HENDE cu ta kere den e siñansa di Trinidad ta bisa cu Dios ta consisti di tres persona: e Tata, e Yiu y e Spirito Santo. Nan ta bisa cu cada un di e tres personanan aki ta igual cu otro, todopoderoso y sin un principio. Pues segun e doctrina di Trinidad, e Tata ta Dios, e Yiu ta Dios y e Spirito Santo ta Dios, sinembargo ta un solo Dios tin.

 Hopi hende cu ta kere den Trinidad ta admiti cu nan no por splica e siñansa aki. Pero toch kisas nan ta di opinion cu Bijbel ta siñ’e. Ta bon pa tuma nota cu e palabra “Trinidad” no ta aparece ningun caminda den Bijbel. Pero acaso bo ta haya e idea di Trinidad den Bijbel? Pa contesta e pregunta aki, laga nos considera un texto biblico cu hopi biaha hende ta cita pa apoya Trinidad.

Huan 1:1 ta declara: “Na principio tawata e Palabra, y e Palabra tawata cu Dios, y e Palabra tawata Dios.” Mas despues den e mesun capitulo, apostel Huan a mustra bon cla cu “e Palabra” ta Hesus. (Huan 1:14) Sinembargo, como cu versiculo 1 ta yama e Palabra Dios, tin hende ta conclui cu e Yiu y e Tata mester ta forma parti di e mesun Dios.

Corda cu e parti aki di Bijbel originalmente tawata skirbi na Griego. Despues, traductornan a traduci e texto Griego na otro idioma. Sinembargo, varios traductor di Bijbel no a uza e frase “e Palabra tawata Dios.” Dicon no? Basa riba nan conocemento di e Griego cu a wordo uza pa skirbi Bijbel, e traductornan ei a conclui cu mester traduci e frase “e Palabra tawata Dios” na un otro manera. Con? At’aki algun ehempel: “E Logos [Palabra] tawata divino.” (A New Translation of the Bible) “E Palabra tawata un dios.” (The New Testament in an Improved Version) “E Palabra tawata cu Dios y a comparti su naturalesa.” (The Translator’s New Testament) Segun e traduccionnan aki, e Palabra no ta Dios mes. * Mas bien, debi na e Palabra su posicion halto entre e criaturanan di Yehova, Bijbel ta referi na dje como “un dios.” Aki e palabra “dios” ta nifica “e poderoso.”

Mayoria hende no conoce e Griego cu a wordo uza pa skirbi Bijbel. Pues con bo por sa kico realmente apostel Huan tawata kiermen? Pensa riba e ehempel aki: Un docente ta splica un  materia na su alumnonan. Despues, e alumnonan ta varia di opinion con mester compronde e splicacion. Con e alumnonan por resolve e asunto? Nan lo por pidi e docente pa duna mas informacion. Sin duda, si nan haya sa mas echo esei lo por yuda nan compronde e materia mas mihor. Asina tambe, pa capta e nificacion di Huan 1:1, bo por wak den e Evangelio di Huan pa haya mas informacion tocante e posicion di Hesus. Door di haya sa mas echo tocante e materia aki, lo bo por saca e conclusion corecto.

Por ehempel, considera loke Huan a skirbi mas aleu den capitulo 1, versiculo 18: “Ningun hende no a mira Dios [Todopoderoso] nunca.” Sinembargo, hende a mira Hesus, e Yiu, pasobra Huan a bisa: “E Palabra [Hesus] a bira carni y a biba meimei di nos, y nos a mira su gloria.” (Huan 1:14) Con anto e Yiu por ta un parti di Dios Todopoderoso? Huan a declara tambe cu e Palabra tawata “cu Dios.” Pero con un individuo por ta cu un persona y na mesun tempo ta e persona ei? Ademas, manera ta para skirbi na Huan 17:3, Hesus a haci un distincion bon cla entre su mes y su Tata celestial. El a yama su Tata “e unico Dios berdadero.” Y na fin di su Evangelio, Huan a bisa en resumen: “Esakinan a wordo skirbi pa boso kere cu Hesus ta e Cristo, e Yiu di Dios.” (Huan 20:31) Tuma nota cu el a yama Hesus e Yiu di Dios, no Dios. E informacion adicional aki cu e Evangelio di Huan ta duna ta mustra con lo mester compronde Huan 1:1. Hesus, e Palabra, ta “un dios” den e sentido cu e tin un posicion halto pero e no ta mescos cu Dios Todopoderoso.

Pensa un biaha mas riba e ehempel di e docente y e alumnonan. Imagina cu algun alumno a keda cu duda, asta despues di a scucha e splicacion adicional cu e docente a duna. Kico nan lo por haci? Nan lo por acudi na un otro docente pa busca mas informacion riba e mesun materia. Si e di dos docente confirma e splicacion di esun prome, e dudanan di mayoria alumno por kita. Asina tambe, si bo no ta sigur ta kico e escritor biblico Huan tawata bisa realmente tocante e  relacion entre Hesus y Dios Todopoderoso, lo bo por acudi na un otro escritor biblico pa busca mas informacion. Considera por ehempel loke Mateo a skirbi. El a cita loke Hesus a bisa relaciona cu fin di e sistema di cosnan aki: “Ma di e dia y e ora ei ningun hende no sa, ni e angelnan di shelo tampoco, ni e Yiu, sino e Tata so.” (Mateo 24:36) Con e palabranan aki ta confirma cu Hesus no ta Dios Todopoderoso?

Hesus ta bisa cu e Tata sa mas cu e Yiu. Sinembargo, si Hesus tawata un parti di Dios Todopoderoso, lo e tawata sa tur cos cu su Tata sa. Pues anto, e Yiu y e Tata no por ta igual. Pero tin hende ta bisa: ‘Hesus tawatin dos naturalesa. Aki e ta papia como hende.’ Pero asta si tawata asina, kico di e spirito santo? Si e ta parti di e mesun Dios cu e Tata, dicon Hesus no ta bisa cu e spirito santo sa loke e Tata sa?

Segun cu bo ta sigui cu bo estudio di Bijbel, lo bo familiarisa bo mes cu mas texto di Bijbel cu tin di aber cu e materia aki. Nan ta confirma e berdad tocante e Tata, e Yiu y e spirito santo.—Salmo 90:2; Echonan 7:55; Colosensenan 1:15.