Nacemento di un baby por trece hopi alegria pa e mayornan y na mes momento esaki por pone nan sinti cu nan a haya un responsabilidad sumamente grandi. Ora boso bira tata y mama, boso lo por keda sorprendi cu gran parti di boso tempo y energia ta bay na e baby. Perdemento di soño y cambionan emocional por trece tension den boso matrimonio. Pesey, boso tur dos tin cu haci ahuste pa boso por cuida e baby y boso matrimonio. Con Bijbel por yuda boso enfrenta e retonan aki?

LOKE BIJBEL TA BISA: “Amor tin pasenshi y ta bondadoso.” Amor “no ta busca su mes interes, [ni] e no ta rabia lihe.” (1 Corintionan 13:4, 5) Ora bo caba di haya yiu, ta normal cu tur bo atencion ta bay pa bo baby. Pero esey por pone bo esposo sintie neglisha; pesey, no lubida cu e tambe tin mester di bo atencion. Tene pasenshi y trat’e cu bondad pa e sinti cu bo tin mester di dje y cu bo ta aprecia su yudansa den cuido di boso yiu.

“Esposonan, sigui biba cu boso esposanan segun conocemento.” (1 Pedro 3:7) Como esposo, bo mester compronde cu bo casa tin cu dedica gran parti di su energia na cuido di boso baby. Y kisas debi na e responsabilidad nobo aki, e ta haya stress, e ta cansa of hasta ta bira deprimi. Dado momento e por hasta rabia cu bo. Pero purba di keda trankil, pasobra “esun cu no ta rabia lihe ta mihor cu e poderoso.” (Proverbionan 16:32) Compronde p’e y dun’e e sosten cu e tin mester.—Proverbionan 14:29.

LOKE BO POR HACI:

• Tatanan: Yuda bo esposa cuida e baby, hasta anochi tambe. Dedica menos tempo na otro actividad pa bo por pasa mas tempo cu bo casa y boso baby

• Mamanan: Ora bo esposo ofrece pa yuda bo cu e baby, acepta su yudansa. Si e no haci algo perfectamente, no critic’e; mustr’e bondadosamente con pa mehora

LOKE BIJBEL TA BISA: “Nan lo bira un carni.” (Genesis 2:24) Pues, a pesar cu boso tin un miembro nobo den famia, keda corda cu ainda abo cu bo casa ta “un carni.” Haci tur boso esfuerso pa boso relacion cu otro no debilita.

Esposa, keda contento cu e yudansa y sosten di bo esposo. Bo palabranan di gratitud por trece “curamento.” (Proverbionan 12:18) Esposo, bisa bo esposa cuanto bo ta stim’e y balor’e. Elogi’e pa loke e ta haci pa e famia.—Proverbionan 31:10, 28.

“Laga cada hende sigui busca, no su mes beneficio, sino esun di e otro persona.” (1 Corintionan 10:24) Semper haci loke ta mihor pa bo casa. Como pareha, tuma tempo pa combersa cu otro, pa elogia otro y pa scucha otro. Y ora ta trata di relacion sexual, no sea egoista. Tene cuenta cu necesidad di bo casa. Bijbel ta bisa: “No nenga di cumpli cu e deber ey pa cu otro” a menos cu ta “cu consentimento di otro.” (1 Corintionan 7:3-5) Pues, papia francamente cu otro riba e topico aki. Mustra pasenshi y consideracion pa otro y boso lo fortalece boso relacion.

LOKE BO POR HACI:

• Corda cu boso dos mester dedica tempo na otro

• Mustr’e cu bo ta stim’e; por ehempel, bo por dun’e un regalo chikito of mand’e un mensahe

LOKE BIJBEL TA BISA: “For di chikito bo conoce e scrituranan santo cu por haci bo sabi pa salbacion.” (2 Timoteo 3:15) Plania con boso ta bay siña boso baby. Su capacidad pa siña ta impresionante, hasta prome cu e nace. For di den bariga e por reconoce boso stem y reacciona riba boso emocionnan. Lesa p’e for di ora e ta baby. Maske kisas e no ta compronde loke boso ta lesa, esey por pone cu ora e bira grandi e lo gusta lesa.

No pensa cu boso baby ta mucho chikito pa boso papia cu ne tocante Dios. Lag’e scucha boso haci oracion na Jehova. (Deuteronomio 11:19) Hasta ora boso ta hunga cu ne, papia cu ne tocante e cosnan cu Dios a traha. (Salmo 78:3, 4) Segun cu e ta crece, lo e sinti e amor cu boso tin pa Jehova y e tambe lo siña stima Jehova.

LOKE BOSO POR HACI:

• Pidi Jehova specificamente pa duna boso sabiduria pa siña boso baby

• Ripiti palabra- y ideanan importante di manera cu boso baby por cuminsa siña nan mas pronto posibel