e mas.
You May Also Like
E TOREN DI VIGILANCIA
Un Joya di Antiguedad den un Monton di Sushi
E fragmento di Rylands di e Evangelio di Juan ta e fragmento di mas bieu di e Scritura Griego Cristian cu hende a yega di haya.
E TOREN DI VIGILANCIA
Un Tesoro Scondi pa Hopi Siglo
Lesa con a descubri e traduccion di Bijbel di mas bieu na idioma Georgiano.
