“Sano Manpikasi Kayo, Ibaga Yo, ‘Ama’”

“Ama.” Antoy nanonotan mod sayan salita? Sakey ya maaro tan maasikason laki ya talagan nononoten toy pankaabigan na pamilya to? Odino mapaulyan, o maruksa ni ingen? Akadepende itan ed no anton klase na too so amam.

“AMA” so salitan mabetbet ya uusaren nen Jesus no tutukoyen toy Dios odino no mitotongtong ed sikato. * Nen ibabangat nen Jesus iray patumbok to ya manpikasi, oniay imbaga to: “Sano manpikasi kayo, ibaga yo, Ama.” (Lucas 11:2) Balet anton klase na ama si Jehova? Importantin maong so ebat ed satan. Akin ey? No mas natalosan tayo no anton klase na ama si Jehova, mas napaapit tayod sikato tan mas aroen tayo.

Anggapo lay mas kualipikadon makapangibaga na nipaakar ed Ama tayod tawen nen say si Jesus a mismo. Maapit so relasyon tod si Ama to. Say kuan nen Jesus: “Anggapoy sigpot a makapikabat ed Anak noag say Ama, tan anggapo met so sigpot a makapikabat ed Ama noag say Anak tan say siopaman a labay a pangipaamtaan na Anak.” (Mateo 11:27) Kanian say sankaabigan a  paraan ya nakabat so Ama et diad panamegley na Anak.

Antoy naaralan tayod si Jesus nipaakar ed Ama tayod tawen? Imanoen iyan imbaga to: “Ontan lay panangaro na Dios ed mundo ya inter to so bogbogtong ya Anak to, ta pian balang sakey a mangipapanengneng na pananisia ed sikato et agnaderal noagta nawalaan na bilay ya andi-anggaan.” (Juan 3:16) Diad saratan a salita nen Jesus, napatnagan so manunan kualidad na Ama tayod tawen​—say aro. (1 Juan 4:8) Ipapanengneng nen Jehova so panangaro to diad pangipapatnag ton aabobonan to itayo tan natatalosan toy liknaan tayo, proprotektaan tan didisiplinaen to tayo, tan iiter to ray pankaukolan tayo.

Impasegurod Sikatayo so Panangabobon na Ama Tayo

Napabiskeg tan ompakpel iray anak no nalikna dan naliliketan iray ateng dad gagawaen da. Isip yo pa no panon ya apabiskeg si Jesus nen arengel ton imbaga nen Ama to: “Saya so Ana’ko, say inad-arok, ya inabobonan ko.” (Mateo 3:17) Pinaseguroan itayo met nen Jesus ed panangaro tan panangabobon na Ama. Inkuan to: “Samay mangaaro ed siak et aroen nen Amak.” (Juan 14:21) Makaligliwa iratan ya salita! Balet walay sakey a malabay ya agtayo nalikna itan.

Paniisipen itayo nen Satanas ya agnaliliketan ed sikatayo so Ama tayod tawen. Manggagaway paraan pian nakombinsi to tayon agtayo makanepegan ed panangabobon na Dios. Mabetbet ton gagawaen itan no kapigan makapkapuy itayo​—no mansasakit, makapuy, o matatken la, odino naeermenan itayo ta wala ray agtayo nagagawaan tan walay pakakadismayaan tayo. Isipen pay agawad sakey a lakin manngaray Lucas, ya say pakalikna to et agmakanepegan ed panangabobon na Dios. Ibabaga nen Lucas ya nen sikatoy manbalbalolaki, baleg so impanguman na saray ateng to, tinaynan da ray maong ya espiritual ya ugalin imbangat dad sikato. Nayarin lapud satan kanian naiirapan ya onapit ed Ama tod tawen. Sakey ni, lapud say ugali to et basta bastan mandedesisyon, mabetbet ya naproproblema lalo la diad relasyon tod arum. Balet say maanos tan makapabiskeg ya asawa to​—ya parad si Lucas et “espisyal ya bendisyon, sakey a regalo na Dios”—​et kalkalnan tinmulong ed sikato ya kontrolen itan ya ugali to. Amoria nen Lucas ya “si Kristo Jesus et linma ed mundo pian ilaban to iray managkasalanan.” (1 Timoteo 1:15) Imbaga nen Lucas ya lapud pannonodnonot tod panangaro tan panangabobon na Dios, alikna toy liket tan inkakontento.

