Nen asumpal lay World War II nen 1945, naapektoan ya maong so Germany. Aderal-deral iray syudad, pati saray eskuelaan tan ospital, tan delikado ta wala ray bomba ed kaliberliber ya agni sinmabog. Ontan met, ngalngali anggapoy suplay na naakan kanian mabmabli sasaliwen. Singa bilang, no mangaliw kay kapalduan kilo ya mantikilya ed saray ilegal ya managlako, say bili to et katumbas na sakey tan kapalduan bulan ya sueldo!

 Siempre, kaiba ed saray apektado iray dakel ya Tasi nen Jehova ya abayag ya inkulong ed saray prisoan tan concentration camp lapud pananisia ra. Nen nibulos la ra nen 1945, amay sulong da labat so walad sikara. Aderal-deral met so dalin, abung, tan kaykayarian na arum ya Tasi. Legan na aral, say arum ya agagi et nalelemay lapud eras da.

 Saray Tasi ed arum ya bansa et nanggawan tampol na paraan pian makapangipawit ira na naakan tan kawes parad saray agagin mankaukolan. Inyasain na world headquarters ed United States so branch office na Bern, Switzerland ya ontulong ed saray agagi ed Germany. Linmad Europe si Brother Nathan H. Knorr ya representative na headquarters pian mas mauksoy tan maples so pangiter na relief.

 Mabulbulos ya angiter iray agagi ed Switzerland na naakan, kawes, tan kuarta. Amin iratan et tinipon tan inayos ed Bern antis ya impawit ed Germany. Tinmulong met iray agagi ed Sweden, Canada, tan United States, kanian aliwan saray agagi labat ed Germany so naikdan na relief, noagta anggan saray agagi diad arum ya bansa ed Europe tan Asia.

 Diad loob na pigaran bulan, angipawit so branch na Switzerland na kape, gatas, masamit, cereal, pisipising, impamagan prutas, tan saray de-lata. Tan angipawit met ira na kuarta.

 Angipawit met iray limaran tonelada ya kawes, singa say jacket, kawes na bibii, tan amerikana. Oniay imbaga na Enero 15, 1946, ya isyu na The Watchtower: “Say impawit na agagi et aliwan saramay agda la labay. Amin ya inter da et mararakep. Ayos labat ya mansakripisyo ira basta natulongan da iray agagi ed Germany.”

 Angiter met iray Tasi ed Switzerland na ngalngali 1,000 ya paris na sapatos. Antis dan impawit et sinegurado da ni ya anggapoy deral na saratan. Kaawat na agagi ed Wiesbaden, Germany, mankelaw ira ta maong ya klase tan nanduruma iray impawit na agagi. “Agka makasaliw na onian karakep ya sapatos tan kawes diad Germany,” so insulat na sakey ya Tasi.

 Tuloytuloy ya angiter na tulong iray Tasi anggad Agosto 1948. Say ami-amin ya impawit na saray agagi ed Switzerland parad saray agagi ed Germany et 444 ya crates na relief tan manbelat na 25 ya tonelada. Tan singa abitla nen niman, aliwan saray Tasi ed Switzerland labat so tinmulong. Diad tua, no ikompara ed bilang na Tasi ed amin ya bansan tinmulong, sikaray sankaraisetan ta 1,600 ni ra labat ed saman.

 Imbaga nen Jesu-Kristo: “Diad saya et naamtaan na amin a sikayo iray disipulok​—no manaaroan kayo.” (Juan 13:34, 35) Lapud inaro na saray Tasi nen Jehova so sakey tan sakey, aliwan kera-kera so iiter da, noagta amay sankarakepan tan sankaabigan ya walad sikara. (2 Corinto 8:1-4) Abitla ed sakey ya sulat ya nanlapud Zurich, Switzerland ya “wala ray agagi ya mairap met so bilay da, pero labalabay day ontulong kanian nandonasyon met iray kuarta, pati samay card ya pansaliw da komon na rasyon et inter da.”

 Akabangon ya tampol iray Tasi nen Jehova ed Germany anggano naapektoan iran maong na guerra tan pinairap ira na gobierno. Say sakey a rason et lapud organisado tan mabulbulos iran tinulongan na saray agagi ya angipanengneng na masakripisyon panangaro.