1, 2. Dicon Jehova ta keda contento ora e mira e esfuerso cu nos ta haci pa ta honesto? Ilustra esey.

 UN MAMA cu su yiu chikito ta saliendo for di un tienda. Diripiente, e mucha ta keda para tur spanta. Den su man, e tin un coy hunga chikito cu el a coy den e tienda, pero cu el a lubida di pone bek of di pidi su mama pa cumpr’e p’e. E ta tur nervioso y no sa kico pa haci. Su mama ta trankilis’e y ta bay bek den e tienda cu ne pa e por duna nan e coy hunga y pidi despensa. Esta feliz y orguyoso e mama ta sintie ora e mira su yiu haci esey! Dicon?

² Mayornan semper ta keda masha contento ora nan mira cu nan yiunan ta siña e importancia di ta honesto. Y esey ta e caso cu nos Tata celestial tambe, ya cu e ta e “Dios di bèrdat.” (Salmo 31:5, BPK) E ta keda masha contento ora e ta mira nos haci esfuerso pa ta honesto, segun cu nos ta madura spiritualmente. Y como cu nos kier agrad’e y keda den su amor, nos tambe—mescos cu apostel Pablo—“kier comporta nos mes na un manera honesto den tur cos.” (Hebreonan 13:18) Laga nos ban analisa cuater area di bida den cua no ta facil pa keda honesto, y despues nos lo considera e beneficionan cu honestidad ta trece cu ne.

3-5. (a) Con e Palabra di Dios ta spierta nos pa e peligernan di gaña nos mes? (b) Kico lo yuda nos pa ta honesto cu nos mes?

³ Na prome luga, nos tin cu siña pa ta honesto cu nos  mes. Como hende imperfecto, ta masha facil pa nos gaña nos mes. Esey a pasa cu e cristiannan na Laodicea. Hesus a bisa nan cu nan a convence nan mes cu nan tabata rico, pero en realidad, nan tabata “pober, ciego y sunu” den sentido spiritual. Nan situacion tabata hopi lamentabel. (Revelacion 3:17) Y como cu nan no kier a acepta cu nan tin un problema, nan situacion tabata hasta mas peligroso ainda.

⁴ Kisas bo ta corda tambe cu discipel Santiago a spierta: “Si un hende ta kere cu e ta adora Dios, ma e no ta frena su lenga, e ta gaña su mes y su adoracion ta envano.” (Santiago 1:26) Pues, si nos ta haci mal uzo di nos lenga, y ta pensa cu Dios lo acepta nos adoracion toch, nos ta gaña nos mes. E forma di adoracion ey no tin ningun balor. Kico nos por haci pa evita di comete e ekibocacion lamentabel ey?

⁵ Den e versiculonan anterior, Santiago a compara e berdad di e palabra di Dios cu un spiel. El a conseha nos pa wak cuidadosamente den e ley perfecto di Dios y haci e ahustenan necesario. (Santiago 1:23-25) Bijbel por yuda nos pa ta honesto cu nos mes y mira kico nos tin cu drecha. (Lamentacionnan 3:40; Hageo 1:5) Tambe nos por pidi Jehova pa samina nos y yuda nos mira e defectonan serio cu nos tin y corigi nan. (Salmo 139:23, 24) Kisas nos a desaroya un actitud deshonesto sin cu nos a ripara. Pero ta importante pa nos mira deshonestidad manera nos Tata celestial ta mir’e. Proverbionan 3:32 ta bisa: “E hende perverso [of, tramposo] ta un abominacion pa SEÑOR, ma E tin comunion intimo cu e hende recto.” Jehova por yuda nos mira honestidad manera e ta mir’e y analisa nos accionnan desde su punto di bista. No lubida cu Pablo a bisa: “Nos kier comporta nos mes na un manera honesto.” Nos no ta perfecto aworaki, pero di curason nos ta desea pa ta honesto y ta haci esfuerso pa logra esey.

