DESPUES cu David a cuminsa reina na Jerusalem, Jehova a duna su ehersito hopi victoria riba nan enemigonan. Jehova a priminti di duna e tera di Canaan na e Israelitanan. Y awor, cu ayudo di Jehova, tur e tera cu a ser priminti na nan finalmente a bira di nan.

David tabata un bon gobernante. El a stima Jehova. P’esei, un di e prome cosnan cu el a haci despues di a captura Jerusalem tabata di hiba e arca di pacto di Jehova einan. Tambe e tabata kier traha un tempel pa pon’e aden.

Ora David a bira mas bieu, el a comete un eror grave. E tabata sa cu ta malo pa tuma cos di otro hende. Pero un atardi, den balcon riba dak di su palacio, el a wak abou y a mira un dama masha bunita. Su nomber ta Betsabe, y su casa ta un solda di David yama Urias.

David a desea Betsabe asina tanto cu el a laga trec’e na su palacio. Su esposo tabata leu den guera. Wel, David a drumi cu ne y despues el a sali na estado. David a keda masha precupa y a manda rospondi pa Joab, hefe di su ehersito, pa e pone Urias te dilanti den e bataya pa e wordo mata. Despues di morto di Urias, David a casa cu Betsabe.

Jehova a rabia masha hopi cu David. P’esei el a manda su sirbidor Natan pa bis’e di su picanan. Bo por mira Natan ei papiando cu David. David a sinti masha duele di loke el a haci y p’esei Jehova no a dun’e castigo di morto. Pero Jehova a bisa: ‘Dor cu bo a haci e mal cosnan ei, lo tin hopi dificultad den bo cas.’ Y ki dificultad David tabatin!

Prome e yiu di Betsabe a muri. Despues Amnon, e yiu mayo di David, a obliga su ruman muher Tamar pa drumi cu ne. Absalon, yiu di David, a bira asina rabia cu el a mata Amnon. Mas despues, Absalon a gana fabor di hopi hende, y a haci su mes rei. Finalmente, David a gana e guera contra Absalon, kende a ser mata. Si, David tabatin hopi dificultad.

Durante tur esei, Betsabe a duna lus na un yiu yama Salomon. Despues ora David tabata bieu y malo, su yiu Adonias a purba haci su mes rei. P’esei David a laga e sacerdote cu yama Sadok basha azeta riba cabes di Salomon pa mustra cu ta Salomon lo bira rei. Pronto despues David a muri na edad di 70 aña. El a reina pa 40 aña, pero awor Salomon a bira Rei di Israel..