No wala ray panaon ya manduaruwa ka no kasin naaro ka na Dios odino naliketan ed sika, ompan makatulong so pambasam tan pannodnonot mod Roma 8:31-39. Ditan et maaron pinaseguroan itayo nen apostol Pablo ya anggapoy “makapangisian ed sikatayo ed aro na Dios a walad si Kristo Jesus a Katawan tayo.” *

Ama ya Walay Maaron Panangabagey

Natatalosan na Ama tayod tawen so paniirap tayo. Sikato so Dios a walay “maaron panangabagey.” (Lucas 1:78) Inalig nen Jesus so panangabagey odino panangasi nen Ama to ed totoon agperpekto. (Marcos 1:40-42; 6:30-34) Pansasagpotan met na saray tuan Kristiano ya aligen so panangabagey na Ama rad tawen. Uunoren day ganggan na Biblia ya ‘ipanengneng so kaabigan ed balang sakey, magmaliw ya maabagey.’​—Efeso 4:32.

Nonoten pay eksperiensya na sakey a lakin manngaran na Felipe. Sakey agew nen sikatoy paonlad trabaho, biglan akaliknay pirmin sakit, a singa sinaksak ed beneg. Imbatik dad hospital. Kayari dan ineksamin ya waloy oras, naamtaan na saray doktor ya apilat so ulat ed puso to. Say kuan da et 25 minuto labat lay pambilay to tan anggapo lay nagawaan anggano operaan ni.

Wadman iray kapananisiaan nen Felipe, tan lapud panangabagey da apakiwas iran ontulong. Inyalis dan tampol ed arum ya hospital,  tan sikatoy naoperaan. Ag-ira inmalis anggad ag-asumpal so operasyon. Makapalikliket ta aka-survive si Felipe. No nanonotan to iraman ya agawa, misalsalamat si Felipe ed panangabagey ya impanengneng na saray kapananisiaan to. Balet amta to ya say Ama tod tawen so amakiwas ed sikaran ipanengneng so panangabagey. “Singa akaalagey so Dios ed abay ko, a singa maaron ama ya mamapabiskeg ed siak,” so kuan nen Felipe. On, mabetbet ya ipapanengneng nen Jehova so panangabagey to diad pamapakiwas tod saray lingkor tod dalin ya ipatnag itan a kualidad.

Proprotektaan Itayo na Ama Tayo

No nalikas na ugaw so peligro, ombatik ed ama to pian paprotektaan. Nalikna na ugaw ya sikatoy maligen ed maaron lakap na ama to. Si Jesus et sigpot a nanmatalek ya sikatoy protektaan nen Jehova. (Mateo 26:53; Juan 17:15) Magmaliw tayo met ya maligen diad proteksion na Ama tayod tawen. Say proteksion ya manunan iiter nen Jehova natan et espiritual. Labay ton ibaga, proprotektaan to itayod saray makaderal ed espiritual diad pangiiter toy nakaukolan tayo pian napaliisay peligro tan napansiansia tayoy pikakaarod sikato. Say sakey ya paraan ya iiter na Dios so proteksion to et panamegley na nibase ed Biblia ya simbawa. No makaawat itayo na ontan iran simbawa, singano manaakar si Jehova diad benegan tayo ya ibabaga ton: “Saya so dalan, ondalan kayo ed sikato.”​—Isaias 30:21.

Imanoen pay alimbawa nen Tiago tan saray agagi to, si Fernando tan Rafael, ya membro na rock-and-roll ya banda. Talagan eksayted ira nen apili ran mantugtog diad sakey a kabkabat ya music hall ed São Paulo, Brazil. Singa magano la ran onsikat. Balet, walay sakey ya kapananisiaan dan pinasakbayan to rad kapeligroay piulop ya lanang ed saramay say kabibilay da et mangibabaliwalad prinsipyo na Dios. (Uliran 13:20) Indanet to itan a nibase ed Biblia ya simbawa diad impangistorya tod mismon eksperiensya to. Say agi to et akagaway makapuy lapud mauges iran kaulop. Kanian nandesisyon si Tiago tan saray agagi to ya taynan so panagtugtog. Natan, sikaran talo et full-time la ya manpupulong. Manisia ran say impangunor dad simbawa na Salita na Dios so namprotektad sikara ed espiritual a kapeligroan.

Didisiplinaen Itayo na Ama Tayod Tawen

Say maaron ama et disiplinaen to ray anak to, lapud mapaga ed no anton klase na too so pagmaliwan da. (Efeso 6:4) Nayarin mapekder so ontan ya ama, balet aliwan maruksa no ipepetek to ray anak to. Ontan met, no maminsan et kaukolan itayon disiplinaen na Ama tayod tawen. Balet naynay a maaro tan agbalot maruksa so panagdisiplina na Dios. Ontan met si Jesus, singa say Ama to, sikatoy aliwan maruksa  anggano agtampol onkiwas iray disipulo to ed panangipetek to.​—Mateo 20:20-28; Lucas 22:24-30.

