KICO ta diferente riba e plachi aki? Esei ta e hendenan. Nan ta e prome homber y muher. Ken a traha nan? Dios. Bo sa su nomber? Su nomber ta Jehova. Y e homber y e muher a yega di ser yama Adam cu Eva.

Esaki ta e manera cu Jehova Dios a traha Adam. El a tuma stof di tera y cu esei el a forma un curpa perfecto, un curpa di hende homber. Anto el a supla den nanishi di e homber, y Adam a ricibi bida.

Jehova Dios tabatin un trabou pa Adam. El a bisa Adam duna nomber na tur e diferente sortonan di animal. Kisas Adam a wak e bestianan pa basta tempo pa e duna e mihor nomber na cada un. Mientras cu Adam tabata duna e bestianan nomber, el a cuminsa ripara algo. Bo sa kico el a ripara?

Tur bestia tabatin compañe. Tabatin olifanti tata y olifanti mama, y tabatin leon tata y leon mama. Pero Adam so a keda sin compañe. P’esei Jehova a laga Adam bai un soño profundo, y el a tuma un repchi di su custia. Uzando e repchi aki, Jehova a traha un muher pa Adam, y el a bira su esposa.

Ki felis Adam a keda awor! Anto imagina bo con felis Eva a keda ya cu Dios a lag’e biba den un hofi bunita asina! Awor nan por a haya yiu y biba hunto den felicidad.

Jehova tabata kier pa Adam cu Eva biba pa semper. E tabata kier pa nan haci henter e Tera mes bunita cu e hofi di Eden. Ki felis Adam cu Eva mester a keda ora nan a pensa di haci esei! Abo lo tabatin gana di yuda haci Tera un hofi bunita? Pero e felicidad di Adam cu Eva no a dura. Laga nos mira pakico.