ESEI no ta un nechi mucha homber? Su nomber ta Samuel. Y e homber cu tin su man poni riba cabes di Samuel ta sumo sacerdote Eli di Israel. E otro hendenan ta Elcana, tata di Samuel, y su mama Ana cu a hiba Samuel cerca Eli.

Samuel tabatin rond di cuater of cinco aña di edad so. Pero el a bai pa biba ei na e tabernakel di Jehova hunto cu Eli y e otro sacerdotenan. Pakico Elcana y Ana a ofrece un mucha asina hoben manera Samuel pa sirbi Jehova na e tabernakel? Laga nos mira.

Djis un par di aña prome cu esei, Ana tabata masha tristo. E motibo di su tristesa tabata cu e no por a haya yiu, y e tabata kier un yiu masha hopi mes. P’esei un dia ora Ana tabata bishita e tabernakel di Jehova, el a pidi: ‘O Jehova, no lubida mi! Si bo duna mi un yiu homber, mi ta priminti cu lo mi duna bo e pa e sirbi bo henter su bida.’

Jehova a contesta e oracion di Ana, y algun luna despues el a duna lus na Samuel. Ana a stima su yiu y a cuminsa siñ’e tocante Jehova ora cu e tabata chikito ainda. Ana a bisa su casa: ‘Asina cu Samuel tin edad cu mi no tin cu cri’e na pecho mas, lo mi hib’e na e tabernakel pa e sirbi Jehova einan.’

Esei ta loke nos ta mira Ana y Elcana ta haci riba e plachi. Y dor cu Samuel su mayornan a siñ’e asina bon, el a keda contento di por sirbi ei na Jehova su tent. Tur aña Ana y Elcana tabata bini pa adora Dios na e tent special ei, y pa bishita nan yiu. Y tur aña Ana tabata trece un mantel nobo sin manga cu el a traha pa Samuel.

Segun cu añanan a pasa, Samuel a sigui sirbi na e tabernakel di Jehova, y tanto Jehova como e pueblo a gust’e. Pero Ofni y Finees, e yiunan di Sumo Sacerdote Eli, tabata mal hende. Nan tabata haci hopi cos malo, y a pone otronan tambe desobedece Jehova. Eli mester a kita nan for di nan puesto di sacerdote, pero e no a hacie.

E hoben Samuel no a laga ningun di e mal cosnan cu a sosode na e tabernakel hacie bandona e sirbishi di Jehova. Pero pa motibo cu asina poco hende realmente a stima Jehova, pa hopi tempo Jehova no a papia cu hende. Ora cu Samuel a bira poco mas grandi, esaki ta loke a sosode:

Samuel tabata drumi den e tabernakel ora cu un bos a lant’e for di soño. El a contesta: ‘Ata mi aki.’ El a lanta y a core bai cerca Eli, y a bis’e: ‘Eli a yama mi, y ata mi aki.’

Pero Eli a contesta: ‘Mi no a yama bo; bai drumi bek.’ P’esei Samuel a bolbe bai drumi.

Anto tabatin un segundo yamada: ‘Samuel!’ P’esei Samuel a lanta y atrobe el a core bai cerca Eli. Samuel a bisa: ‘Eli a yama mi, y ata mi aki.’ Pero Eli a contesta: ‘Mi no a yama bo, mi yiu; bai drumi atrobe.’ P’esei Samuel a bolbe bai drumi.

Anto pa di tres bes e bos a yama, ‘Samuel!’ P’esei Samuel a core bai cerca Eli. El a bisa: ‘Ata mi aki, pasobra Eli mester a yama mi e biaha aki si.’ Awor Eli tabata sa cu mester ta Jehova tabata yam’e. P’esei el a bisa Samuel: ‘Bai drumi un biaha mas, y si e yama bo atrobe, bo mester bisa: “Papia, Jehova, pasobra bo sirbidor ta scucha.”’

Esei ta loke Samuel a bisa ora Jehova a yama atrobe. Anto Jehova a bisa Samuel cu lo e castiga Eli y su yiunan. Mas despues Ofni y Finees a muri den bataya contra e Filisteonan, y ora Eli a tende loke a sosode, el a cai cu lomba kibra su nek y a muri tambe. Asina e palabra di Jehova a wordo cumpli.

Samuel a bira grandi y a bira e ultimo hues di Israel. Ora el a bira bieu, e pueblo a pidie: ‘Scohe un rei pa goberna riba nos.’ Samuel no tabata kier haci esei, pasobra realmente ta Jehova tabata nan rei. Pero Jehova a bis’e pa scucha e pueblo.