‘Un Lucha Contra Forsanan Spiritual di Maldad’
CAPITULO OCHO
‘Un Lucha Contra Forsanan Spiritual di Maldad’
1. Dicon e actividad di mal spirito ta interesa nos specialmente?
HOPI hende ta haci bofon di e idea cu ta existi mal spirito. Pero esei no ta cos di haci wega cu ne. Sea cu hende ta kere of no, mal spirito ta existi, y nan ta purba pone presion riba tur hende. Adorado di Yehova no ta un excepcion. De echo, nan ta e blanco principal. Apostel Pablo ta spierta nos di esaki, bisando: “Nos lucha no ta contra carni y sanger, sino contra e gobernantenan [invisibel], contra e podernan, contra e forsanan mundial di e scuridad aki, contra e forsanan spiritual di maldad den e luganan celestial.” (Efesionan 6:12) Den nos tempo e presion cu mal spirito ta eherce a yega su punto maximo pasobra Satanas a ser saca for di shelo y e ta furioso, sabiendo cu a ked’e un poco tempo.—Revelacion 12:12.
2. Con nos por gana e lucha contra spiritonan sobrehumano?
2 Ta posibel gana un lucha contra forsanan spiritual sobrehumano? Si, pero solamente door di confia completamente den Yehova. Nos tin cu scucha Dios y obedece su Palabra. Door di haci esei nos por evita un gran parti di e daño fisico, moral y emocional cu hende bou di control satanico ta sufri.—Santiago 4:7.
Gobernantenan Mundial den Luganan Celestial
3. Ken Satanas ta opone cruelmente, y di ki manera?
3 Na un manera bibo Yehova ta describi pa nos e situacion mundial cu E ta mira desde su posicion den shelo. El a duna apostel Huan un vision den cua Satanas ta ser presenta como “un dragon grandi, cora.” E tawata cla pa, si ta posibel, devora e Reino Mesianico di Dios asina cu esaki a nace den shelo na aña 1914. Fracasando den e intento ei, Satanas a lansa un ola di oposicion cruel contra e representantenan di e Reino ei riba tera. (Revelacion 12:3, 4, 13, 17) Con Satanas lo a bringa su guera? Via su propio representantenan humano.
4. Ken ta fuente di e poder di gobiernonan humano, y con nos sa esei?
4 Despues Huan a mira den vision un bestia salbahe cu shete cabes y dies cacho, un bestia cu tawatin autoridad “riba tur tribu y pueblo y lenga y nacion.” E bestia ei ta representa henter e sistema politico di mundo. Huan a ser informa cu “e dragon [Satanas e Diabel] a dun’e su poder y su trono y gran autoridad.” (Revelacion 13:1, 2, 7) Si, ta Satanas ta fuente di e poder y autoridad di gobiernonan humano. Pesei, manera apostel Pablo a skirbi, e berdadero “forsanan mundial” ta “forsanan spiritual di maldad den e luganan celestial”, cu ta controla gobiernonan humano. Tur hende cu kier adora Yehova mester comprende tur loke esei ta encera.—Lucas 4:5, 6.
5. Na kico e gobernantenan politico actual ta ser reuni?
5 Aunke hopi gobernante politico ta bisa cu nan ta religioso, ningun nacion no ta somete nan mes na Yehova su gobernacion of na esun di su Rei nombra, Hesucristo. Nan tur ta hiba un lucha tenaz pa keda na poder. Awe, manera e relato di Revelacion ta mustra, ‘spiritonan di demoño’ ta reuniendo e gobernantenan di mundo pa “e guera di e gran dia di Dios Todopoderoso” na Armagedon.—Revelacion 16:13, 14, 16; 19:17-19.
