Siopa so Antikristo?
Walay agano nin pelikulan horror ya say title to et Antichrist.
Walay sikat ya banda ya say ngaran na sakey ya album da et Antichrist Superstar.
Tinawag nen Friedrich Nietzsche, ya philosopher nen koma 19 siglo, so sakey ed saray libro to ya The Antichrist.
Kaslakan ya say tawag na saray ari tan emperador nen panaon ya Middle Ages ed saray kalaban da et antikristo.
Imbaga nen Martin Luther, lider na German Reformation, ya saray papa na Romanon Katoliko et antikristo.
LAPUD say “antikristo” et uusaren la lawarid amin, anggan diad saray manuuley odino diad saray pelikula, nayarin nitepet tayo: Siopa so antikristo? Kaukolan tayo ni kasin amtaen itan natan? Siempre duga labat ya diad Biblia amtaen no siopa so antikristo, ya ditan et limaran beses ya abitla.
IMPAAMTAY ANTIKRISTO
Si apostol Juan labat so nansulat ed Biblia ya angusar ed salitan “antikristo.” Antoy imbaga to nipaakar ed antikristo? Imanoen pa irayan salita diad unonan sulat ya tinawag ed ngaran to: “Ananak, sampot la iyan oras, tan anggan natan et dakel iray antikristo, unong a nadngel yo la ya onsabi so antikristo; lapud saya et amta tayo a sampot la iyan oras. Sinmian ira ed sikatayo, ta agtayo ra kabiangan . . . Siopa so matila noag samay mangibuburi a si Jesus et Kristo? Saya so antikristo, samay mangibuburi ed Ama tan ed Anak.”
Atalosan nen apostol Juan ya say antikristo et amin ya mangikakayat na katilaan nipaakar ed si Jesu-Kristo tan saray bangat to
Antoy naaralan tayod satan? Imbaga nen Juan ya “dakel iray antikristo,” labay ton ibaga say antikristo et aliwan saksakey a too, noagta grupo na totoo. Saray totoo o organisasyon ya kaibad antikristo et mangikakayat na katilaan, ag-ira manisian si Jesus so Kristo o Mesias, tan aliway ibabangat da nipaakar ed relasyon na Dios tan say Anak To, si Jesu-Kristo. Saramay antikristo et ibabaga ran sikaray Kristo o mangirerepresentad sikato. Balet diad tua et “sinmian ira ed sikatayo” ta tinaynan da iray tuan bangat na Biblia. Sakey ni, wala la iyan grupo nen nansulat si Juan diad ‘sampot ya oras,’ a nayarin nen manampot lay panaon na saray apostol.
Anto ni arum ya insulat nen Juan nipaakar ed antikristo? Nen tutukoyen to ray palson propeta, impasakbay to: “Kada impuyan a salita et agnanlapud Dios no agbibidbiren na satan so nipaakar ed si Jesus. Niarum ni, saya imay impuyan a salita na antikristo a nadngel yon onsabi, tan natan et wala la ed mundo.” (1 Juan 4:2, 3) Insan diad komaduan sulat nen Juan, imbaga to lamet iyan punto: “Dakel iray managpalikdo diad mundo, ya agmamibidbir a si Jesu-Kristo et nagmaliw a too. Saya imay managpalikdo tan antikristo.” (2 Juan 7) Malinlinew sirin ya atalosan nen Juan ya say antikristo et amin ya mangikakayat na katilaan nipaakar ed si Jesu-Kristo tan saray bangat to.
“SARAY PALSON PROPETA” TAN SAY “TOO NA KAUGSAN”
Impasakbay nen Jesus ya saray palson propeta et onsabi ya singa “mankunkunwarin karnero, balet ta diad tua et sikaray masisiban lobo”
Antis nin insulat nen Juan so nipaakar ed saratan ya manangibalang, abayag lan binilin nen Jesus iray patumbok to: “Manalwar kayo ed saray palson propeta ya oonla ed sikayo a mankunkunwarin karnero, balet ta diad tua et sikaray masisiban lobo.” (Mateo 7:15) Pinasakbayan met nen apostol Pablo iray Kristiano ed Tesalonica: “Agyo aabuloyan a palikdoen kayo na siopaman diad antokaman a paraan, lapud ag-itan onsabi anggad agni agawa so apostasya tan nipatnag so too na kaugsan, say anak na kadederal.”
