1, 2. Pa ken e ocasion di bautismo ta motibo di goso?

 BO TIN hopi aña ta sirbi Jehova? Wel, casi sigur bo a tende masha hopi discurso di bautismo na nos asamblea- y congresonan. Pero maske bo tabata presente na hopi di e ocasionnan ey, toch cada biaha bo ta sinti bo conmovi ora bo mira e candidatonan di bautismo, sinta den prome rij di e sala, lanta para pa haci nan declaracion publico. Y ora nan sali for di awa, e emocion di e ocasion ey sa resulta den un tremendo aplauso di parti di esnan presente. Kisas bo wowo ta hasta yena cu awa ora bo mira cu un biaha mas un grupo di persona stima a scoge pa ta na e banda di Jehova. Esta un alegria nos ta sinti na momentonan asina!

² Por lo general, nos ta mira bautismo un par di biaha pa aña den nos area, pero e angelnan tin e privilegio di presencia esey hopi mas biaha. Bo ta imagina cuanto “goso [nan ta sinti] den cielo” ora cu tur siman nan ta mira miles di persona bira parti di e organisacion di Jehova riba tera? (Lucas 15:​7, 10) Sin duda, e angelnan ta keda masha contento pa mira e aumento aki!​—⁠Hageo 2:⁠7.

3. Dicon Satanas ‘ta cana rond manera un leon cu ta brul’, y kico e kier logra?

³ Pero no ta tur criatura invisibel ta keda contento ora nan mira e ocasionnan di bautismo ey. Satanas y e  demoñonan ta furioso cu miles di hende ta bira lomba pa e mundo perverso aki. Dicon? Pasobra Satanas a laga sa cu boca grandi cu hende no ta sirbi Jehova pa motibo cu di berdad nan stim’e y tambe cu ningun di nan lo keda fiel bou di prueba pisa. ( Job 2:​4, 5) Pesey, ora un hende dicidi di dedica su bida na Jehova, e ta demostra cu Satanas ta un mentiroso y ta dal e un bofta den su cara, na moda di papia. Tur siman, Diabel ta haya miles di bofta. Nada straño cu e “ta cana rond manera un leon cu ta [brul], buscando ken e por habraca [spiritualmente].” (1 Pedro 5:⁠8) E “leon” aki ta haci tur loke ta posibel pa daña of hasta kibra nos relacion cu Dios.​—⁠Salmo 7:​1, 2; 2 Timoteo 3:⁠12.

4, 5. (a) Jehova a limita Satanas su influencia den cua dos manera importante? (b) Un cristian berdadero por ta sigur di kico?

⁴ Pa brabo cu e ‘leon cu ta brul’ ey ta, nos no tin nodo di  laga miedo apodera di nos. Dicon? Pasobra Jehova a limita Satanas su influencia den dos manera importante. Di prome, Satanas lo no por caba nunca cu henter e pueblo di Dios. Anto e sa esey, pasobra Jehova a profetisa cu “un multitud grandi” di cristian berdadero lo sobrevivi e binidero “tribulacion grandi.” (Revelacion 7:​9, 14) Y loke Jehova profetisa semper ta cumpli!

⁵ Di dos, Satanas no por “habraca” ningun hende cu keda cerca di Dios. Nos por deduci esaki for di un berdad fundamental cu e fiel profeta Azarias a expresa ora el a bisa Rey Asa: “[ Jehova] ta ku boso, miéntras boso ta kunÉ.” (2 Cronicanan 15:⁠2, BPK; 1 Corintionan 10:13) Den Bijbel tin un cantidad di ehempel di sirbidor di Dios cu Satanas no por a habraca den sentido spiritual pa motibo cu nan a keda cerca di Jehova. (Hebreonan 11:​4-⁠40) Pues, un cristian cu awe ta keda cerca di Dios lo por opone Diabel y hasta venc’e. Esey ta loke e Palabra di Dios ta sigura nos: “Opone Diabel, y lo e huy for di boso.”​—Santiago 4:7.

