UN REGALO extraordinario mester motiva nos pa expresa nos gratitud. Hesus a enfatisa esey despues cu el a cura dies homber di un maleza teribel cu pa e tempo ey no tabatin cura ainda. Un di e dies hombernan ey “a bira bin bek y tabata glorifica Dios na bos halto.” Hesus a bisa: “No ta tur dies a cura? Unda e otro nuebenan a keda?” (Lucas 17:12-17) Kico nos por siña for di esey? Wel, cu masha lihe nos por lubida e obranan di bondad cu otro hende ta haci pa nos.

E rescate ta un regalo unico. E ta e mihor regalo cu nos a yega di ricibi. Pues, kico e regalo aki mester motiva nos pa haci?

• Siña conoce e Persona cu a duna e regalo aki. E rescate no ta duna hende bida eterno automaticamente. Mas bien, Hesus a bisa Dios den oracion: “Pa haya bida eterno, nan tin cu siña conoce bo, e unico Dios berdadero, y esun cu bo a manda, Hesucristo.” (Juan 17:3) Si un hende bisa bo cu un persona a salba bo bida tempo bo tabata  mucha, lo bo no ta interesa pa siña mas di e persona ey y haya sa dicon el a salba bo bida? Jehova Dios, kende a duna e regalo di e rescate cu por salba bida, kier pa bo siña conoc’e y forma un amistad cera cu ne. Bijbel ta anima nos: “Hala cerca Dios, y lo e hala cerca boso.”—Santiago 4:8.

• Pone fe den e rescate. Bijbel ta bisa: “Esun cu pone fe den e Yiu lo haya bida eterno.” (Juan 3:36) Kico kiermen pone fe? E ta nifica cu nos mester haci algo; nos mester demostra nos fe den e rescate mediante obra. (Santiago 2:17) Ki tipo di obra? Un regalo ta bira di bo solamente ora bo saca bo man pa acept’e. Pues, bo mester “saca bo man” y acepta e rescate. Con? Wel, esey ta di siña con Dios kier pa bo biba y aplica loke bo ta siña. * Pidi Dios pa e pordona bo picanan y duna bo un consenshi limpi. Acudi na dje cu tur confianza cu e rescate ta garantisa un futuro eterno di paz, siguridad y prosperidad pa tur hende cu pone fe den dje.—Hebreonan 11:1.

• Asisti na e Conmemoracion di e morto di Hesus. Hesus a establece un evento anual pa recorda nos di e provision di e rescate. Relaciona cu e evento ey, el a bisa: “Sigui haci esaki na mi memoria.” (Lucas 22:19) Testigonan di Jehova lo conmemora e morto di Hesus riba diamars 11 di april 2017, despues cu solo baha. E reunion lo dura mas o menos un ora y ta inclui un discurso cu lo splica e importancia di e morto di Hesus y con e ta trece bendicion awor y den futuro pa nos. Aña pasa, mas o menos 20 miyon hende rond mundo a asisti na e Conmemoracion. Nos ta invita bo pa join nos y mustra bo gratitud pa Dios su regalo di mas grandi.