6. Dicon nos mester tene cuidou pa nos no ser manipula pa duna apoyo na e sistema satanico?
6 Tur dia, conflictonan politico, social, economico y religioso ta afecta bida di hende y ta causa desunion den e famia humano. Den e conflictonan aki, ta comun pa hende tuma parti (sea cu palabra of accion) pa e nacion, tribu, grupo di idioma of clase social na cua nan ta pertenece. Asta ora hende no ta directamente envolvi den un conflicto, hopi bes nan ta tuma parti pa un di e partidonan. Pero sea nan ta apoya un persona of un causa, ta na ken realmente nan ta dunando apoyo? Bijbel ta bisa bon cla: “Henter mundo ta bou di control di e malbado.” (1 Huan 5:19) Pues anto, con un persona por evita di ser engaña manera e resto di humanidad? Solamente door di duna su pleno apoyo na e Reino di Dios y door di keda completamente neutral den conflictonan di mundo.—Huan 17:15, 16.
Metodonan Astuto di e Malbado
7. Con Satanas su astucia ta sali na cla den e manera cu e ta uza religion falso?
7 Den tur epoca di historia, Satanas a uza persecucion verbal of fisico pa kita hende for di adoracion berdadero. Tambe el a uza medionan mas sutil, trikinan mañoso y metodonan astuto. Ingeniosamente el a mantene un gran parti di humanidad den ignorancia pa medio di religion falso, y a laga nan kere cu nan ta sirbi Dios. Hende asina no tin e conocemento exacto di Dios y amor pa e berdad, y pesei kisas nan ta sinti nan atrai na e sirbishinan religioso misterioso y emocional of ta keda impresiona cu obranan poderoso. (2 Tesalonicencenan 2:9, 10) Pero Bijbel ta spierta nos cu asta entre esnan cu un tempo a participa den adoracion berdadero, “algun lo cai for di fe, door di paga atencion na spiritonan engañoso y doctrinanan di demoñonan.” (1 Timoteo 4:1) Con esei por sosode?
8. Con Satanas por atrae nos na religion falso maske nos ta adorando Yehova?
8 Astutamente, Diabel ta probecha di nos debilidadnan. Ainda miedo di hende ta domina nos? Den tal caso, nos por entrega na presion di famia of biciña pa participa den practicanan cu ta origina di religion falso. Nos ta orguyoso? Den tal caso, nos por sinti nos ofendi ora nos ricibi conseho of ora otro hende no ta acepta e ideanan cu nos ta boga p’e. (Proverbionan 15:10; 29:25; 1 Timoteo 6:3, 4) En bes di ahusta nos punto di bista pa e cuadra cu e ehempel di Cristo, kisas nos ta tende mas lihe di esnan cu ta “kishiki” nos horea bisando cu djis lesa Bijbel y biba decente sin haci malo ta basta. (2 Timoteo 4:3) Pa Satanas, no ta importante si nos ta join un otro grupo religioso of ta djis sigui nos propio forma di religion; basta nos no adora Yehova na e manera cu Dios ta manda via su Palabra y su organisacion.
9. Con Satanas ta uza hende su deseo natural pa tene relacion sexual, na un manera mañoso pa logra su meta?
9 Tambe Satanas ta uza maña pa tenta hende pa satisface deseonan normal den un manera incorecto. El a haci esaki cu e deseo pa tene relacion sexual. Hopi hende den mundo ta rechasa e moralidad di Bijbel y ta considera relacion sexual entre hende cu no ta casa como un placer legitimo of un forma di mustra cu nan ta adulto. Y kico di hende casa? Hopi di nan ta comete adulterio. Y asta ora no tin infidelidad den e matrimonio, un cantidad di persona ta busca diborcio of ta separa pa nan por bai biba cu un otro hende. Satanas su metodo sutil ta di trata na influencia hende pa biba pa placer awor. E ta pone nan ignora e efectonan di largo alcanse cu esei tin no solamente riba nan mes y riba otronan, sino specialmente riba nan relacion cu Yehova y su Yiu.—1 Corintionan 6:9, 10; Galationan 6:7, 8.