6. Con Satanas ta lucha contra cristiannan individual?

⁶ Satanas no por gana e guera, na moda di papia, pero loke si e por haci ta vence personanan individual cu no keda alerta. Con asina? Satanas sa cu si e logra debilita nos relacion cu Jehova, e tin chens di “habraca” nos. Pesey e ta ataca nos na un manera intenso, personal y tramposo. Laga nos ban analisa e tres tacticanan aki.

7. Dicon Satanas ta lansa atake intenso contra e pueblo di Jehova?

⁷ Atake intenso. Apostel Pablo a declara cu “henter mundo ta den poder di e Malbado.” (1 Juan 5:19) Den e palabranan ey nos ta haya un spiertamento pa tur cristian. Como cu Satanas a habraca henter e mundo malbado aki caba, e por concentra awor riba esnan cu semper a scapa di su gara, esta, e pueblo di Jehova, y intensifica su atake  contra nan. (Mikeas 4:1; Juan 15:19; Revelacion 12:​12, 17) E ta hopi rabia, pasobra e sa cu a ked’e masha poco tempo, y pesey e ta pone mas presion. Awe nos ta enfrenta su ultimo atakenan, esnan di mas feroz, pa caba cu nos relacion cu Dios. Pues, awor mas cu nunca nos mester ‘compronde den ki tempo’ nos ta biba pa nos por sa kico nos mester haci.​—⁠1 Cronicanan 12:⁠32.

8. Kico apostel Pablo tabata kiermen ora el a bisa cu nos tin un “lucha” contra e spiritonan malbado?

⁸ Lucha na nivel personal. Apostel Pablo a spierta e cristiannan: “Nos lucha [ta] contra forsanan spiritual di maldad den luganan celestial.” (Efesionan 6:12) E palabra Griego traduci como “lucha” ta duna e idea di un combate riba distancia cortico, un pelea mano a mano. E echo cu Pablo a uza e palabra ey ta enfatisa cu cada un di nos tin un lucha personal contra e spiritonan malbado, sea cu nos ta biba den un pais caminda hende ta kere den spirito malbado of no. Nos no mester lubida nunca cu e dia cu nos a dedica nos bida na Jehova ta comosifuera nos a subi un ring di lucha liber. Di manera cu tur cristian, en todo caso desde nan bautismo, ta den un pelea. No ta nada straño anto cu tres biaha Pablo a urgi e cristiannan na Efeso pa “para firme”!​—⁠Efesionan 6:​11, 13, 14.

9. (a) Dicon Satanas y su demoñonan ta uza varios ‘trampa’? (b) Dicon Satanas ta purba contamina nos manera di pensa, y con nos por resisti su esfuerso? (Wak e cuadro “ Tene Cuidou cu e Trampanan di Satanas!”) (c) Ki trampa di Diabel nos lo bay analisa awor?

⁹ Tacticanan tramposo. Pablo a anima cristiannan pa para firme contra e “trampanan” di Satanas. (Efesionan 6:11) Dicon Pablo a uza e forma plural di ‘trampa’? Pasobra Diabel y su demoñonan no ta uza un tactica so pa gaña nos, sino varios trampa. Anto nan ta haci esey pa un motibo. Nan a ripara cu algun cristian cu a logra para firme contra un prueba despues ta cay pa un otro tipo di prueba. Pesey nan ta observa e comportacion di cada un di nos pa haya  sa kico ta nos debilidad. Despues nan ta probecha di cualkier debilidad cu nos por tin pa daña nos relacion cu Dios. Afortunadamente, nos por reconoce hopi di e tacticanan di Diabel pasobra Bijbel ta informa nos di nan. (2 Corintionan 2:11) Mas prome den e buki aki, nos a analisa caba algun di e trampanan ey, entre otro, materialismo, mal asociacion y inmoralidad sexual. Laga nos ban wak awor un otro trampa di Satanas: spiritismo.

10. (a) Kico ta spiritismo? (b) Con Jehova ta mira spiritismo, y con abo ta mir’e?

