Scucha Conseho, Acepta Disiplina
Capitulo Diessinco
Scucha Conseho, Acepta Disiplina
1. (a) Dicon nos tur tin mester di conseho y disiplina? (b) Ki pregunta nos tin cu considera?
“NOS tur ta trompica na hopi manera”, Bijbel ta bisa na Santiago 3:2. Nos por pensa di hopi ocasion cu nos tawata leu for di loke e Palabra di Dios kier pa nos ta. Pesei nos ta reconoce cu Bijbel tin rason ora e ta bisa: “Scucha conseho y acepta disiplina, pa bo por ta sabi pa resto di bo bida.” (Proverbionan 19:20) Sin duda nos a haci algun cambio caba den nos bida pa e ta mas na harmonia cu e siñansanan di Bijbel. Pero con nos ta reacciona si un compañero Cristian conseha nos riba un asunto spesifico?
2. Kico nos mester haci ora nos ricibi conseho personal?
2 Tin hende ta purba hustifica nan mes, of ta minimisa e seriedad di e situacion of nan ta tira falta riba otro hende. Pero e miho cos ta pa scucha conseho y aplic’e. (Hebreonan 12:11) Ta claro cu ningun hende no mester spera perfeccion for di otronan, ni cana conseha otronan tur ora bai riba cosnan insignificante of riba asuntonan cu Bijbel ta laga na nos preferencia personal. Ademas, por ta cu e persona cu ta dunando e conseho no a considera tur factor, y bo por hala su atencion riba esaki den un forma respetuoso. Pero den e consideracion cu ta bai sigui aki, laga nos asumi cu e conseho of disiplina duna ta na su luga y tin base biblico. Con nos mester reacciona?
Ehempelnan di Advertencia
3, 4. (a) Kico Bijbel ta contene cu por yuda nos desaroya e punto di bista corecto di conseho y disiplina? (b) Con Rei Saul a reacciona riba conseho, y cu ki resultado?
3 E Palabra di Dios ta contene experencia di bida real di personanan cu a ricibi conseho necesario. Tawatin biaha cu e conseho a ser compaña cu disiplina. Un di e personanan ei tawata Rei Saul di Israel. E no a obedece Yehova relaciona cu e nacion di Amalek. E Amalekitanan a opone e sirbidonan di Dios, y Yehova a decreta cu no tin mag di spar e Amalekitanan ni nan crio di bestia. Pero Rei Saul no a mata nan rei ni nan miho bestianan.—1 Samuel 15:1-11.
4 Yehova a manda profeta Samuel bai scual Saul. Con Saul a reacciona? El a hustifica su mes bisando cu el a derota e Amalekitanan, pero cu solamente el a dicidi di spar nan rei. Pero esei no tawata loke Yehova a mand’e. (1 Samuel 15:20) Saul a purba tira falta riba e pueblo pa e echo cu el a spar e crio di bestia, bisando: “Mi tawatin miedo di e pueblo y a scucha nan bos.” (1 Samuel 15:24) Y parce cu e tawata mas precupa cu su orguyo, pasobra asta el a pidi Samuel pa honr’e dilanti e pueblo. (1 Samuel 15:30) Cu tempo, Yehova a rechasa Saul como rei.—1 Samuel 16:1.
5. Kico a sosode cu Rei Uzias ora el a rechasa conseho?
5 Rei Uzias di Huda “a bira infiel na SEÑOR su Dios, pasobra el a drenta e tempel di SEÑOR pa kima sencia.” (2 Cronicanan 26:16) Pero ta sacerdote so tawatin mag di ofrece sencia. Ora e sacerdotenan principal a purba para Uzias, e rei a rabia masha. Kico a sosode? Bijbel ta bisa: “Lepra a sali na su frenta . . . pasobra SEÑOR a castig’e. Y Rei Uzias tawata un leproso te dia di su morto.”—2 Cronicanan 26:19-21.
6. (a) Con bini tanto Saul como Uzias a resisti conseho? (b) Dicon hopi hende awe tin un problema serio pa acepta conseho?
6 Con bini tanto Saul como Uzias tawatin dificultad pa acepta conseho? E problema basico tawata orguyo, nan tawatin un idea mucho halsa di nan mes. Orguyo ta pone hopi hende causa tristesa pa nan mes. Aparentemente nan ta sinti cu si nan acepta conseho, esei ta indica cu di un of otro manera nan ta inadecuado of esei ta daña nan reputacion. Pero orguyo ta un debilidad. Orguyo ta stroba un persona di pensa na un manera sano, y door di esei e tin tendencia di resisti e yudansa cu Yehova ta percura via su Palabra y organisacion. Pesei Yehova ta spierta: “Orguyo ta bin prome cu destruccion, y un spirito arogante prome cu caida.”—Proverbionan 16:18; Romanonan 12:3.