10. Ki medionan Satanas ta uza pa debilita nos actitud pa cu inmoralidad sexual y violencia?
10 Un otro deseo natural ta e deseo pa dibirticion. Ora dibirticion ta sano, e por ta fisicamente, mentalmente y emocionalmente refrescante. Pero con nos ta reacciona ora Satanas astutamente ta uza ocasionnan di relahamento pa purba desvia nos forma di pensa for di esun di Dios? Por ehempel, nos sa cu Yehova ta odia inmoralidad sexual y violencia. Ora pelicula, programa di television of shownan di teater ta presenta e cosnan ei, nos ta keda sinta hewon asina y sigui wak? Corda tambe cu Satanas lo percura pa e cosnan ei bira mas y mas degrada segun cu su destruccion ta acerca, ya cu “hendenan malbado y gañadonan lo bai di malo pa piyo, gañando y siendo gaña.” (2 Timoteo 3:13) Pues, nos mester vigila constantemente contra e trampanan di Satanas.—Genesis 6:13; Salmo 11:5; Romanonan 1:24-32.
11. Den ki maneranan asta un persona cu sa e berdad tocante spiritismo por cai den trampa si e no keda alerta?
11 Nos sa tambe cu hende cu ta practica cualkier forma di spiritismo—wakmento di destino, bruheria of purba haya contacto cu defuntonan—ta abominabel pa Yehova. (Deuteronomio 18:10-12) Cu esaki na mente, nos lo no pensa mes di consulta spiritista, y sigur nos lo no acepta nan den nos cas pa practica nan artenan demoniaco. Pero nos lo scucha nan si nan aparece riba nos pantaya di television of riba Internet? Aunke nunca nos lo acepta tratamento di un curandero, nos lo mara hilo na pols di nos yiu resien naci, cu e pensamento cu esei di un manera of otro lo proteh’e di daño? Sabiendo cu Bijbel ta condena hende cu ta plega otro (of mara un hende cu bruheria), nos lo permiti un hipnotisado tuma control di nos mente?—Galationan 5:19-21.
12. (a) Con Satanas ta uza musica pa pone nos pensa riba ideanan cu nos sa cu ta robes? (b) Con un persona su paña, estilo di cabei of sistema di papia por indica un admiracion pa hende cu tin un estilo di bida cu Yehova no ta aproba? (c) Kico nos mester haci di nos banda si nos kier evita di bira victima di Satanas su metodonan astuto?
12 Bijbel ta bisa pa no laga inmoralidad sexual ni ningun sorto di impuresa ni sikiera ser menta (cu mal motibo) entre nos. (Efesionan 5:3-5) Pero kico si e topiconan ei ta acompaña pa musica cu tin un dushi melodia, un ritmo pegahoso of un ‘beat’ penetrante? Acaso nos lo cuminsa ripiti letranan cu ta pinta sex sin ta casa, uzo di droga pa placer y otro actonan pecaminoso como algo bon? Of maske nos sa cu nos no mester imita e manera di biba di hende cu ta practica tal cosnan, nos tin e tendencia di kier ta manera nan door di imita nan manera di bisti, nan estilo di cabei of nan sistema di papia? E metodonan cu Satanas ta uza pa tenta hende pa actua conforme cu su manera corumpi di pensa ta masha astuto! (2 Corintionan 4:3, 4) Pa nos no bira victima di su metodonan astuto, nos tin cu evita di laga mundo hiba nos. Nos tin cu tene na mente ken “e forsanan mundial di e scuridad aki” ta, y lucha tenazmente contra nan influencia.—1 Pedro 5:8.