¹⁰ Spiritismo, of demonismo, ta encera adivinacion (miramento di destino), magia, plegamento di hende, montamento of comunicacion cu e mortonan, uzo di amuleto of contra, buscamento di señal den soño y astrologia. Hende cu ta haci e cosnan ey ta practica demonismo, pasobra nan ta drenta den contacto directo cu spirito malbado. Y nos sa bon cu Jehova ta odia spiritismo y ta consider’e “un abominacion.” (Deuteronomio 18:​10-⁠12; Revelacion 21:⁠8) Como cu nos tambe mester “odia loke ta malo”, hamas nos lo hinca den nos cabes pa trata di busca asociacion cu e demoñonan. (Romanonan 12:⁠9) Esey lo ta un acto repugnante di traicion contra nos Tata celestial, Jehova!

11. Dicon pa Satanas lo ta un gran victoria si e por logra pone nos participa den spiritismo? Ilustra esey.

¹¹ Metemento den spiritismo ta un traicion hopi grandi contra Jehova. Ta pesey Satanas ta haci todo por todo pa pone algun di nos participa den dje. Cada biaha cu e logra pone un cristian acudi na demonismo, e ta logra un gran victoria. Den ki sentido? Pa ilustra esey, pensa riba un soldaat. Si e laga e enemigo convenc’e pa traiciona su ehercito y join esun di e enemigo, su comandante nobo lo keda masha contento. Kisas e lo hasta pensa di cana rond pa show cu e traidor comosifuera ta un trofeo e ta, pa asina insulta  e comandante anterior di e soldaat. Mescos lo ta e caso si un cristian dicidi di practica spiritismo. Conscientemente e ta scoge pa bandona Jehova y pone su mes directamente bou di mando di Satanas. Imagina bo con contento Satanas lo keda si e por show cu ne comosifuera ta un trofeo di guera e ta! Nos lo kier dun’e su gana? Absolutamente cu no! Nos no ta traidor.

12. Ki tactica Satanas ta uza pa influencia nos punto di bista di spiritismo?

¹² Tanten cu nos ta odia spiritismo, Satanas lo no tin exito cu nos. E sa esey, y pesey e kier cambia nos manera di pensa. Con? E ta busca manera pa confundi cristiannan te na e punto cu algun ta cuminsa pensa cu ‘loke ta malo, ta bon, y loke ta bon, ta malo.’ (Isaias 5:20) Pa logra esey, e ta utilisa un di su tacticanan cu a resulta masha efectivo: E ta uza pregunta cu ta sembra duda.

13. Duna algun ehempel di e manera cu Satanas a uza pregunta pa sembra duda?

¹³ Wak algun ehempel di e manera cu el a uza e tactica ey den pasado. Den hofi di Eden, el a puntra Eva: “Di berdad Dios a bisa: ‘Bo no mag come di ningun palo di e hofi’?” Den tempo di Job, durante un reunion di e angelnan den cielo, Satanas a puntra: “Ta pornada Job ta teme Dios?” Y na comienso di Hesus su sirbishi riba tera, Satanas a reta Cristo, bisando: “Si bo ta yiu di Dios, bisa e piedranan aki bira pan.” Figura bo, den caso di Hesus, Satanas tabatin e tribilidad di haci bofon di e palabranan cu Jehova mes a papia un seis siman prome: “Esaki ta mi Yiu stima, esun cu tin mi aprobacion.”​—⁠Genesis 3:1; Job 1:9; Mateo 3:17; 4:⁠3.

14. (a) Con Satanas ta uza e tactica di sembra duda tocante spiritismo? (b) Kico nos lo bay analisa awor?

¹⁴ Awe Diabel ta uza e mesun tactica ey pa crea duda tocante spiritismo. Lamentablemente, el a logra sembra  duda den mente di algun cristian, y nan a cuminsa cuestiona si di berdad cierto forma di spiritismo ta dje malo ey. En realidad, nan ta puntra nan mes: ‘Di berdad ta asina?’ (2 Corintionan 11:⁠3) Con nos por yuda e rumannan ey ­corigi nan punto di bista? Con nos por haci sigur cu e tactica ey di Satanas no ta influencia nos? Pa contesta e preguntanan ey, ban analisa dos area di bida cu Satanas a contamina na un manera astuto cu cosnan di spiritismo: entretenimento y asunto di salud.

