1-3. Kico a pasa ora cu mayornan a trece nan yiunan cerca Hesus, y kico e incidente aki ta revela tocante Hesus?

 HESUS tabata sa cu e fin di su bida riba Tera tabata acercando rapidamente. E tabatin apenas un par di siman mas, y ainda tabatin hopi cos di haci! Hesus tabata predicando hunto cu su apostelnan na Perea, un region oost di Riu Jordan. Nan a predica bayendo den direccion zuid rumbo pa Jerusalem, caminda Hesus lo a asisti na su ultimo Pasco Hudiu cu un final dramatico.

² Despues cu Hesus a caba di tene un discusion riba un tema di peso cu algun lider religioso, a surgi un disturbio chikito. Ta asina cu algun hende a trece nan yiunan pa mira Hesus. Aparentemente, tabatin mucha di diferente edad, pasobra Marco a referi na nan cu e mesun palabra cu el a uza mas prome pa describi un mucha di 12 aña, mientras cu Lucas a uza un palabra cu por ser traduci como ‘yiu chikito.’ (Lucas 18:15; Marco 5:41, 42; 10:13) Claro cu caminda tin mucha, hopi biaha ta reina un ambiente anima y boroto. E discipelnan di Hesus a scual e mayornan, kisas asumiendo cu nan Shon tabata mucho ocupa pa duna atencion na e muchanan. Kico Hesus a haci?

³ Ora Hesus a mira kico ta pasando, el a rabia. Cu ken? Cu e muchanan? Cu e mayornan? No, cu su discipelnan! El a bisa nan: “Laga e muchanan bin cerca mi; no stroba nan, pasobra e reino di Dios ta pertenece na esnan manera esakinan. Di berdad mi ta bisa boso, esun cu no ricibi e reino di Dios manera un mucha lo no drenta den dje.” Anto Hesus a tuma e muchanan “den su brasa” y a bendiciona  nan. (Marco 10:13-16) E palabranan cu Marco a uza akinan ta indica cu Hesus a brasa nan cariñosamente, y podise asta a carga algun baby den su brasa. Tabata bisto cu Hesus gusta mucha. Sinembargo, esaki ta siña nos algo mas tocante Hesus, esta, cu e ta un persona acercabel.

4, 5. (a) Con nos por tin sigur cu Hesus tabata acercabel? (b) Ki preguntanan nos lo analisa den e capitulo aki?

⁴ Si Hesus tabata un homber streng, friu of orguyoso, e muchanan ei probablemente lo no a sinti nan atrai na dje; y nan mayornan tampoco lo no a sinti nan liber pa acerc’e. Ora bo ta imagina e escena, bo no ta mira e cara contento di e mayornan segun cu e homber bondadoso aki a demostra su cariño pa nan yiunan, a expresa cuanto balor nan tin den bista di Dios y a bendiciona nan? Si, a pesar cu Hesus tabatin un responsabilidad di hopi peso, el a keda e homber di mas acercabel.

⁵ Ken mas a haya Hesus un homber acercabel? Kico a haci Hesus asina facil pa acerca? Anto con nos por bira mescos cu Hesus den esaki? Laga nos wak.

6-8. Hopi biaha Hesus tabata den compania di ken, y den ki manera su actitud tabata diferente for di e actitud di e lidernan religioso?

⁶ Ora bo ta lesa e relatonan di Evangelio, podise lo bo keda asombra pa e manera cu gran cantidad di hende no a basila pa bin cerca Hesus. Por ehempel, hopi bes nos ta lesa tocante “multitudnan grandi” en conexion cu Hesus. “Multitudnan grandi tabata siguie for di Galilea.” “Multitudnan grandi a bin para tur rond di dje.” “Multitudnan grandi a bin cerca dje.” “Multitudnan grandi tabata cana hunto cu ne.” (Mateo 4:25; 13:2; 15:30; Lucas 14:25) Si, hopi biaha Hesus tabata rondona pa multitud di hende.

⁷ Por lo general esakinan tabata hende comun y coriente, hende cu e lidernan religioso tabata referi na dje cu menosprecio  como “hende di tera.” E farizeonan y sacerdotenan a bisa abiertamente: “E multitud aki, cu no conoce e Lei, ta maldiciona.” (Juan 7:49) Obranan rabinico skirbi mas despues ta confirma e actitud ei. Hopi lider religioso a considera e hendenan ei como di clase inferior y a nenga di come cu nan, cumpra cos for di nan of asocia cu nan. De echo, algun lider religioso a insisti cu no tin speransa di resureccion pa e hendenan ei cu no tabata conoce e lei oral! Di mes, hopi hende humilde lo a keda leu for di e lidernan ei en bes di pidi nan yudansa of guia. Pero Hesus tabata diferente.