6. Dicon un pareha casa mester ta honesto cu otro, y ki peliger nan ta evita asina?

⁶ Honestidad mester caracterisa un famia cristian. Pues, esposo cu esposa mester ta franco y honesto cu otro. Den un matrimonio cristian no tin luga pa practicanan impuro y destructivo manera flirtmento, relacionnan secreto via Internet ni ningun tipo di pornografia. Algun cristian a participa den e cosnan malo ey y a sconde esaki pa nan casa. Esey no ta niun tiki honesto! Tuma nota di e palabranan di Rey David: “Mi no ta sinta hunto cu hombernan gañado, tampoco lo mi no anda cu hipocritanan.” (Salmo 26:4) Si bo ta casa, no haci nada cu lo bo kier sconde pa bo casa.

7, 8. Menciona algun ehempel biblico cu por yuda muchanan siña e balor di honestidad.

⁷ Mayornan mester siña nan yiunan e balor di ta honesto, y lo ta sabi pa nan uza ehempel saca for di Bijbel pa esey. Di un banda, Bijbel ta contene relato di hende cu no tabata un bon ehempel. Tin e caso di Acan, kende a comete ladronicia y despues a purba sconde esey, of e relato di Gehazi, kende a gaña pa e bay dilanti financieramente, y tambe esun di Judas, kende a horta placa y pretende di ta amigo di Hesus pa hacie daño.—Josue 6:17-19; 7:11-25; 2 Reynan 5:14-16, 20-27; Mateo 26:14, 15; Juan 12:6.

⁸ Di otro banda, Bijbel ta contene bon ehempel tambe. Nos tin Jacob, kende a urgi su yiunan  pa debolbe e placa cu nan a haya den nan saconan, ya cu el a pensa cu por tabata pa ekibocacion cu e cen a resulta eynan; of Jefta, kende su yiu muher a honra e promesa cu su tata a haci, a pesar cu esey tabata un sacrificio grandi p’e y tambe Hesus, kende a identifica su mes abiertamente dilanti di un multitud furioso pa asina cumpli cu profecia y proteha su amigonan. (Genesis 43:12; Huesnan 11:30-40; Juan 18:3-11) Esakinan ta djis un par di ehempel pa yuda mayornan mira cu tin un cantidad di informacion valioso den e Palabra di Dios cu nan por uza pa siña nan yiunan stima honestidad y balor’e.

9. Kico mayornan mester evita si nan kier pone un bon ehempel di honestidad pa nan yiunan, y dicon nan ehempel ta importante?

⁹ Mayornan tin un responsabilidad grandi ora nan ta siña nan yiunan e cosnan ey. Apostel Pablo a puntra: “Abo cu ta siña otro hende, no ta siña bo mes? Abo cu ta predica: ‘No horta’, ta horta?” (Romanonan 2:21) Tin mayor ta confundi nan yiunan, pasobra nan ta siña nan pa ta honesto, mientras cu nan mes como mayor ta deshonesto. Kisas nan ta papia mitar berdad of ta horta cos chikito y ta hustifica esey bisando: “No worry, nan sa cu hende ta bay cu e cosnan aki” of “Ay no, esey tabata un mentira inocente.” Ma en realidad, horta ta horta, sin importa e balor di e articulo horta; y gaña ta gaña, sin importa kico, of con grandi, e mentira ta. a (Lucas 16:10) Ademas, mucha ta detecta hipocresia mesora, y esey por perhudica nan seriamente. (Efesionan 6:4) Sinembargo, ora mucha siña pa ta honesto for di e ehempel di nan mayornan, tin hopi chens cu nan lo sigui glorifica Jehova den e mundo deshonesto aki ora nan bira grandi.—Proverbionan 22:6.

10. Pa nos ta realmente honesto, kico nos tin cu tene cuidou cu ne ora nos ta combersa cu nos rumannan?

¹⁰ Nos asociacion cu nos rumannan cristian ta duna nos hopi oportunidad pa cultiva honrades. Manera nos a siña den Capitulo 12, ora nos ta entre nos rumannan den fe nos tin cu tene cuidou con nos ta papia, pasobra facilmente nos por cuminsa haci redo of hasta calumnia. Si nos ripiti un cos cu no ta confirma, nos por yuda plama un mentira kisas sin cu nos kier. Pues, mihor nos pensa bon prome cu nos papia. (Proverbionan 10:19) Di otro banda, podise nos sa cu un cos ta berdad, pero esey no kiermen cu nos tin cu papi’e. Dicon no? Kisas e cos no ta nos asunto of lo ta un falta di bondad pa papia tocante dje. (1 Tesalonicensenan 4:11) Tin hende ta hustifica e manera bruto cu nan ta papia, bisando cu ta honesto nan ta. Pero nos palabranan semper mester ta agradabel y bondadoso.—Colosensenan 4:6.