15. (a) Con hopi hende den e mundo occidental ta mira spiritismo? (b) Con mundo su punto di bista di spiritismo a influencia algun cristian?

¹⁵ Mas y mas, nos por nota cu hende den e mundo occidental no ta considera bruheria, magia y otro formanan di spiritismo como algo malo. Un cantidad creciente di pelicula, buki, programa di television y computer game ta presenta practicanan demoniaco comosifuera nan ta algo pret, ingenioso y inofensivo. Algun pelicula y buki cu ta enfoca riba ocultismo a bira asina popular cu nan tin fan club. Ta bisto cu e demoñonan a logra convence e publico cu spiritismo no ta dje peligroso ey. Acaso e actitud aki a influencia algun cristian? Si. Con asina? Un ehempel tipico di esaki ta loke un ruman a bisa despues di a wak un pelicula tocante ocultismo: “Si, mi a wak e pelicula, pero esey no kiermen cu mi a practica spiritismo.” Dicon e forma di rasona ey ta peligroso?

16. Dicon ta peligroso pa scoge entretenimento cu ta enfoca riba ocultismo?

¹⁶ Ta berdad cu tin un diferencia entre practica spiritismo y sinta wak e, pero esey no kiermen cu no tin ­ningun peliger den sinta wak e. Dicon no? Wel, pensa riba esaki: E Palabra di Dios ta indica cu ni Satanas ni su demoñonan no  por lesa nos pensamento. a Pues, manera nos a mira anteriormente, pa e spiritonan malbado haya sa kico nos ta pensa y kico por debilita nos relacion cu Dios, nan mester observa tur loke nos ta haci, incluso ki tipo di entretenimento nos ta scoge. Pesey, ora un persona su comportacion ta mustra cu e ta gusta pelicula of buki tocante spiritista, heks, hende posei pa demoño y cosnan por el estilo, e ta mandando un mensahe cla na e demoñonan. En realidad, e ta laga nan sa kico ta su debilidad! Anto e demoñonan lo por probecha di esey pa intensifica nan ‘pelea mano a mano’ contra e cristian ey te ora cu nan logra tumb’e den e ring, na moda di papia. De echo, entretenimento cu ta contene ocultismo a lanta e interes di algun cristian den spiritismo y pone nan cuminsa practic’e.​—⁠ Galationan 6:⁠7.

17. Ki trampa astuto Satanas por uza pa probecha di hende cu ta malo?

¹⁷ Satanas ta purba di probecha no solamente di nos deseo di diberti, sino tambe di loke nos mester den asunto di salud. Por ehempel, un cristian cu ta malo lo por bira deprimi si e mira cu ningun tratamento no ta yud’e. (Marco 5:​25, 26) Con Satanas y e demoñonan por probecha di e situacion aki? Nan sa masha bon cu e Palabra di Dios ta spierta nos pa no bay busca “yudansa di esnan cu ta haci inikidad”, of, “loke ta perhudicial.” (Isaias 31:⁠2, NW) Pero pa pone un cristian pasa por halto di e spiertamento ey, e demoñonan kisas ta tent’e pa, den su desesperacion, e acepta un tratamento cu ta contene elementonan di spiritismo. Si e cristian cay den e trampa ey, esey sin duda lo daña su relacion cu Dios. Den ki sentido?

18. Ki tipo di tratamento cristiannan ta rechasa, y dicon?

 ¹⁸ Jehova a spierta e Israelitanan cu a recori na “inikidad” of poder sobrenatural pa yudansa: “Ora boso habri boso mannan den oracion, lo mi sconde mi wowonan pa boso; si, maske boso haci hopi oracion, lo mi no scucha.” b (Isaias 1:​13, 15) Claro cu nos lo no kier haci nada cu ta pone Jehova tapa su horea pa nos oracionnan y kita e sosten cu e ta duna nos, y vooral ora nos ta malo. (Salmo 41:⁠3) Pues, kico si tin indicacion cu cierto tratamento of sistema di diagnostica maleza ta contene elemento di spiritismo? Como cristian berdadero, nos ta rechasa nan redondamente. c (Mateo 6:13) Asina nos por ta sigur cu nos lo keda cu e sosten di Jehova.​—⁠Wak e cuadro “ E Ta Conecta cu Bruheria?”

