Kada Disyembre, dakel a totoo ed interon mundo so makakanengneng na saray litrato odino imahen na kapangiyanak nin Jesus. Sikatoy walad atotong, sakey a baleg ya kuadradon kargaan na dayami ya kakanen na saray ayayep. Balet duga kasin say nanonotan tayo labat ed si Jesus et amay nen sikatoy kapangiyanak?— * Pantongtongan tayo iray dugan detalye ya nepeg tayon nanonotan nipaakar ed sikato. Naamtaan tayo iratan ed samay agawa, sakey ya labi, ed saray managpastol a walad uma ya asingger ed Betlehem.

Walay sakey ya anghel a biglan nampanengneng ed saray managpastol. Oniay imbaga tod sikara: “Nianak ed sikayo natan . . . so sakey a Manangilaban, say Kristo a Katawan.” Imbaga met na anghel ed sikara ya naromog day Jesus ya “abalkot na abel tan akarukol ed atotong.” Insan nampanengneng so dakerakel nin anghel tan “indaydayew da so Dios.”

Anto kasi naliknam no narengel mo ray anghel ya idadayew day Dios?— Malikeliket iray managpastol! Inkuan da: “Onla tayo lan tampol sirin ed Betlehem tan nengnengen tayo iyan agawa.” Diman da anengneng si “Maria tan Jose, tan say ugaw ya akarukol ed atotong.”

Insan nen kien, linma met la ray arum ed Betlehem diad kawalaan da di Maria tan Jose. Sanen imbagad sikara na saray managpastol so agawa, mankelkelaw iran amin. Maliket ka kasi ed sarayan naamtaan mo?— Siempre, amin tayon mangaarod Dios et maliket. Natan, pantongtongan tayo no akin ya makapalikliket so inkianak nen Jesus. Pian naamtaan tayo, pawilen tayo may panaon nen anggapo ni asawa nen Maria.

Aminsan, binisita na sakey ya anghel a si Gabriel si Maria. Impromisa tod si Maria ya sikatoy mangiyanak na ugaw ya “magmaliw ya importante tan natawag ya  Anak na Sankatageyan.” “Sikato so manuley bilang ari,” so inkuan nen Gabriel, “tan anggapo so anggaan na panarian to.”

Labay ya naamtaan nen Maria no panon iyan nagawa anta anggapoy asawa to. Kanian impaliwawad sikato nen Gabriel: “Tarongan ka na pakayari na Sankatageyan,” tan “say nianak et natawag a masanto, Anak na Dios.” Say pangiyalis ed Anak na Dios manlapud tawen tan pangiyan na bilay to diad panag-anakan nen Maria pian magmaliw ya ugaw et talagan baleg ya milagro!

Akanengneng kayo lay litrato odino displey na “three kings” a kaiba na saray managpastol ya binmisitad kapangiyanak nin Jesus?— Amayamay so ontan no Krismas. Balet aliwan duga iratan. Amay ibabaga ran “three kings,” diad tua et astrologo, say gagawaen na saraya et aglabay na Dios. Nengnengen tayo no antoy agawa kasabi ra. Say ibabaga na Biblia: “Kaloob da ed abung et anengneng da so ugaw a kaiba nen Maria ya ina to.” Kanian aliwa lan kapangiyanak si Jesus ya walad atotong; noagta ugaw a kaiba nen Jose tan Maria diad abung!

Panon ya aromog na saray astrologo si Jesus?— Inggiya ira na sakey ya “bitewen,” aliwan diad Betlehem, noagta dia nid si Arin Herodes diad Jerusalem. Ibabaga na Biblia ya labay nen Herodes ya anapen si Jesus pian pateyen. Nonot yo pa labat iya. Siopa kasi nanlapuan na samay singa bitewen ya angigiyad saray astrologo ed si Herodes?— Aliwan say tuan Dios ya si Jehova, noagta samay kalaban to ya si Satanas a Diablo!

Labay nen Satanas ya isipen na totoo natan a si Jesus et sakey labat ya ugaw ya anggapoy nagawaan to. Balet imbaga nen anghel Gabriel ed si Maria: ‘Sikato so manuley bilang ari tan anggapo so anggaan na panarian to.’ Natan et manuuley lay Jesus bilang Ari diad tawen, tan asingger to lan deralen so amin ya kalaban na Dios. Atan so labay tayon nanonotan ed si Jesus tan nepeg tayon ibaga itan ed arum.