MIRA e homber den lama. E ta den hopi dificultad, no ta berdad? E pisca ta cla pa gulie! Bo sa ta ken e homber ei ta? Su nomber ta Jonas. Laga nos mira con bin el a hay’e den asina tanto dificultad.

Jonas tabata un profeta di Jehova. Poco tempo despues di morto di profeta Eliseo, Jehova a bisa Jonas: ‘Bai na e stad grandi Ninive. E maldad di e pueblo ei ta masha grandi, y mi kier pa bo papia cu nan tocante dje.’

Pero Jonas no kier a bai. P’esei el a subi un barco cu a bai den direccion contrario di Ninive. Jehova no a gusta cu Jonas a hui. P’esei el a manda un tormenta grandi. E tormenta tabata asina fuerte cu e barco tabata den peliger di sink. E matroosnan tabatin masha miedo, y nan a sclama na nan diosnan pa yudansa.

Finalmente Jonas a bisa nan: ‘Mi ta adora Jehova, e Dios cu a traha shelo y Tera. Y mi ta hui pasobra mi no kier a haci loke Jehova a manda mi.’ P’esei e matroosnan a puntra: ‘Kico nos mester haci pa e tormenta stop?’

Jonas a bisa: ‘Tira mi den lama y e lama lo calma atrobe.’ E matroosnan no kier a haci esei, pero ora e tormenta a empeora nan a dicidi di tira Jonas den lama. Mesora e tormenta a stop y e lama a calma.

Segun cu Jonas a hundi den awa, e pisca grandi a gulie. Pero e no a muri. El a keda den bariga di e pisca pa tres dia y tres anochi. Jonas a sinti masha duele cu e no a obedece Jehova y bai Ninive. Pues, bo sa kico el a haci?

Jonas a pidi Jehova yud’e. Anto Jehova a laga e pisca saca Jonas riba tera seco. Despues di esei Jonas a bai Ninive. Esei no ta siña nos e importancia di haci tur loke Jehova bisa?