Kanian nen inmunan siglo, wala la ray palson propeta tan apostata ya pakakapuyen day Kristianon kongregasyon. Amin ya mangikakayat na katilaan tan mangibabalang ed totoo nipaakar ed si Jesu-Kristo tan saray bangat to et kaibad samay imbaga nen Juan ya “antikristo.” Nanengneng no antoy pangipapasen nen Jehova ed sikara nen tinukoy ira nen Pablo ya “anak na kadederal.”
MANALWAR ED SARAY GAGAWAEN NA ANTIKRISTO NATAN
Natan ey? Saray totoo tan organisasyon ya kaibad antikristo et siansia nin kokontraen day Kristo tan saray bangat to. Mangikakayat iray katilaan tan papatitan da ray totoo pian agda natalosay nipaakar ed Ama, si Jehova a Dios, tan say Anak To, si Jesu-Kristo. Kanian manalwar tayo ed saratan ya katilaan. Nengnengen tayoy duaran alimbawa.
Pigaran siglo la ya ikakayat na saray relihyon so doktrina ya Trinidad, ya say Ama tan say Anak et saksakey kuno. Iyaamot sirin na antikristo so katuaan nipaakar ed si Jehova a Dios tan si Jesu-Kristo. Lapud satan et aglaingen naalig na totoon mauyamo si Jesu-Kristo tan ag-ira makaapit ed Dios, a singa ibabaga na Biblia ya gawaen da komon.
Mas lalo da nin ibabalang iray totoo diad panguusar dad saray Biblia ya inekal so ngaran na Dios ya Jehova. Gagawaen da ’tan anggano manga 7,000 beses ya abitla so ngaran ya Jehova diad orihinal ya Biblia. Antoy resulta? Mas lalon niyamot so katuaan nipaakar ed tuan Dios.
Balet dakel ya mauyamon totoo so inmapit ed Dios nen naamtaan day ngaran to ya Jehova. Ontan so agawad si Richard nen akapitongtong ed duaran Tasi nen Jehova. “Impanengneng dad siak ed Biblia ya say ngaran na tuan Dios et Jehova,” so impaliwawa nen Richard. “Manlikliket ak ta wala manayay ngaran na Dios, natan ko labat naamtaan.” Manlapud saman, inuman toy kabibilay to pian unoren iray prinsipyod Biblia tan napaliket si Jehova. “Akatulong so impakaamtak ed ngaran na Dios pian napaapit ak ed sikato.”
Pigaran siglo la ya pansiasiansiaen na antikristo so minilyon ya totoo ed kabilungetan. Balet no aralen tayoy Salita na Dios, say Biblia, naamtaan tayo no siopan talaga so antikristo tan nibulos tayod saray katilaan ya ikakayat da.
Ompan Nagustoan Mo Met
LIBRO TAN BROSYUR
Siopan Talagay Mangokontrol ed Mundo?
Ompan nabigla ka ed ebat na Biblia. Amtaen no akin ya importante iya tan no antoy nagawad arapen.
EBAT ED SARAY TEPET ED BIBLIA
Kasin Walad Biblia so Doktrina ya Trinidad?
Dakel ya relihyon so mangibabangat na Trinidad. Kasin ibabangat itan na Biblia?
ESSENTIAL BIBLE TEACHINGS
Wala ’tay Ngaran na Dios?
Dakel so titulo na Dios, kaiba lay Makapanyarin-amin, Amalsa, tan Katawan. Balet manga 7,000 a danay ya inusar so ngaran na Dios ed Biblia.
