Pronto e Reino di Dios—un gobierno mundial cu Dios a establece—lo trece paz y union aki riba Tera. Manera Salmo 72:7 ta priminti, lo “tin abundancia di paz.” Pero na ki tempo e Reino di Dios lo cuminsa goberna Tera? Con e Reino di Dios lo goberna? Y con abo por beneficia di e Reino di Dios?

Bijbel a profetisa un serie di suceso impactante cu ta forma parti di un “señal” cu ta indica cu e Reino di Dios lo cuminsa goberna pronto. Algun di e sucesonan aki ta guera, hamber, maleza, hopi temblor y aumento di maldad.—Mateo 24:3, 7, 12; Lucas 21:11; Revelacion 6:2-8.

Un otro profecia ta bisa: “Den e ultimo dianan lo bini temponan critico, dificil pa trata cu ne. Pasobra hende lo stima nan mes, stima placa; nan lo ta ... desobediente na mayornan, malagradecido, desleal, sin cariño; nan lo no ta dispuesto pa cera ningun acuerdo; nan lo ta calumniador, sin dominio propio, feroz, sin amor pa loke ta bon, ... hincha di orguyo, cu ta stima placer en bes di stima Dios.” (2 Timoteo 3:1-4) Semper tabatin algun hende asina, pero no hopi manera awor.

E profecianan ey a cuminsa cumpli na 1914. Hasta historiadornan, politiconan y escritornan a comenta con mundo a cambia djey padilanti. Por ehempel, e historiador Danes Peter Munch a skirbi: “E guera cu a cuminsa na 1914 a trece un cambio grandi den historia di humanidad. For di un epoca briyante di progreso, ... nos a drenta un epoca di desaster, horor y odio, cu insiguridad tur caminda.”

Pero e bon ta cu despues di un tormenta ta bin trankilidad. E señal cu nos a menciona ta mustra cu e Reino di Dios pronto lo goberna Tera. Hesus a menciona cu e señal lo inclui un suceso positivo. El a bisa: “E bon noticia aki di e Reino lo ser predica den henter e Tera habita, como testimonio pa tur nacion, anto e fin lo yega.”—Mateo 24:14.

E bon noticia ey ta e tema principal di e mensahe di testigonan di Jehova. Pesey nan revista principal yama E Toren di Vigilancia Anunciando e Reino di Jehova Dios. E ta papia tocante tur e cosnan maraviyoso cu e Reino di Dios lo haci pa humanidad y pa Tera.

Ban considera cuater suceso importante cu lo contesta e pregunta ey:

1. Ningun di e lidernan politico di mundo lo no forma parti di e Reino di Dios.

2. E lidernan politico di mundo lo no kier entrega nan poder y lo bringa contra e Reino di Dios. Nan lucha lo ta inutil.—Salmo 2:2-9.

3. E Reino di Dios lo destrui tur gobierno cu kier sigui domina hende. (Daniel 2:44; Revelacion 19:17-21) E delaster conflicto mundial aki yama Armagedon.—Revelacion 16:14, 16.

4. Tur esnan cu kier biba bou di e Reino di Dios lo sobrevivi Armagedon y lo biba den un mundo nobo caminda lo tin paz. Bijbel ta bisa cu nan lo forma parti di “un multitud grandi” cu probablemente lo consisti di miyones di hende.—Revelacion 7:9, 10, 13, 14.

Un di e prome cosnan cu nos mester di dje pa nos bira subdito di e Reino di Dios ta conocemento. Pesey ora Hesus a haci oracion na Dios, el a bisa: “Pa haya bida eterno, nan tin cu siña conoce bo, e unico Dios berdadero, y esun cu bo a manda, Hesucristo.”—Juan 17:3.

Ora nos siña conoce Jehova Dios como Persona, nos ta beneficia den hopi manera. Ban considera dos di nan. Prome, nos ta haya un fe firme den Dios. Un fe cu ta basa riba evidencia ta convence nos cu e Reino di Dios ta un realidad y cu pronto lo e cuminsa goberna. (Hebreonan 11:1) Di dos, nos amor pa Dios y pa nos prohimo lo bira mas fuerte. Amor pa Dios ta motiva nos pa obedec’e di curason y amor pa prohimo ta motiva nos pa aplica loke Hesus a yama e Regla di Oro. El a bisa: “Manera boso kier pa hende haci cu boso, boso mester haci mescos cu nan.”—Lucas 6:31.

Mescos cu un tata amoroso, nos Creador kier lo mihor pa nos. Manera Bijbel ta bisa, Jehova kier pa nos haya “loke realmente ta bida.” (1 Timoteo 6:19) E bida ey no ta loke nos tin awe. Pa miyones di hende, bida ta un lucha. Pa nos por tin un idea con bida ta bay ta den futuro, ban wak algun di e cosnan maraviyoso cu e Reino di Dios lo haci pa su subditonan.