⁸ Hesus a asocia libremente cu e pueblo comun. El a come cu nan, cura nan, siña nan y duna nan speransa. Claro cu Hesus tabata realistico; el a reconoce cu mayoria di hende lo a rechasa e oportunidad pa sirbi Jehova. (Mateo 7;13, 14) Sinembargo, el a carga e speransa cu cada persona lo a reacciona faborablemente y a mira den hopi di nan e potencial pa haci loke ta corecto. Ki un contraste cu e sacerdote- y farizeonan sin heful! Pero sorprendentemente, asta sacerdote y farizeo a bin cerca Hesus, y varios di nan a haci cambio y a sigui Hesus. (Echonan 6:7; 15:5) Algun di e hendenan rico y poderoso tambe a haya Hesus acercabel.—Marco 10:17, 22.

9. Dicon hende muher a haya Hesus acercabel?

⁹ Hende muher no a basila pa bin cerca Hesus. Hopi biaha nan lo mester a sinti e menosprecio humiliante di e lidernan religioso. E rabinan por lo general no tabata kier pa siña hende muher. De echo, hende muher no tabatin mag di testifica den casonan legal, ya cu a considera nan como testigo inconfiabel. E rabinan asta a haci un oracion den cua nan a gradici Dios cu nan no tabata hende muher! Sinembargo, hende muher no a nota e tipo di menosprecio ei cerca Hesus. Hopi a acerc’e, ansioso pa siña. Por ehempel, Bijbel ta conta nos cu Maria, ruman muher di Lazaro, tabata sinta na pia di Señor ta scucha e palabranan di Hesus cu sumo atencion mientras cu su ruman muher, Marta, tabata  hopi ocupa y precupa cu preparacion di cuminda. Hesus a elogia Maria pasobra el a fiha e prioridad corecto.—Lucas 10:39-42.

10. Con Hesus su manera di trata cu hende enfermo tabata distinto for di e lidernan religioso?

¹⁰ Hende enfermo tambe a basha bin cerca Hesus, aunke hopi biaha e lidernan religioso a trata nan como persona indeseabel. E Lei di Moises a prescribi cu hende cu lepra mester a keda isola pa motibonan di salud, pero esei no tabata un hustificacion pa no mustra bondad na nan. (Levitico, capitulo 13) Sinembargo, reglanan rabinico cu a bin despues a declara cu hende cu lepra ta mesun desagradabel cu sushi humano. Algun lider religioso a bai asta asina leu di tira leprosonan cu piedra pa tene nan leu! Ta dificil pa imagina con hende cu a ser trata asina por a haya e curashi pa acerca cualkier maestro, pero cerca Hesus si leprosonan a bin. Un di nan a expresa e famoso palabranan di fe aki: “Señor, si bo kier, bo por haci mi bira limpi.” (Lucas 5:12) Den e siguiente capitulo nos lo analisa Hesus su reaccion. Pero pa awor ta suficiente pa bisa cu no por tin un prueba mas combencente pa mustra cu Hesus tabata acercabel.

11. Ki ehempel ta mustra cu hende carga cu sintimento di culpa a sinti nan liber pa bin cerca Hesus, y dicon esaki ta importante?

¹¹ Personanan cu tabata carga cu sintimento di culpa a bin cerca Hesus libremente. Por ehempel, pensa riba e biaha cu Hesus tabata comiendo na cas di un farizeo. Un muher cu tabata conoci como un pecador a drenta paden y hinca rudia na pia di Hesus, yorando pa motibo di su sintimento di culpa. Su lagrimanan a laba Hesus su pia, y el a uza su cabei pa seca nan. Mientras cu Hesus su anfitrion a wak tur desgusta y den su mes a critica Hesus severamente pasobra el a laga e muher aki yega cerca dje, Hesus bondadosamente a elogia e muher pa su arepentimento sincero y a sigur’e  cu Jehova a pordon’e. (Lucas 7:36-50) Awe mas cu nunca, hende cu ta carga cu sintimento di culpa mester por sinti nan liber pa bin cerca esnan cu por yuda nan drecha nan relacion cu Dios! Kico ta loke a haci Hesus asina acercabel?

12. Dicon no ta un sorpresa cu Hesus tabata acercabel?

¹² No lubida cu Hesus a imita su Tata celestial stima perfectamente. (Juan 14:9) Bijbel ta recorda nos cu Jehova “no ta leu di cada un di nos.” (Echonan 17:27) Jehova, siendo Esun “cu ta scucha oracion”, ta semper accesibel pa su sirbidornan fiel y pa ken cu sinceramente kier hay’e y sirbie. (Salmo 65:2) Figura bo, e Persona di mas poderoso y importante den universo ta a la bes esun mas acercabel! Hesus, mescos cu su Tata, stima hende. Den e siguiente capitulonan nos lo considera e amor intenso cu tabatin den su curason. Pero Hesus tabata acercabel principalmente pasobra su amor pa hende tabata masha bisto. Laga nos analisa algun di e caracteristicanan di Hesus cu a demostra e amor ei.