Ekipa pa Ta Vencedo
13. Con ta posibel pa cada un di nos, cu nos imperfeccionnan, vence e mundo cu Satanas ta goberna?
13 Prome cu su morto, Hesus a bisa su apostelnan: “Tene curashi, mi a vence mundo.” (Huan 16:33) Nan tambe por tawata vencedo. Un 60 aña despues, apostel Huan a skirbi: “Ta ken ta esun cu ta vence mundo, si no ta esun cu ta kere cu Hesus ta e Yiu di Dios?” (1 Huan 5:5) Nos ta demostra tal fe door di obedece e mandamentonan di Hesus y door di confia den e Palabra di Dios, manera Hesus a haci. Kico mas nos mester haci? Nos tin cu keda pega cu e congregacion di cua e ta Cabes. Ora nos comete un pica, nos tin cu repenti sinceramente y busca Dios su pordon a base di e sacrificio di Hesus. Di e manera aki nos tambe por ta vencedo, apesar di nos imperfeccion y erornan.—Salmo 130:3, 4.
14. Lesa Efesionan 6:13-17, y uza e preguntanan y textonan biblico cu tin den e paragraf aki como base pa considera e beneficionan di cada parti di e armadura spiritual.
14 Pa nos tin exito, nos tin cu bisti “e armadura completo di Dios”, sin neglisha ni un solo parti di dje. Por fabor, habri bo Bijbel na Efesionan 6:13-17, y lesa e descripcion cu e ta duna di e armadura ei. Anto, contestando e preguntanan aki bou, considera con bo por beneficia di e proteccion cu cada parti di e armadura ta duna.
“Hep faha cu berdad”
Maske nos conoce e berdad, con studio regular, meditacion riba berdadnan biblico y asistencia na reunion ta proteha nos? (1 Corintionan 10:12, 13; 2 Corintionan 13:5; Filipencenan 4:8, 9)
“Corasa di husticia”
Ken su norma di husticia esaki ta? (Revelacion 15:3)
Duna ehempel con ora un hende keda sin sigui Yehova su normanan husto, e ta perhudica su mes spiritualmente. (Deuteronomio 7:3, 4; 1 Samuel 15:22, 23)
‘Pianan bisti cu e evangelio di pas’
Si nos tene nos pianan ocupa hibando nos pa bai papia cu hende tocante Dios su areglo pa pas, con esei lo proteha nos? (Salmo 73:2, 3; Romanonan 10:15; 1 Timoteo 5:13)
“Escudo di fe”
Si nos fe tin un fundeshi firme, con nos lo reacciona ora nos ta confronta intentonan pa pone nos duda of haya miedo? (2 Reinan 6:15-17; 2 Timoteo 1:12)
“Helm di salbacion”
Con e speransa di salbacion ta yuda un hende evita di cai den e trampa di ta demasiado precupa cu posesionnan material? (1 Timoteo 6:7-10, 19)
“Spada di e spirito”
Riba kico nos mester depende semper ora nos ta resisti e atakenan contra nos spiritualidad of e spiritualidad di otro hende? (Salmo 119:98; Proverbionan 3:5, 6; Mateo 4:3, 4)
Kico mas ta vital pa nos por tin exito den e guera spiritual? Cu ki frecuencia nos tin cu uz’e? Y na fabor di ken? (Efesionan 6:18, 19)
15. Con nos por tuma iniciativa den e guera spiritual?
15 Como solda di Cristo, nos ta parti di un ehersito grandi cu ta participando den un guera spiritual. Si nos keda alerta y haci bon uzo di e armadura completo di Dios, nos lo no bira victima den e guera aki. Mas bien, nos lo ta un yudansa fortalecedor pa nos compañeronan cu ta sirbi Dios. Nos lo ta cla y ansioso pa tuma iniciativa den e lucha, plamando e bon noticia di e Reino Mesianico di Dios, e gobierno celestial cu Satanas ta opone asina violentamente.
Como Repaso
• Dicon adoradonan di Yehova ta keda completamente neutral den conflictonan di mundo?
• Cua ta algun di e metodonan astuto cu Satanas ta uza pa hiba Cristiannan na ruina spiritual?
• Con e armadura spiritual cu Dios ta duna, ta proteha nos den nos guera spiritual?
[Preguntanan di Estudio]
[Plachi na pagina 76]
E nacionnan ta ser reuni pa Armagedon
