BO SA kico e edificio ei ta? Esei ta un tent special pa adoracion di Jehova. E ta ser yama tabernakel tambe. E pueblo a caba di trah’e un aña despues cu nan a sali for di Egipto. Bo sa ta ken su idea esei tabata?

Tabata idea di Jehova. Ora Moises tabata riba Sero Sinai, Jehova a bis’e con pa trah’e. Dios a bis’e traha e tent di tal manera cu tabata facil pa desarm’e. Asina nan por a hib’e desarma na otro luga y arm’e di nobo. P’esei ora e Israelitanan tabata bai di un luga pa otro den desierto, nan tabata hiba e tent hunto cu nan.

Si bo wak den e camber chikito di e tent na man robes, bo por mira un caha, of cashi. Esei ta ser yama e arca di pacto. Tabatin dos angel of kerubin traha di oro riba dje, un na cada punta. Dios a skirbi e Dies Mandamentonan di nobo riba dos tabla di piedra, pasobra Moises a kibra e promenan. E dos piedranan aki tabata warda den e arca di pacto. Tambe, un butishi di mana tabata warda den dje. Bo ta corda kico ta mana?

Aaron, ruman di Moises, ta esun cu Jehova a scohe pa ta sumo sacerdote. El a guia e pueblo den adoracion di Jehova. Y su yiunan tambe tabata sacerdote.

Awor wak e camber mas grandi di e tent. E ta dobel e tamaño di e camber chikito. Bo ta mira e caha, of cashi chikito, cu huma ta bolter for di dje? Esei ta e altar caminda e sacerdotenan ta kima cos cu ta hole dushi, esta, sencia. Tambe tin un candelaria cu shete lampi. Y e di tres cos den e camber ta un mesa. Tin 12 pan riba dje.

Den cura di e tabernakel tin un comchi, of ponchera grandi, cu ta yen di awa. E sacerdotenan ta uz’e pa laba man cu pia. Tambe tin un altar grandi. Ei nan ta kima bestianan morto como ofrenda na Jehova. E tent ta net den centro di e campamento, y e Israelitanan ta biba den nan tentnan tur rond di dje.