Agnalinglingwanan so 2020 regional a kombension tayo—atan so sankaunaan ya kombension diad interon mundo ya inrekord tan na-access panamegley na Internet! Balet abantayan na maslak ya agagi tayo ed Malawi tan Mozambique so kombension anggano anggapoy internet da. Panon?

 Bilang konsiderasyon ed kipapasen da, inaprobaan na Coordinators’ tan Teaching committee na Mananguley ya Ulop so pangi-broadcast na kombension panamegley na TV tan radyo diad Malawi tan Mozambique. Akin et kaukolan ya ikonsideray kipapasen da? Say bayar na Internet diad Malawi so sakey ed saray sankamablian ed interon mundo, kanian daiset labat ya Tasi so maka-access ed Internet. Oniay imbaga nen William Chumbi, membro na Branch Committee diad Malawi: “Say alenleneg ya paraan pian nipasabi iyan espiritual ya naakan ed saray agagi et diad panamegley na radyo tan TV.” Onia ni imbaga nen Luka Sibeko, ya membro met na Branch Committee diad Malawi: “No ag-itan nipasabi panamegley na TV tan radyo, daiset labat ya agagi diad sakop na branch mi so nagunggonaan ed kombension.” Ontan met diad Mozambique, daiset labat ya agagi so makasarag ya mangaliw na gadyet ya usaren da, kanian lalon agda nasarag so manbayar na Internet.

 Lapud COVID-19 pandemic, wala la ray pigaran istasyon na TV tan radyo ya mangibro-broadcast ed saray aral tayod kongregasyon. a Akitongtong iray agagi tayo ed sarayan istasyon tan impaaruman day airtime pian ni-broadcast met so kombension.

 Diad Malawi, walay nagmaliw ya problema na agagi. Kaslakan et sakey oras labat ya airtime so iyaabuloy na saray istasyon na TV tan radyo ed saray kustomer da. Mapaga iray istasyon ya no masyadon mabayag so programa et ompan aglanlamang makapampokus iray manbabantay tan ondedengel ed satan. Balet impaliwawa na agagi tayo ya say kimey tayo et makakatulong ed komunidad. Anggan legan na lockdown, ipapasabi tayo nin siansia ed saray totoo so makaligliwan mensahe na maong a balita ya manlalapud Biblia, ya makatulong ed sikara ya magmaliw a maong ya totoo tan magmaliw ya maliket so pamilya da. Nen naamtaan iya na saray istasyon, pinmayag ira ed labay na agagi ya kaaruman ya airtime.

 Diad Malawi, nai-broadcast so kombension diad sakey ya istasyon na TV tan sakey ya istasyon na radyo, ya parehon onabot ed interon bansa kanian minilyon ya totoo so makapambantay tan makarengel ed satan. Diad Mozambique, nai-broadcast so kombension diad sakey ya istasyon na TV tan 85 ya istasyon na radyo.

 Diad saratan ya bansa, $28,227 b so agastos ed impangi-broadcast na kombension panamegley na TV tan ngalngali $20,000 ed impangi-broadcast panamegley na radyo. Say gastos ed radyo et nanduruma, $15 so bayar no melag labat so istasyon balet nasabi toy $2,777 no baleg so istasyon.

 Nansagpot a maong iray agagi pian nausar ed sankaabigan ya paraan iray donasyon. Singa bilang diad Malawi, akitongtong ira pian nabawasan so bayaran, tan naikdan met ira na 30 percent ya discount. Lapud saratan ya discount, akatipid tayo na $1,711. Diad Mozambique, wala ray istasyon ya angiter met na discount ed sikatayo lapud maabig ya reputasyon tayo—matua itayo tan masakbay itayon manbabayar.

 Misalsalamat iray agagi tayo ta abantayan odino arengel day kombension panamegley na TV tan radyo. Oniay imbaga nen Patrick, sakey ya elder diad Malawi: “Misalsalamat kami ed Mananguley ya Ulop lapud espisyal ya konsiderasyon da ed sikami legan na pandemic.” Oniay imbaga nen Isaac, ya taga met ed Malawi: “Anggapoy arum ya gadyet mi, kanian misalsalamat kami ed sayan espisyal ya probisyon na organisasyon nen Jehova pian narengel mi kombension panamegley na radyo. Lapud sayan probisyon, agunggonaan so interon pamilya mi ed kombension. Parad sikami, prueba iya na panangaro nen Jehova ed saray totoo to.”

 Say 2020 ya kombension so unonan kombension ya naatendian na sakey a publisher diad Mozambique. Imbaga to: “Ipapanonot ed siak na sayan uksoyan ya pambantay na kombension diad TV ya si Jehova so makapanyarin-amin ya Dios. Ag-apigilan na pandemic si Jehova ya mangitarya ed sikatayo na espiritual ya naakan tan ipasabi itan dia mismo ed abung ko. Anengneng kon manaaroan iray totoo nen Jehova. Kombinsido ak ya aya so tuan relihyon.”

 Oniay imbaga nen Wyson, sakey ya elder: “Labay koy misalamat ed paraan na pangaasikaso na matoor ya aripen ed sikatayo legan na pandemic. Lapud sayan probisyon ya i-broadcast so kombension panamegley na radyo tan TV, dakel ed sikami ran mairap bilay ya manaayam ed sayan mair-irap ya bansa so atulongan pian makasabid sikami so programa tan nagunggonaan kami ed satan.”

 Parad 2021 regional a kombension, impanengneng lamet na Coordinators’ tan Teaching committee so espisyal a konsiderasyon pian nai-broadcast so kombension panamegley na TV tan radyo diad saray apilin lugar. Iner so panlalapuan na pundo pian nai-broadcast so kombension diad onian paraan? Diad saray donasyon parad sankamundoan a kimey, ya dakel ed saratan so indonasyon panamegley na nanduruman paraan diad donate.jw.org. Salamat ed mabulos ya pandodonasyon yo.