Acepta Conseho
7. Ki les positivo nos por siña for di e manera cu Moises a reacciona riba conseho?
7 Tambe e Scritura ta contene bon ehempel di hende cu a acepta conseho, y nos por siña for di esakinan. Considera e caso di Moises. Su suegro a conseh’e con pa atende cu e responsabilidad pisa cu e tawatin. Moises a scuch’e y a aplica e conseho mesora. (Exodo 18:13-24) Aunke Moises tawatin hopi autoridad, dicon e tawata habri pa conseho? Pasobra e tawata humilde. “Moises tawata masha humilde, mas cu tur homber cu tawatin riba superficie di tera.” (Numbernan 12:3) Con importante humildad ta pa nos? Sofonias 2:3 ta mustra cu esei ta nifica nos bida.
8. (a) Ki pica David a comete? (b) Con David a reacciona ora Natan a scuale? (c) Kico tawata e consecuencianan di David su picanan?
8 Rei David a comete adulterio cu Bat-seba y a purba sconde esei door di laga mata Bat-seba su casa, Urias. Yehova a manda profeta Natan bai scual David. David a repenti y mesora a admiti: “Mi a peca contra SEÑOR.” (2 Samuel 12:13) Aunke Dios a acepta David su repentimento, lo el a bai sufri e consecuencianan di su malecho. Yehova a bis’e cu spada ‘lo no kita for di su cas’, cu su esposanan lo ser duna ‘na su compañero’ y cu e yiu cu a nace di su adulterio “lo muri sigur.”—2 Samuel 12:10, 11, 14.
9. Kico nos no mester lubida si nos haya conseho of disiplina?
9 Rei David tawata sa di e beneficio di scucha bon conseho. Na un ocasion, el a gradici Dios pa e persona via ken el a haya e conseho. (1 Samuel 25:32-35) Nos tambe ta mescos? Si ta asina, esei lo yuda nos evita di bisa of haci hopi cos cu lo por duel nos despues. Pero kico si nos haya nos den un situacion cu ta pone nos haya conseho of asta disiplina? Laga nos no lubida cu conseho y disiplina ta prueba di Yehova su amor; loke E ta mira ta nos bienestar eterno.—Proverbionan 3:11, 12; 4:13.
Cualidadnan Preciosisimo Cu Ta Bon pa Cultiva
10. Ki cualidad Hesus a mustra cu tawata necesario pa esnan cu lo drenta den e Reino?
10 Pa nos por tin un bon relacion cu Yehova y cu nos rumannan Cristian, nos tin cu cultiva cierto cualidadnan. Hesus a menciona un di nan ora el a pone un mucha meimei di su disipelnan y a bisa: “Si boso no comberti y bira manera mucha, boso lo no drenta e reino di shelo. Esun anto cu humilia su mes manera e mucha aki ta esun di mas grandi den e reino di shelo.” (Mateo 18:3, 4) Hesus su disipelnan mester a cultiva humildad, ya cu nan tawata discuti nan cu nan, ken ta mas grandi.—Lucas 22:24-27.
11. (a) Dilanti ken nos mester ta humilde, y dicon? (b) Si nos ta humilde, con nos lo reacciona riba conseho?
11 Apostel Pedro a skirbi: “Boso tur, bisti boso mes cu humildad pa cu otro, pasobra ‘Dios ta resisti e orguyosonan, ma ta duna gracia na e humildenan.’” (1 Pedro 5:5) Nos sa cu nos mester ta humilde dilanti Dios, pero e texto aki ta mustra cu tambe nos mester ta humilde pa cu compañeronan di creencia. Si nos ta humilde pa cu nan, nos lo no rabia ora nan duna nos bon sugerencia. Mas bien, nos lo siña for di nan.—Proverbionan 12:15.
12. (a) Ki cualidad importante ta hopi liga cu humildad? (b) Dicon nos mester ta interesa den e efecto cu nos conducta tin riba otro hende?