19. (a) Den ki trampa di Diabel hopi hende a cay? (b) Ki tipo di storia cristiannan berdadero mester evita?

¹⁹ Mientras cu hende den paisnan occidental ta minimisa e peliger di e poder di Satanas, den otro partinan di mundo ta sosode net lo contrario. Na e luganan ey, hopi  hende a cay den e trampa di kere cu Diabel ta hopi mas poderoso di loke e ta realmente. Tin hende ta biba constantemente cu miedo di demoño; nan ta lanta, come, traha y drumi den miedo. Tin un cantidad di storia tocante actonan poderoso di demoño, y hopi bes hende ta ­gusta conta nan pasobra esnan cu ta scucha nan ta keda fascina. Acaso sirbidornan di Dios mester presta atencion na e storianan ey of yuda plama nan? No, y pa dos motibo importante.

20. Con un persona por ta haciendo propaganda pa Satanas, kisas sin cu e ta ripara?

²⁰ E prome motibo ta cu ora nos ta conta storia tocante hazaña di e demoñonan, nos ta promove e interesnan di Satanas. Con asina? Wel, aunke e Palabra di Dios ta reconoce cu Satanas tin e capacidad di haci obra poderoso, e ta spierta tambe cu e ta uza “señal y milager engañoso.” (2 Tesalonicensenan 2:​9, 10) Siendo cu e ta e gañado  di mas grandi cu tin, e sa con pa manipula mente di hende cu ta ser atrai na spiritismo y con pa laga nan kere cosnan cu no ta berdad. Hende asina kisas ta kere di berdad cu nan a mira y tende cierto cos, y podise nan ta conta nan experencianan como echo real. Nan storianan ta sigui pasa di boca pa boca y cu tempo nan ta exagera e storia mas y mas. Kico si un cristian mester plama e tipo di storianan ey? En realidad, e ta colaborando cu Diabel, “e tata di mentira”, ya cu ta propaganda e ta haci p’e!​—⁠Juan 8:44; 2 Timoteo 2:⁠16.

21. Kico mester ta e tema principal di nos combersacionnan?

²¹ Hasta si un cristian di berdad a yega di experencia atake di demoño, tin un di dos motibo pakico lo e no kier entretene e rumannan cada bes cu e tipo di relatonan ey. Cua esey ta? Wel, nos kier enfoca riba Cristo, no riba Satanas. Bijbel ta urgi nos pa “fiha nos bista riba Hesus, e Representante Principal di nos fe y Esun cu ta hiba esaki na perfeccion.” (Hebreonan 12:⁠2) Ta bon pa tuma nota cu tempo Hesus tabata riba tera e no a entretene su discipelnan cu storia di spirito, aunke sin duda e por a conta nan precies kico Satanas por y no por haci. Hesus a concentra mas bien riba e mensahe di Reino. Pesey, mescos cu Hesus y e apostelnan, nos kier combersa principalmente tocante cosnan edificante, manera “e obranan magnifico di Dios.”​—⁠Echonan 2:11; Lucas 8:1; Romanonan 1:​11, 12.

22. Con nos por sigui contribui na “goso den cielo”?

²² Manera nos a mira, Satanas kier kibra nos relacion cu Jehova, y pesey e ta uza varios trampa, entre nan, spiritismo. Pero si nos ta odia loke ta malo y ta pega na loke ta bon, nos lo no duna Diabel chens di debilita nos determinacion di rechasa tur forma di spiritismo. (Efesionan 4:27) Imagina bo e gran ‘goso cu lo tin den cielo’ si nos keda “para firme contra e trampanan di Diabel” te ora e ser destrui!​—Efesionan 6:11.