BO TA mira e streya briyante cu e homber ta mustra riba dje? Ora nan a sali for di Jerusalem, e streya a aparece. E hombernan a bini di Oriente, y nan ta studia streya. Nan ta kere cu e streya nobo aki ta guia nan cerca un persona importante.

Ora nan a yega Jerusalem, nan a puntra: ‘Unda e mucha cu lo bira rei di Hudiunan ta?’ “Hudiu” ta un otro nomber pa Israelita. E hombernan a bisa: ‘Nos a mira e streya di e mucha ora nos tabata na Oriente y nos a bini pa rindie homenahe.’

Ora Herodes, cu tabata Rei na Jerusalem, a tende esei el a bira hopi nervioso. E no tabata kier pa un otro rei tuma su luga. P’esei Herodes a yama e sacerdotenan principal y a puntra nan: ‘Unda e rei priminti tin cu nace?’ Nan a contesta: ‘Na Betlehem, segun Bijbel.’

P’esei Herodes a yama e hombernan di Oriente y a bisa nan: ‘Bai busca e mucha. Ora boso hay’e, laga mi sa. Mi tambe kier bai rindie homenahe.’ Pero, en realidad, Herodes kier a haya e mucha pa mat’e!

Anto e streya a bai dilanti di e hombernan te na Betlehem, y a para riba e luga unda e mucha tabata. Ora e hombernan a drenta den e cas, nan a haya Maria cu e mucha Hesus. Nan a duna Hesus regalo. Pero despues Jehova a bisa e hombernan den un soño pa no bai bek cerca Herodes. P’esei nan a regresa nan pais via un otro caminda.

Ora Herodes a tende cu e hombernan di Oriente a bai cas, el a rabia masha. El a manda mata tur mucha homber na Betlehem di dos aña di edad bai abou. Pero Jehova a spierta Jose di antemano den un soño, y Jose a bai cu su famia Egipto. Despues, ora Jose a tende cu Herodes a muri, el a bai bek cu Maria y Hesus na Nazaret. Hesus a crece ei.

Segun bo, ta ken a laga e streya nobo ei briya? No lubida cu despues di a mira e streya, e hombernan a bai Jerusalem. Satanas e Diabel kier a mata e Yiu di Dios, y e tabata sa cu Rei Herodes di Jerusalem lo a purba mata Hesus. P’esei Satanas mester ta esun kende a laga e streya ei briya.