11, 12. (a) Con un ruman envolvi den un pica serio por empeora e situacion? (b) Cua ta algun mentira cu Satanas ta fomenta relaciona cu pica serio, y con nos por lucha contra nan? (c) Con nos por demostra cu nos ta honesto cu Jehova su organisacion?

 ¹¹ Ta importante pa nos ta honesto vooral cu e rumannan cu ta dirigi e congregacion. Rumannan envolvi den pica serio ta empeora e situacion ora nan purba sconde esey y gaña e ancianonan cu puntra nan tocante e asunto. Tin biaha nan ta hasta cuminsa hiba un bida dobel, fingiendo di ta sirbi Jehova, mientras cu nan ta practica pica serio. Cu otro palabra, nan ta biba den un mundo di engaño. (Salmo 12:2) Otro rumannan ta conta e ancianonan un parti di e berdad pero ta sconde detaye importante. (Echonan 5:1-11) Den hopi caso esaki ta sosode pasobra nan ta kere e mentiranan cu Satanas ta plama.—Wak e cuadro “ Mentira Diabolico Relaciona cu Pica Serio.”

¹² Ta importante tambe pa nos ta honesto cu Jehova su organisacion ora nos ta yena formulario of ta entrega rapport. Con asina? Por ehempel, ora nos ta yena rapport di sirbishi di veld, nos ta percura pa e cifranan cuadra cu loke nos a haci. Asina tambe, ora nos ta yena un solicitud pa un of otro privilegio di sirbishi, nos kier duna informacion exacto tocante nos salud of di cualkier otro detaye personal.

13. Con nos por demostra cu nos ta honesto cu nos rumannan den asunto di negoshi y empleo?

¹³ Nos mester ta honesto tambe cu nos rumannan den asunto di negoshi y empleo. Claro cu nos no ta atende e asuntonan ey na Salon di Reino ni den sirbishi di veld. Si nos tin ruman ta traha pa nos, nos kier haci sigur cu nos ta trata nan honradamente, pagando na tempo e suma cu nos a palabra, hunto cu tur e beneficionan cu ley ta stipula. (1 Timoteo 5:18; Santiago 5:1-4) Di otro banda, si ta nos ta traha pa un ruman, nos lo kier cumpli 100 porciento cu e trabou cu e ta paga nos p’e. (2 Tesalonicensenan 3:10)  Nos lo no spera un trato preferencial debi na nos relacion spiritual, comosifuera nos doño di trabou mester duna nos mas tempo liber of mas beneficio cu e otro trahadornan.—Efesionan 6:5-8.

14. Ki precaucion ta sabi pa cristiannan tuma ora nan ta bay haci negoshi cu otro, y dicon?

¹⁴ Kico si ta trata di asunto di bira socio den un negoshi, kisas pa medio di un fianza of un inversion? Bijbel ta duna un principio importante y practico: Pone tur cos riba papel! Por ehempel, ora Jeremias a cumpra un pida tereno, el a laga skirbi un documento tocante esey cu su duplicado y dilanti di testigo; anto el a ward’e bon pa e por a uz’e despues como referencia. (Jeremias 32:9-12; wak tambe Genesis 23:16-20.) Pues, ora bo ta haci negoshi cu ruman, laga pone tur detaye den un documento debidamente prepara y firma dilanti di testigo. Esey no ta un muestra di desconfianza; mas bien, e ta preveni mal comprondemento, decepcion y hasta desacuerdo cu por causa desunion. Cristiannan cu ta haci negoshi cu otro mester corda cu no ta bale la pena pone e paz y union di e congregacion na peliger pa ningun asunto di negoshi. b—1 Corintionan 6:1-8.

