“SPERANSA TA ... ALGO ESENCIAL PA UN HENDE POR TIN UN BON RELACION CU DIOS”, e buki Hope in the Age of Anxiety ta bisa. “Y e ta e mihor remedi pa vence sintimentonan di impotencia, soledad y miedo.”

Bijbel ta reconoce cu hende tin mester di speransa, pero e ta duna spiertamento tambe encuanto speransa falso. Salmo 146:3 ta bisa: “No confia den prinsnan, den yiu di hende, den kende no tin salbacion.” En bes di pone confianza den hende pa salba nos, ta mihor pa nos pone confianza den nos Creador ya cu e tin poder pa cumpli cu tur su promesanan. Kico el a priminti? Laga nos ban wak.

LO NO TIN MALDAD MAS, Y HENDE HUSTO LO TIN PAZ PA SEMPER: Salmo 37:10 y 11 ta bisa: “Aki poco tempo e malbado lo no t’ey mas ... Ma e humildenan lo hereda e Tera, y lo deleita nan mes den paz abundante.” Y versiculo 29 ta bisa cu “e hustonan lo ... biba ... pa semper” riba Tera.

LO NO TIN GUERA MAS: “[Jehova] ta haci gueranan stop te na e fin di Tera; e ta kibra boog y ta corta lansa na dos; e ta kima e garoshinan cu candela.”—Salmo 46:8, 9.

LO NO TIN MALEZA, SUFRIMENTO NI MORTO MAS: “[Dios lo] seca tur lagrima for di nan wowo, y lo no tin morto mas; ni tristeza ni sclamacion ni dolor lo no tin mas.”—Revelacion 21:3, 4.

LO TIN ABUNDANCIA DI CUMINDA PA TUR HENDE: “Lo tin abundancia di maishi den e Tera, riba cabes di e seronan.”—Salmo 72:16.

LO TIN UN GOBIERNO HUSTO PA HENTER E TERA: E REINO DI CRISTO: “Na [Hesucristo] a wordo duna dominio, gloria y un reino, pa tur pueblo, nacion y hende di tur idioma por sirbie. Su dominio ta un dominio eterno cu lo no pasa nunca, y su reino ta un cu lo no wordo destrui.”—Daniel 7:14.

Dicon nos por tin sigur cu e promesanan aki lo cumpli? Ora Hesus tabata riba Tera, el a demostra cu e ta capacita pa bira Rey. El a cura hende malo, alimenta hende pober y el a resucita hende morto. Pero mas importante ainda, el a siña hende principionan cu lo yuda nan biba den paz y union pa semper. Ademas, Hesus a predeci loke lo sosode den futuro, entre otro algun suceso cu ta indica cu nos ta bibando den e ultimo dianan.

Hesus no a predeci cu durante e ultimo dianan paz y siguridad lo reina; el a predeci net lo contrario. E señal cu el a duna “di conclusion di e era aki” ta entre otro guera internacional, hamber, epidemia y temblornan grandi. (Mateo 24:3, 7; Lucas 21:10, 11; Revelacion 6:3-8) Hesus a bisa tambe: “Pa motibo di aumento di maldad, amor di mayoria di hende lo fria.”—Mateo 24:12.

Na varios cos bo por ripara cu amor di hende a fria. Esey ta exactamente loke un escritor di Bijbel a predeci na 2 Timoteo 3:1 pa 5. Eynan nos ta lesa cu “den e ultimo dianan” mayoria di hende lo pensa solamente riba nan mes, riba placa y placer. Nan lo ta arogante y violento. Famianan lo no tin cariño pa otro y yiunan lo no tende di nan mayornan. Y hopi hende lo haci comosifuera nan ta masha religioso.

E tormenta cu, na moda di papia, nos ta pasando aden ta proba cu nos ta bibando den e ultimo dianan. Y tambe loke nos ta pasando aden ta proba cu e calma, of e paz y trankilidad, cu e Reino di Dios lo trece ta cerca. Hesus a duna nos e siguransa ey ora el a profetisa lo siguiente: “E bon noticia aki di e Reino lo ser predica den henter e Tera habita, como testimonio pa tur nacion, anto e fin lo yega.”—Mateo 24:14.

Pa hende malbado, e bon noticia aki ta un spiertamento, y pa hende husto, e ta un siguransa cu e promesanan di Dios lo bira realidad. Abo kier haya sa mas encuanto e promesanan ey? Si ta asina, nos ta anima bo pa lesa e ultimo pagina di e revista aki.