12 Algo cu tin hopi di aber cu humildad ta interes den e bienestar di otro hende. Apostel Pablo a skirbi: “No laga ningun hende busca su mes interes, sino esun di su prohimo. . . . Asina anto, sea cu boso ta come of bebe of kico cu boso ta haci, haci tur pa e gloria di Dios. No duna ofensa ni na Hudiu ni na Griego ni na e iglesia di Dios.” (1 Corintionan 10:24-33) Pablo no a bisa cu nos mester pone tur nos preferencianan personal un banda, sino mas bien a urgi nos pa no haci nada cu lo a anima un otro hende pa haci algo cu su consenshi ta condena.
13. Ki ehempel por indica si nos tin e custumber di aplica conseho biblico?
13 Abo ta pone e bienestar di otro hende prome cu bo preferencia personal? Nos tur tin cu siña haci esei. Tin hopi manera cu nos por haci esaki. Tuma como un ehempel e manera cu nos ta bisti y aregla nos mes. Esakinan ta cosnan di gusto personal, pero cu mester ta na harmonia cu e instruccion di e Scritura di ser modesto, na ordo y limpi. Pero si bo haya sa cu debi na e custumbernan di e hendenan den bo comunidad, bo manera di bisti y di aregla bo mes ta stroba otro hende di scucha e mensahe di Reino, lo bo haci cambio? Un cos ta sigur, ta mas importante pa yuda otro hende gana bida eterno cu complace bo mes.
14. Dicon ta importante pa cultiva humildad y interes den otro hende?
14 Hesus a pone un bon ehempel di humildad y di mustra interes den otro hende. El a asta laba pia di su disipelnan. (Huan 13:12-15) E Palabra di Dios ta bisa di Hesus: “Laga tin den boso e actitud aki cu tawatin tambe den Cristo Hesus, kende, aunke cu e tawata existi den e forma di Dios, no a considera igualdad cu Dios algo pa tene na dje, ma a bandona su mes gloria, tumando forma di un sirbido, siendo traha den e semehansa di hende. Y hayando su mes den condicion di hende, el a humilia su mes door di bira obedesido te na morto.”—Filipencenan 2:5-8; Romanonan 15:2, 3.
No Rechasa e Disiplina di Yehova
15. (a) Ki cambionan nos tin cu haci pa nos tin un personalidad cu ta agrada Dios? (b) Con Yehova a percura conseho y disiplina pa nos tur?
15 Como cu nos tur ta pecador, nos tin cu haci cambio den nos actitud y conducta si nos kier refleha e personalidad di nos Dios. Nos tin cu bisti “e hende nobo”, esta un personalidad nobo. (Colosencenan 3:5-14) Conseho y disiplina ta yuda nos mira kico ta e cambionan cu nos mester haci, anto con pa haci nan. E fuente basico di instruccion cu nos tin mester ta Bijbel mes. (2 Timoteo 3:16, 17) E literatura biblico y reunionnan cu Yehova su organisacion ta percura ta yuda nos aplica e Palabra di Dios. Asta si nos a tende e conseho un biaha caba, nos lo reconoce cu nos tin mester di dje y purba mehora?
16. Ki yudansa Yehova ta percura pa nos individualmente?
16 Yehova, cu amor y interes, ta yuda nos cu nos problemanan. Loke a yuda miyones di hende ta un studio di Bijbel na cas. Mayornan ta conseha y disiplina nan yiunan pa proteha nan di conducta cu lo por causa dolo di curason. (Proverbionan 6:20-23) Den congregacion, tin hende cu hopi bes ta pidi sirbidonan cu experencia pa conseho y sugerencia ya asina nan por mehora nan esfuersonan den e actividad den veld. Tin biaha, ancianonan por pidi otro conseho of nan por pidi otro rumannan cu tin experencia den e sirbishi di proclama e palabra. Esnan cu tin cualificacionnan spiritual ta uza Bijbel pa duna yudansa na esnan cu tin mester di esei, haciend’e cu un actitud suave. Si bo ta duna conseho, corda ‘wak bo mes, pa bo tambe no wordo tenta.’ (Galationan 6:1, 2) Si, nos tur tin mester di conseho y disiplina pa adora e unico Dios berdadero unidamente.
Como Repaso
• Con Yehova ta yuda nos cu amor pa mira unda nos personalmente tin cu haci cambio?
• Dicon hopi hende tin dificultad pa acepta conseho, y con serio esaki ta?
• Ki cualidadnan preciosisimo lo yuda nos pa ta habri pa conseho, y con Hesus a pone un bon ehempel den esaki?
[Preguntanan di Estudio]
[Plachi na pagina 142]
Uzias a rechasa conseho y a ser castiga cu lepra
Moises a beneficia door di acepta conseho di Yetro
