ALGUN HENDE TA BISA CU NO. Un dokter a bisa cu ora bo uza Bijbel como un guia den bo bida, ta mescos cu si bo uza un buki di aña 1920 pa duna les di scheikunde. Un hende cu no ta kere den Bijbel por hasta puntra si lo bo uza un manual di un computer bieu y daña pa sa con pa traha cu un computer nobo. Cu otro palabra, algun hende ta haya cu Bijbel ta sumamente ouderwets.

Dicon un hende lo kier uza un buki bieu asina den un mundo super moderno y di tecnologia sofistica? Al fin y al cabo, awendia tin masha tanto website y blog cu ta duna tur tipo di conseho y guia. Na television mes tin yen di experto y talk show caminda psicologonan experto, gurunan di estilo di bida y escritornan ta duna conseho tocante con pa mehora bo bida. Y boekhandelnan ta bende un cantidad di buki pa bo mehora bo bida, locual a bira un industria multimiyonario.

Cu tanto informacion actualisa disponibel ki ora cu bo kier, pakico un hende lo acudi na Bijbel, un buki cu hende a completa casi 2.000 aña pasa? Acaso hende cu no ta kere den Bijbel tin rason di bisa cu si bo uza un buki bieu asina como guia den bida ta mescos cu si bo uza un buki ouderwets di scheikunde of di computer? Eigenlijk, e comparacion ey no ta cuadra. Ciencia y tecnologia ta cambia lihe, pero naturaleza humano a cambia? Ainda hende kier compronde e nificacion di bida, haya un grado di felicidad y siguridad, disfruta di bon relacion cu famia y haya bon amigo.

Pa bieu cu Bijbel por ta, e ta ofrece guia encuanto e necesidadnan ey y hasta mas. Bijbel ta bisa tambe cu ta nos Creador a inspira hende pa skirbi Bijbel. E buki aki ta duna nos guia den tur aspecto di nos bida y e ta ekipa nos pa enfrenta cualkier dificultad. (2 Timoteo 3:16, 17) Es mas, Bijbel tin conseho cu semper ta al caso, conseho cu nunca ta bira ouderwets. Bijbel mes ta bisa: “E palabra di Dios ta bibo.”—Hebreonan 4:12.

Pero loke Bijbel ta bisa ta berdad? E ta un buki ouderwets, of e ta e buki di mas practico cu nos por uza awe? E Toren di Vigilancia aki ta e prome edicion di un serie di edicion special cu tin como meta pa yuda bo haya contesta pa e preguntanan aki.