Maldad a cuminsa riba tera na momento cu Satanas a lansa e prome mentira. Na principio, Satanas tabata un angel perfecto, pero “e no a keda firme den e berdad.” (Juan 8:44) Na dado momento, el a cuminsa haya e deseo pa hende ador’e, algo cu Dios so tabatin derecho riba dje. Satanas a gaña Eva, e prome muher, y a convenc’e pa e desobedece Dios. Mescos cu Eva, Adam tambe a desobedece Dios, y esey a hiba na sufrimento y morto pa tur nan descendientenan.—Lesa Genesis 3:1-6, 19.

Ora Satanas a instiga Eva pa desobedece Dios, el a rebela contra e soberania di Dios, esta, contra e derecho cu Dios tin di goberna como e Haltisimo. Mayoria di hende a tuma parti pa Satanas y a rechasa Dios como nan Gobernante. Asina Satanas a bira “e gobernante di mundo.”—Lesa Juan 14:30; 1 Juan 5:19.

Tur e obranan di Dios ta perfecto. Dios a crea tanto hende como angel cu e capacidad di obedec’e na un manera perfecto. (Deuteronomio 32:4, 5) Dios a crea nos cu e libertad di scoge entre bon y malo. E libertad ey ta duna nos oportunidad pa demostra nos amor pa Dios.—Lesa Santiago 1:13-15; 1 Juan 5:3.

Pa un tempo, Jehova a tolera e rebeldia contra su derecho di goberna. Dicon? Pa mustra cu cualkier esfuerso cu hende haci pa goberna nan mes sin Dios no ta beneficia nan. (Eclesiastes 7:29;  8:9) Anto 6.000 aña di historia humano ta confirma esey bon cla. Gobiernonan humano no a logra caba cu guera, crimen, inhusticia ni maleza.—Lesa Jeremias 10:23; Romanonan 9:17.

Contrario na gobernacion di hende, e gobernacion di Dios si ta beneficia esnan cu acept’e. (Isaias 48:17, 18) Pronto Jehova lo destrui tur gobierno di mundo. Ta hende cu scoge Dios como nan Gobernante so lo keda biba riba tera.—Isaias 11:9.—Lesa Daniel 2:44.

Segun Satanas, hende ta sirbi Jehova pa motibonan egoista. Lo bo kier duna prueba cu esey ta un mentira? Bo por! E pasenshi di Dios ta duna cada un di nos oportunidad pa demostra si nos ta prefera e gobernacion di Dios of esun di hende. Con nos por demostra esey? Na e manera cu nos ta hiba nos bida.—Lesa Job 1:8-12; Proverbionan 27:11.

Nos por haci esey ora nos ta busca manera pa haya sa cua ta e adoracion cu ta basa su siñansanan riba e Palabra di Dios y biba na harmonia cu esaki. (Juan 4:23) Mescos cu Hesus, nos por rechasa Satanas como gobernante ora nos no ta mete den politica ni apoya guera.—Lesa Juan 17:14.

Satanas ta uza su poder pa laga hende haci cosnan inmoral y perhudicial. Ora nos nenga di haci e cosnan ey, algun di nos amigo- y famianan por cuminsa haci bofon di nos of bay contra nos. (1 Pedro 4:3, 4) Pues, nos tin cu tuma un decision. Nos lo join e hendenan cu ta stima Dios? Nos lo obedece Dios su leynan cu ta refleha su sabiduria y amor pa nos? Si nos haci e cosnan aki, nos ta duna prueba cu ta gaña Satanas a gaña ora el a bisa cu hende lo no obedece Dios na momento cu nan haya nan cu dificultad.—Lesa 1 Corintionan 6:9, 10; 15:33.

E amor cu Dios tin pa humanidad ta un garantia cu pronto lo e pone fin na maldad y sufrimento. Hende cu demostra cu nan ta kere esaki lo disfruta di bida riba tera pa semper.—Lesa Juan 3:16.