LES 34

Kico Nos Por Haci pa Mustra Jehova Cu Nos Ta Stim’e?

PLAY

Bo curso di Bijbel a yuda bo stima Dios mas ainda? Lo bo tin gana di haci bo amistad cu ne mas fuerte? Si esey ta e caso, corda cu ora Jehova mira bo amor p’e crece, su amor pa bo tambe lo crece y lo e cuida bo mas ainda. Con bo por mustra Jehova cu bo ta stim’e?

1. Con nos ta mustra Jehova cu nos ta stim’e?

Nos ta mustra Jehova cu nos ta stim’e ora nos ta obedec’e. (Lesa 1 Juan 5:3.) Jehova no ta obliga ningun hende pa obedec’e. Al contrario, e ta duna cada un di nos e oportunidad pa scoge si nos kier obedec’e of no. Dicon e ta haci esey? Pasobra Jehova kier pa nos ta “obediente di curason.” (Romanonan 6:17) Cu otro palabra, e no kier pa bo obedec’e pasobra bo ta sinti bo obliga pa haci esey, sino pasobra bo ta stim’e. Parti 3 y 4 di e buki aki lo yuda bo mira cu bo por mustra Jehova cu bo ta stim’e ora bo haci loke ta agrad’e y evita loke e ta odia.

2. Dicon por ta dificil pa bo mustra Jehova cu bo ta stim’e?

Bijbel ta bisa: “Un persona husto ta hay’e cu hopi dificultad.” (Salmo 34:19) Nos tur ta lucha cu nos propio imperfeccionnan. Ademas, nos tin cu trata cu problema economico, inhusticia y otro dificultad. Ora nos ta pasa den dificultad, por ta dificil pa haci loke Jehova ta pidi di nos. Esey ta asina pasobra por parce cu ta mas facil pa haci loke no ta bon cu obedece Jehova. Pero ora bo confia den Jehova y haci loke e ta bisa, bo ta mustr’e cu bo ta stim’e mas cu tur otro cos. Di e manera ey, lo bo mustra cu bo ta leal na dje y Jehova na su turno tambe lo ta leal na bo. Hamas lo e bandona bo.—Lesa Salmo 4:3.

KICO MAS NOS POR SIÑA?

Laga nos wak dicon Jehova ta bira contento ora nos ta obedec’e y kico por yuda nos keda leal na dje.

3. Un acusacion cu ta envolve abo

Den e buki di Job, nos ta mira cu Satanas a lansa un acusacion contra Job y tur otro hende cu kier sirbi Jehova. Lesa Job 1:1, 6–2:10. Despues, analisa e siguiente preguntanan:

Segun Satanas, pa ki motibo Job tabata obedece Jehova?—Wak Job 1:9-11.
Ki acusacion Satanas a lansa contra tur hende, cu ta inclui abo tambe?—Wak Job 2:4.

Lesa Job 27:5b. Despues, analisa e siguiente pregunta:

Con Job a demostra cu di berdad e tabata stima Jehova?

Job a demostra cu e tabata stima Jehova door di keda leal na dje

Nos ta demostra cu nos ta stima Jehova door di keda leal na dje

4. Haci Jehova su curason contento

Lesa Proverbionan 27:11. Despues, analisa e siguiente preguntanan:

Con Jehova ta sinti ora nos tuma decision sabi y obedec’e? Dicon Jehova ta sinti asina?

5. Bo por keda leal na Jehova

Nos amor pa Jehova ta motiva nos pa papia cu otro hende tocante dje. Ademas, como cu nos kier ta leal na Jehova, nos lo papia tocante dje hasta ora no ta facil. Pasa e VIDEO. Despues, analisa e siguiente preguntanan:

VIDEO: Defendé Bo Fe Apesar di Oposishon (5:09)

Bo sa sinti cu ta dificil pa papia cu otro hende tocante Jehova?
Segun e video, kico a yuda Grayson vence su miedo?

Ta mas facil pa nos ta leal na Jehova ora nos ta stima loke e ta stima y odia loke e ta odia. Lesa Salmo 97:10. Despues, analisa e siguiente preguntanan:

Si bo pensa riba tur loke bo a siña te cu awor, kico ta algun cos cu Jehova ta stima y kico ta algun cos cu e ta odia?
Con bo por siña stima loke ta bon y odia loke ta malo?

6. Ora nos ta obedece Jehova, esey ta beneficia nos

Semper ta mihor pa nos obedece Jehova. Lesa Isaias 48:17, 18. Despues, analisa e siguiente preguntanan:

Bo ta pensa cu Jehova semper sa loke ta mihor pa nos? Dicon bo ta pensa esey?
Con bo a beneficia te cu awor di bo curso di Bijbel y di tur loke bo a siña tocante, e Dios berdadero, Jehova?

LOKE HENDE SA BISA: “Dios no ta worry cu loke mi ta haci.”