13. Con mayornan lo por imita Hesus?

¹³ Hende a sinti mesora cu Hesus tabata interesa den nan personalmente. E interes personal ei no a disparce ora cu Hesus tabata bou di presion. Manera nos a mira caba, ora e mayornan a trece nan yiunan cerca dje, Hesus a keda acercabel a pesar cu e tabata ocupa y carga cu responsabilidadnan di peso. Ki un bon ehempel el a pone pa mayornan! Den e mundo djawe ta un reto pa lanta yiu. Sinembargo, ta masha importante pa muchanan mira nan mayornan como hende acercabel. Si bo ta un mayor, bo sa cu tin biaha bo ta mucho ocupa pa duna bo yiu e atencion cu e mester. Pero pakico no sigur’e cu lo bo traha tempo p’e mas pronto posibel? Segun cu bo ta cumpli cu bo palabra, bo yiu lo siña cu ta bale la pena tene pasenshi. E ta siña tambe cu semper e por bin cerca bo cu cualkier problema of precupacion.

14-16. (a) Ki circunstancianan a pone Hesus haci su prome milager, y dicon esaki tabata un acto maraviyoso? (b) Kico Hesus su milager na Cana ta revela tocante dje, y ki les e ta siña mayornan?

 ¹⁴ Hesus a laga hende sa cu loke a precupa nan tabata importante p’e. Por ehempel, considera e prome milager cu Hesus a haci. E tabata na un fiesta di casamento na Cana, un pueblito den Galilea. A surgi un problema bergonsoso, biña a caba! Maria, mama di Hesus, a bisa su yiu kico a pasa. Wel, kico Hesus a haci? El a laga e sirbidornan yena seis tinashi grandi di piedra cu awa. Ora nan a hiba un tiki di e awa ei pa e director di e fiesta, ata e awa tabata biña di alta calidad! Acaso esei tabata un triki? No, e awa “a bira biña.” (Juan 2:1-11) For di hopi tempo pasa hende ta soña di por comberti un cos den otro. Pa siglonan, hombernan yama alkimista a purba comberti chumbo den oro. Nunca nan no a logra, aunke de echo, chumbo cu oro ta elementonan bastante similar. a Kico di awa cu biña? For di un punto di bista kimico, awa ta algo simpel, un combinacion di dos elemento basico. Di otro banda, biña ta contene casi mil substancia cu ta consisti di hopi elemento basico! Dicon Hesus lo a haci un acto asina maraviyoso pa resolve un problema asina chikito manera scarsedad di biña na un fiesta di casamento?

¹⁵ E problema no tabata un cos chikito pa e bruid y e bruidegom. Den Medio Oriente di antiguedad, hospitalidad na huespetnan invita tabata un asunto di sumo importancia. Si biña mester a caba na e fiesta di casamento esei lo a causa bastante berguensa pa e pareha, locual lo a daña e ambiente  di e dia di nan casamento y laga nan cu mal recuerdo di e dia ei den e añanan cu lo a sigui. E problema tabata importante pa nan, y e tabata importante pa Hesus. Pues el a haci algo pa resolv’e. Bo por mira dicon hende tabata bin cerca dje cu loke a precupa nan?

¹⁶ Un biaha mas mayornan por saca un bon les for di esaki. Kico si bo yiu bin cerca bo, tur precupa cu un problema? Kisas bo ta sinti gana di no worry cu su precupacion pasobra ta co’i kens. Podise bo ta asta haya gana di harie. Compara cu bo carganan, e problema di e mucha en berdad por parce co’i kens. Pero corda cu pa e mucha si e no ta co’i kens! Si e ta importante pa un persona cu bo ta stima hopi, lo e no mester ta importante pa bo tambe? Si bo laga bo yiu sinti cu bo ta interesa den loke ta precup’e, esei lo haci bo un mayor acercabel.

17. Hesus a pone ki ehempel di suavidad, y dicon e cualidad aki ta prueba di un hende su forsa?

 ¹⁷ Manera nos a considera den Capitulo 3, Hesus tabata suave y humilde. (Mateo 11:29) Mansedumbre of suavidad ta un bunita cualidad, un prueba fuerte di e humildad cu un persona tin den su curason. E ta parti di e fruta di Dios su spirito santo y ta ser conecta cu sabiduria divino. (Galationan 5:22, 23; Santiago 3:13) Asta ora Hesus a confronta e piyo provocacion, el a domina su mes. Su suavidad definitivamente no tabata debilidad. Un comentarista a bisa di suavidad: “Tras di e suavidad aki tin e forsa di staal.” Si, hopi bes nos tin mester di e forsa di staal pa frena nos temperamento y trata otro hende cu suavidad. Pero cu e bendicion di Jehova riba nos esfuerso, nos por imita Hesus den mustra suavidad, y esei lo haci nos mas acercabel.