Imanoen no panon ya naapresya na sakey a lakin manngaran na Ricardo so maaron impandisiplina nen Jehova ed sikato. Si Ricardo et inabandona nen ama to nen pitoy bulan to ni labat. Nen tinedyer la, diman ton talaga alikna ya kaukolan toy sakey ya ama. Wala ray makapuy ya gagawaen to, tan nakokonsiensian maong. Nen amoria ton say kabibilay to et aliwan unong ed estandarte ed moral na Kristiano, nandesisyon a mitongtong ed saray elder ed kongregasyon ya aatendian to. Mapekder balet maaro dan sinimbawa si Ricardo base ed Biblia. Inawat toy disiplina balet ta siansia nin nanirap lapud saray resulta na ginawa to​—agmakakaugip na labi, akis lan akis, tan a-depress. Anggad amoria to ya sikatoy dinisiplina lapud sikatoy inaro nen Jehova. Anonotan nen Ricardo iray salita ed Hebreos 12:6, a kuan to: “Say aaroen nen Jehova et didisiplinaen to.”

Maabig no tandaan tayon say disiplina et aliwa labat lan panusa o pamasnok lapud makapuy ya ginawa. Ikokonekta met na Biblia so disiplina ed panangipasal. Kanian nayarin disiplinaen itayo na maaron Ama ed tawen diad pangiyabuloy ton magano ya manirap itayo lapud makapuy iran resulta na lingo tayo. Balet ipapatnag na Biblia ya say disiplina to et mangipapasal ed sikatayo, ontutulong ed sikatayon gawaen so duga. (Hebreos 12:7, 11) On, talagan mapaga so Ama tayo ed kipapasen tayo tan ipepetek to itayo parad pankaabigan tayo.

Itatarya na Ama Tayo Iray Pisikal ya Pankaukolan Tayo

Mansasagpot so maaron ama ya itarya iray pisikal tan materyal ya pankaukolan na pamilya to. Ontan met si Jehova. “Amta na Ama yo ed tawen a nakaukolan yo irayan amin,” so kuan nen Jesus. (Mateo 6:25-34) Insipan nen Jehova: “Agta kan balot taynanan tan agta kan balot paulyanan.”​—Hebreos 13:5.

Apaneknekan nen Nice ya tua iratan ya salita nen naandiay trabaho so asawa to. Kakkapan-resign ni nen Nice ed trabaho ya atagey so sueldo pian mas dakel so panaon to parad duaran anak ton bibii tan diad panaglingkor ed Dios. Pangalaan da lay pambilay da ey? Sikatoy nampikasid si Jehova. Diad tinmumbok ya agew, linmay asawa to ed pantratrabahoan to pian alaen iray gamit to. Abigla nen imbaga na boss to ya walay arum a trabaho ya abakante tan inyopresi to itan ed sikato! Kanian naandian na trabaho so asawa nen Nice ya sakey agew, balet asalatan lanlamang diad tinmumbok ya agew. Akisalamat si Nice tan si asawa to ed Ama da ed tawen lapud maabig ya nansumpalan. Ipapanonot ed sikatayo na eksperiensya da ya bilang maaron Manangitarya tayo, agbalot paulyanan nen Jehova iray matoor a lingkor to.

Apresyaen so Panangaro na Ama Tayo

On, agnadeskribe na saray salita so makapadinayew ya panangaro na Ama tayod tawen! No isipen tayo ray nanduruman paraan ya ipapanengneng toy panangaro a singa sakey ya ama​—diad panangabobon, panangabagey, proteksion, tan panagdisiplina, ontan met ed pangitataryay pankaukolan tayo—​seguradon nibaga tayon sikato so sankaabigan ya Ama!

Panon tayon nipatnag so pisasalamat ed panangaron impanengneng na Ama tayod tawen? Pansagpotan tayon kabaten a maong tan amtaen iray gagala to. (Juan 17:3) Manbilay itayo unong ed linawa tan paraan to. (1 Juan 5:3) Sarag tayo met ya ipanengneng so panangaro to diad panagtrato tayod arum. (1 Juan 4:11) Diad saratan ya paraan, nipatnag tayo ya si Jehova so Ama tayo tan ipapasen tayon kagalangan so magmaliw ya ananak to.

[Saray paimano ed leksab]

[Blurb ed pahina 19]

No mas natalosan tayo no anton klase na ama si Jehova, mas napaapit tayod sikato tan mas aroen tayo

[Blurb ed pahina 22]

Nipatnag tayo ya si Jehova so Ama tayo tan ipapasen tayon kagalangan so magmaliw ya ananak to

[Kahon/Saray litrato ed pahina 21]

IPAPANENGNENG NEN JEHOVA SO PANANGARO TO BILANG AMA DIAD NANDURUMAN PARAAN

PANANGABOBON

PANANGABAGEY

PROTEKSION

PANAGDISIPLINA

PANANGITARYAY PANKAUKOLAN