MIRA Moises huyendo for di Egipto. Bo ta mira e hendenan ta persiguie? Bo sa pakico nan kier mata Moises? Laga nos mira si nos por haya sa.

Moises a lanta den cas di Farao, e gobernante di Egipto. El a bira un homber masha sabi y importante. Moises a compronde cu e no tabata Egipcio, ma cu su berdadero mayornan tabata esclabo Israelita.

Un dia, tempo e tabatin 40 aña di edad, Moises a dicidi di bai mira con ta bai cu su pueblo. E moda cu nan a wordo trata tabata teribel. El a mira un Egipcio suta un esclabo Israelita. Moises a wak rond, y ora el a mira cu ni un hende no tabata wak, el a dal e Egipcio, y e Egipcio a muri. Anto Moises a sconde su curpa den santo.

Su siguiente dia Moises a bai pa mira su pueblo atrobe. El a pensa cu e por a yuda nan pa nan no mester ta esclabo mas. Pero el a mira dos homber Israelita ta bringa cu otro, y p’esei Moises a puntra esun cu tabata haci malo: ‘Pakico bo ta golpia bo ruman?’

E homber a puntra: ‘Ken a haci bo nos gobernante y hues? Bo ta bai mata mi manera bo a mata e Egipcio?’

Moises a haya miedo. El a compronde cu hende a haya sa kico el a haci cu e Egipcio. Asta Farao a tende di dje, y el a manda hende pa mata Moises. P’esei Moises tabatin cu hui for di Egipto.

Ora Moises a sali for di Egipto, el a bai leu te na e tera di Madian. El a topa ei cu famia di Jetro, y a casa cu un yiu muher di dje yama Sefora. Moises a bira wardado di carne y a cuida e carnenan di Jetro. El a biba 40 aña na e tera di Madian. Awor e tabatin 80 aña di edad. Anto un dia ora Moises tabata cuida e carnenan di Jetro, un cos asombroso a sosode cu a cambia e bida di Moises por completo. Bira e blachi y laga nos mira kico tabata e cos asombroso ei.