18. Ki ehempel ta revela Hesus su actitud rasonabel, y dicon bo ta kere cu e cualidad aki ta haci un persona acercabel?

¹⁸ Hesus tabata rasonabel. Ora Hesus tabata na Tiro, un señora a bin cerca dje pasobra su yiu muher tabata “cruelmente posei pa demoño.” Den tres diferente manera Hesus a indica cu e no tabata dispuesto pa haci loke e señora tabata kier. Di prome, Hesus no a contest’e; di dos, el a duna e señora un motibo pakico e no por a haci loke el a pidi; di tres, Hesus a duna un ilustracion pa mustra mas cla ainda dicon lo e no a hacie. Acaso Hesus tabata antipatico, inflexibel? El a laga e señora compronde cu e tabata bayendo den un direccion peligroso dor di tribi cuestiona e palabranan di un homber asina grandi manera e? No. Tabata bisto cu e señora a sinti su mes safe. E no a pidi yudansa so, sino tambe el a persisti a pesar cu Hesus aparentemente no tabata kier a yud’e. Hesus a mira e fe remarcabel cu a motiva e señora pa persisti, y el a cura su yiu. (Mateo 15:22-28) Hesus su actitud rasonabel, su disponibilidad pa scucha y pa ta flexibel ora ta apropia, siguramente a haci hende ansioso pa acerc’e!

19. Con nos por sa si di berdad nos ta acercabel?

¹⁹ Hende ta gusta pensa cu nan ta acercabel. Por ehempel, tin hende den puesto di autoridad cu gusta bisa cu semper nan porta ta habri, y cu e hendenan bou di nan por bin libremente cerca nan. Sinembargo, Bijbel tin e spiertamento fuerte aki: “Hopi hende ta proclama nan mes lealtad, ma ken por haya un hende confiabel?” (Proverbionan 20:6) Ta facil pa bisa cu nos ta acercabel, pero di berdad nos ta imita e aspecto aki di Hesus su amor fielmente? E contesta kisas ta sinta, no den e manera cu nos ta mira nos mes, sino den e manera cu otro hende ta mira nos. Pablo a bisa: “Laga tur hende sa cu boso ta rasonabel.” (Filipensenan 4:5, NW) Ta bon pa cada un di nos puntra nos mes: ‘Con otro hende ta mira mi? Ki reputacion mi tin?’

20. (a) Pakico ta importante pa ancianonan cristian ta acercabel? (b) Pakico nos mester ta rasonabel den loke nos ta spera di e ancianonan di congregacion?

²⁰ Vooral ancianonan cristian ta haci esfuerso pa ta acercabel. Nan ta desea sinceramente di cumpli cu e descripcion cu tin para skirbi na Isaias 32:1 y 2: “Cada un lo ta manera un refugio contra biento, y un proteccion contra tempestad, manera coridanan di awa den un tera seco, manera sombra di un baranca masha grandi mes den un tera cu tin sed di awa.” Un anciano por percura tal proteccion, refrescamento y alivio solamente si e keda acercabel. Ta berdad cu no ta semper facil pa nan haci esei, pasobra  ancianonan tin un carga pisa di responsabilidad den e tempo dificil aki. Sinembargo, ancianonan ta haci esfuerso pa nan no duna e impresion cu nan ta mucho ocupa pa atende e necesidadnan di e carnenan di Jehova. (1 Pedro 5:2) Anto otro miembronan di e congregacion ta purba di nan parti pa ta rasonabel den loke nan ta spera di e hombernan fiel ei, mustrando un actitud humilde y cla pa coopera.—Hebreonan 13:17.

21. Con mayornan por keda acercabel pa nan yiunan, y kico nos lo considera den e siguiente capitulo?

²¹ Mayornan ta haci esfuerso pa nan ta semper disponibel pa nan yiunan. Esaki ta un asunto hopi serio! Nan kier pa nan yiunan sa cu nan por confia den nan tata of nan mama. Pues, mayornan cristian ta percura pa nan ta suave y rasonabel, y ta tene cuidou pa nan no bira mucho emocional ora un yiu confesa di a comete un eror of ta demostra di tin un manera di pensa robes. Segun cu mayornan ta entrena nan yiunan cu pasenshi, nan ta haci nan best pa mantene bon comunicacion. En realidad, nos tur kier keda personanan acercabel, manera Hesus tabata. Den e siguiente capitulo nos lo considera Hesus su compasion sincero, un di e cualidadnan principal cu a hacie acercabel.