HOPI mamifero of zoogdier di awa friu tin un capa diki di vet bou di nan cuero pa yuda tene nan curpa cayente. Pero zeeotter of nutria di lama tin un otro metodo pa tene su curpa cayente: su lana diki.

Pensa un rato riba lo siguiente: E lana di zeeotter ta mas diki cu di cualkier otro mamifero. Nan tin 155.000 cabey pa cada centimeter cuadra. Ora un zeeotter ta landa, su curpa ta retene un capa di aire entre su lana y su cuero. E aire ta tene su curpa cayente ya cu awa friu no por mishi cu su cuero.

Cientificonan ta pensa cu nos por siña hopi di e zeeotter su lana. Nan a test jas cu lana artificial di diferente largura y distancia for di otro pa check cua ta tene cayente mihor. Investigadornan a yega na e conclusion cu “mas cerca di otro e cabeynan ta y mas largo nan ta, mas seco e cabeynan ta keda.” Na moda di papia, zeeotter por gaba cu e tin un capa di lana masha eficiente mes.

Investigadornan ta spera cu nan estudionan lo yuda nan diseña y produci tela nobo cu no ta laga awa pasa door di dje. Kisas esaki ta pone cu algun hende ta cuminsa puntra si no ta mas mihor pa hende cu ta dive den awa friu bisti wet suit cu lana mescos cu di zeeotter.

Kico bo ta pensa? E lana di zeeotter cu ta tene su curpa cayente a bin di evolucion of di creacion?