15. Kico Jehova ta pensa di practicanan fraudulento di negoshi, y ki posicion cristiannan ta tuma?

¹⁵ Un cristian no mester ta honrado solamente den congregacion. Pablo a bisa: “Nos kier comporta nos mes na un manera honesto den tur cos.” (Hebreonan 13:18) Nos Creador ta haya masha importante pa nos ta honesto den tur asunto di negoshi, sin importa cu ken nos ta hacie. E buki di Proverbionan so caba ta menciona cuater biaha e necesidad di uza balansa exacto. (Proverbionan 11:1;  16:11; 20:10, 23) Den antiguedad, hende tabata uza balansa y peso tanto pa cumpra y bende producto como pa confirma e peso di e placa cu nan tabata uza pa paga cu ne. Hopi comerciante tabata estafa nan clientenan uzando dos set di peso y un balansa cu no tabata exacto. c Pero Jehova ta odia e practicanan ey! Si nos kier keda den su amor, nos tin cu evita tur tipo di fraude den negoshi.

16, 17. Cua ta algun practica deshonesto cu ta masha comun den mundo, y kico cristiannan berdadero ta determina pa haci?

¹⁶ Satanas ta e gobernante di e mundo aki, pesey no ta straña nos cu tur caminda nos ta mira practicanan deshonesto. Kisas tur dia nos ta haya nos cu e tentacion pa comete deshonestidad. Awendia, ora hende ta bay solicita pa trabou, ta normal pa nan gaña, exagera, inventa referencia, falsifica diploma y hasta gaña tocante nan experencia di trabou. Ora hende ta yena papel di inmigracion, belasting, seguro y cosnan por el estilo, hopi biaha nan ta duna informacion incorecto pa haya loke nan kier. Hopi mucha di scol ta spiek ora di examen. Of si nan tin cu skirbi un articulo pa scol, nan ta subi Internet, djis copia loke nan haya eynan y present’e como nan trabou. Anto hopi biaha ora hende tin cu trata cu funcionario corupto, nan ta pasa esakinan placa bou di mesa pa haya loke nan kier. Pero nos no por spera nada otro den un mundo den cua asina tanto hende ta “stima nan mes, stima placa” y ta “sin amor pa loke ta bon.”—2 Timoteo 3:1-5.

¹⁷ Cristiannan berdadero ta determina pa no practica ningun di e cosnan ey. Un motibo pakico no ta facil pa keda honesto ta cu den e mundo djawe ta net hende tramposo ta parce di tin exito, y hasta ta bay dilanti, mientras  cu cristiannan ta sufri perdida financiero pasobra nan kier keda honesto “den tur cos.” (Salmo 73:1-8) Acaso e sacrificionan ey ta bale la pena? Claro cu si! Den ki sentido? Ki beneficionan nos ta ricibi ora nos ta honesto?

18. Dicon e reputacion di ta un hende honesto ta di gran balor?

¹⁸ Den bida tin masha poco cos mas valioso cu e reputacion di ta un persona honesto y confiabel. (Wak e cuadro “ Mi Ta Realmente Honesto?”) Tur hende por desaroya un bon reputacion asina! E no ta depende di bo talento, rikesa, apariencia, posicion social ni di otro factor cu ta fuera di bo control. Pero toch, e fama di ta honesto y confiabel ta un tesoro cu poco hende tin. (Mikeas 7:2) Podise tin hende ta haci bofon di bo pasobra bo ta honesto, pero otronan lo aprecia bo honestidad, y nan lo respeta bo y confia bo. Hopi Testigo di Jehova hasta a beneficia financieramente pasobra nan ta honesto. Con asina? Wel, ora cu empleadonan deshonesto a haya retiro, nan si a keda cu nan trabou. Den otro casonan, nan a haya trabou pasobra urgentemente tabatin mester di empleado honesto.

19. Ki influencia un bida honrado tin riba nos consenshi y riba nos relacion cu Jehova?

¹⁹ Aunke kisas bo no haya e beneficionan menciona ariba, tin otro beneficio mas importante cu sigur un bida honrado lo trece cu ne. Pa cuminsa, lo bo tin e satisfaccion di tin un bon consenshi. Pablo a skirbi: “Nos tin e confianza cu nos tin un consenshi limpi.” (Hebreonan 13:18) Ademas, bo por tin sigur cu nos Tata celestial ta tuma bon nota di bo reputacion, y e stima hende honesto. (Salmo 15:1, 2; Proverbionan 22:1) Pues, sea honesto. Esey lo yuda bo keda den e amor di Dios, y no tin un recompensa mas grandi cu esey. Laga nos ban analisa awor un asunto relaciona cu e topico aki: Jehova su punto di bista di trabou..