MIRA kico ta sosode awor. Adam cu Eva ta wordo saca for di e bunita hofi di Eden. Bo sa pakico?

Esei ta pasobra nan a haci algo masha malo. Y p’esei Jehova a castiga nan. Bo sa ki malo Adam cu Eva a haci?

Nan a haci algo cu Dios a bisa nan pa no haci. Dios a bisa nan cu nan por come cuminda di tur palo di e hofi. Pero Dios a bisa nan pa no come di un cierto palo, sino nan lo muri. Dios a warda e palo ei pa su mes. Y nos sa cu ta malo pa tuma algo di otro persona, no ta berdad? Wel, kico a sosode?

Un dia ora Eva tabata su so den e hofi, un colebra a papia cu ne. Imagina bo! El a bisa Eva pa come fruta di e palo cu Dios a bisa nan no come di dje. Pero, ora Jehova a traha colebra, e no a traha nan pa nan por papia. Pues esei ta nifica cu mester ta un otro persona a laga e colebra papia. Ken esei tabata?

Esei no tabata Adam. Pues, e mester tabata un persona cu Jehova a traha hopi tempo prome cu el a traha Tera. Personanan asina ta angel, y nos no por mira nan. Un di e angelnan a bira masha orguyoso. El a cuminsa pensa cu e mester ta un gobernante mescos cu Dios. Y e tabata kier pa hende obedece e en bes di obedece Jehova. Esei tabata e angel cu a haci e colebra papia.

E angel a logra gaña Eva. Ora el a bisa Eva cu lo e bira mescos cu Dios si e come e fruta, Eva a kere esei. P’esei Eva a come e fruta y Adam tambe. Adam cu Eva a desobedece Dios, y p’esei nan a perde nan bunita luga di biba den e hofi.

Pero un dia Dios ta bai percura pa tur e Tera bira mes bunita cu e hofi di Eden. Mas despues den e buki aki nos lo siña con bo por yuda haci Tera bunita. Pero awor, laga nos siña kico a sosode cu Adam cu Eva..