ABO sa papia cu Yehova Dios?— E kier pa bo papia cu ne. Papia cu Dios ta loke nos ta yama haci oracion, of resa. Tur ora Hesus tawata papia cu su Tata na shelo. Tin bes e tawata kier ta su so pa e papia cu Dios. Bijbel ta bisa cu un biaha “e so a subi bai riba sero pa haci oracion. Y ora anochi a sera, e tawata su so ayanan.”—Mateo 14:23.

Unda abo por bai pa bo resa bo so na Yehova?— Kisas anochi prome cu bo drumi bo por ta bo so pa papia cu Yehova. Hesus a bisa: “Ora bo ta haci oracion, bai den bo camber di mas paden, y ora bo a sera bo porta, haci oracion na bo Tata.” (Mateo 6:6) Bo ta haci oracion na Yehova tur anochi prome cu bo drumi?— Ta importante pa bo hacie.

Hesus a haci oracion ora tawatin mas hende hunto cu ne tambe. Ora su amigo Lazaro a muri, Hesus a  haci oracion hunto cu mas hende na e luga caminda Lazaro tawata dera. (Huan 11:41, 42) Ora Hesus tawata reuni cu su disipelnan tambe e tawata haci oracion. Abo sa bai reunionnan caminda nan ta haci oracion?— Na reunion, hopi bes ta un hende grandi ta haci oracion. Pone bon atencion kico e ta bisa, pasobra ta pa abo e ta papiando cu Dios. Si bo scucha bon, e ora ei bo por bisa “Amen” ora e caba. Bo sa kico kiermen ora bo bisa “Amen” despues di un oracion?— Esei kiermen cu bo a gusta e oracion. E kiermen cu bo ta di acuerdo cu ne, y cu bo kier pa e oracion ta di bo tambe.

Hesus tawata haci oracion ora di come tambe. E tawata gradici Yehova pa su cuminda. Abo ta haci oracion semper prome cu bo come bo cuminda?—​Ta bon pa nos gradici Yehova pa e cuminda prome cu nos cuminsa come. Ora boso ta come hunto, kisas ta un otro hende ta haci oracion. Pero kico bo ta haci si bo ta come sin otro hende hunto cu bo? Of, kico bo tin cu haci si e otro hendenan cu ta come cu bo no ta gradici Yehova?—​E ora ei bo mes tin cu haci bo oracion.

Semper bo mester haci oracion na bos halto? Of Yehova por tende bo asta si bo haci oracion den bo mes?— Nos por haya sa door di wak kico a pasa cu Nehemias. Nehemias tawata un adorado  di Yehova cu tawata traha na palacio di Artaherhes, un rei di Persia. Un dia Nehemias a bira hopi tristo door cu el a tende cu e murayanan di Herusalem, e stad principal di su pueblo, tawata kibra.

Ora e rei a puntra Nehemias dicon e tawata tristo, Nehemias a haci un oracion den su mes prome. E ora ei Nehemias a bisa e rei dicon e tawata tristo, anto el a pidie pa e por a bai Herusalem pa lanta e murayanan bek. Anto kico a sosode?—

Si, Dios a contesta e oracion di Nehemias. E rei a bis’e cu e tawatin mag di bai! E rei a asta duna Nehemias hopi palo pa lanta e murayanan cu ne. Kiermen cu di berdad Dios por contesta nos oracionnan, asta ora nos resa den nos mes.—Nehemias 1:2, 3; 2:4-8.

Awor, ban papia riba un otro cos cu  tin di aber cu oracion. Bo mester baha cabes pa haci oracion? Bo mester hinca rudia? Kico bo ta kere?— Tin bes Hesus a hinca rudia pa e haci oracion. Pero tin otro biahanan cu el a lanta para tambe. Y tin bes el a hisa su cara na shelo ora e tawata resa, manera e biaha cu el a resa pa Lazaro.

Kico esaki ta laga nos compronde anto?— Si, esei ta mustra cu bo posicion di curpa no ta dje importante ei. Tin biaha ta bon pa bo baha cabes y sera wowo. Y tin bes kisas asta lo bo kier hinca rudia, manera Hesus a yega di haci. Pero corda cu nos por resa na Dios tur ora, di dia of anochi, y lo e scucha nos. E cos di mas importante ta cu ora nos haci oracion nos mester sinti nos sigur cu Yehova ta scucha nos. Abo ta sigur cu Yehova ta scucha bo oracionnan?—

Kico nos mester bisa Yehova den oracion?— Conta mi: Kico bo ta papia cu Dios ora bo ta haci oracion?— Yehova ta duna nos hopi cos bon, y ta bon pa nos gradicie pa nan, bo no ta kere?— Nos por bis’e danki pa e cuminda cu nos ta come. Pero bo a yega di gradicie pa e shelo blou, e palonan berde y e flornan bunita?— Ta Dios a traha nan tambe.

Un dia Hesus su disipelnan a pidie pa e siña nan haci oracion. E Gran Maestro a siña nan; el a mustra nan kico ta e cosnan mas importante pa pidi p’e. Bo sa kico nan ta?— Coi bo Bijbel, anto habrie na Mateo capitulo  6. Na versiculo 9 te cu 13 nos ta haya loke hopi hende ta yama e Oracion di Nos Tata. Laga nos les’e hunto.

Aki Hesus ta siña nos pa nos resa tocante e nomber di Dios. El a bisa nos pidi pa e nomber di Dios sea santifica, esta, pa hende trat’e como un nomber santo. Con Dios su nomber ta?— Si, Yehova. Nos mester stima e nomber ei.

Na di dos luga, Hesus a siña nos resa pa e Reino di Dios bin. E Reino aki ta importante, pasobra e ta bai trece pas na tera y haci tera bira un paradijs.

Na di tres luga, e Gran Maestro a bisa cu nos mester pidi pa e boluntad di Dios sosode na tera mescos cu den shelo. Anto si nos ta resa pa su boluntad sosode, nos mester haci loke Dios kier tambe.

Despues di esei Hesus a siña nos pidi pa e cuminda cu nos tin mester pa cada dia. Tambe el a bisa cu ora nos haci cos cu ta malo, nos mester bisa Dios cu nos ta sinti duele di loke nos a haci. Y nos mester pidi Dios pordona nos. Pero pa e pordona nos, nos tambe mester pordona hende si nan haci nos algo. Abo ta haya cu ta facil pa bo pordona?—

Na final Hesus a bisa cu nos mester pidi Yehova Dios pa e proteha nos contra e malbado, Satanas e Diabel. Kiermen, tur e cosnan aki ta bon cos cu nos por resa na Dios p’e.

Nos mester confia cu Yehova ta scucha nos oracionnan. Y nos no mester pidie yuda nos so. Nos mester sigui gradicie tambe. E ta keda contento ora nos ta meen e cosnan cu nos ta bis’e den oracion, y ora nos pidie cos corecto. Y lo e duna nos loke nos pidie tambe. Abo ta confia cu lo e hacie?—