Kasin Antam La?

Antoy labay ya ibaga nen Jesus ed samay imbaga ton mila ka ed duaran milya?

▪ Diad kabkabat a Sermon nen Jesus ed Palandey, inrekomenda to: “No say sakey a walad autoridad et piliten to kan manserbi ed sikato ed sakey a milya, mila ka ed sikato ed duaran milya.” (Mateo 5:41) Nayarin atalosan na saray ondedengel ed si Jesus a say tutukoyen to et say panggawad kimey ya ipapasoot na sakey a walaay autoridad ed saray uuleyan to.

Nen inmunan siglo C.E., sinakop na Roma so Israel. Pinuersa da ray totoo tan ayayep ya mankimey tan inuleyan day amin ya iisipen dan nakaukolan pian nasumpal a tampol so labay da. Singa bilang, pinasoot na saray Romanon sundalo si Simon ya taga Cirene ya sakbaten toy panamairapan a kiew nen Jesus paonlad pasen ya pangipasakan dad sikato. (Mateo 27:32) Say ontan ya panamilit et maruksa, aglabay na karaklan, tan kabkabusol na saray Judio.

Agtayo amta no anggad iner da ra napasoot. Balet, seguradon agda labay so manggawa na mas ni nen say ipapagawad sikara. Kanian nen imbaga nen Jesus ed saray ondedengel ed sikato ya mila ed duaran milya, labay ton ibaga et gawaen dan anggapoy sakit na linawa iray kimey ya makatunongan ya ipapagawad sikara na saray manuuley.​—Marcos 12:17.

Siopa imay Anas ya abitlad saray Ebanghelyo?

▪ Diad panaon na bista nen Jesus, si Anas (Ananus) et tinukoy ya “manunan saserdote.” (Lucas 3:2; Juan 18:13; Gawa 4:6) Sikato so katulangan na atagey a saserdote na Israel a si Caifas, tan anggan sikato et nanlingkor met bilang atagey a saserdote manlapud manga 6 odino 7 C.E. anggad nen sikatoy inekal ed satan a posisyon na Romanon gobernador a si Valerius Gratus nen manga 15 C.E. Anggano aliwa lan atagey a saserdote, siansia nin maimpluensya si Anas ed Israel. Limarad saray anak ton lalaki tan say manugang ton laki so nagmaliw met ya atagey a saserdote.

Nen say Israel et bulos nin bansa, say atagey a saserdote et mansiansia ed posisyon to legay bilay. (Numeros 35:25) Balet nen asakop la itan na Roma, saray Romanon gobernador tan ari ya pinili na Roma so mamipili no siopay labay dan magmaliw ya atagey a saserdote, tan sikatoy sarag da met ya ekalen. Inkuan na historian a si Flavius Josephus ya inekal nen Quirinius, say Romanon gobernador na Syria si Joazar bilang atagey a saserdote nen manga 6 odino 7 C.E. tan insalat toy Anas. Anggaman ontan, singa seseguroen met na sarayan paganon manuley a say pilien da et manlapud poli na saray saserdote.

Say pamilya nen Anas et alablabas so inkaagum da tan mayamyaman iran maong. Nayarin yinmaman ira lapud kontrolado day panaglako ed loob na templo na saray kaukolan ed panagbagat singa saray malapati, karnero, larak, tan alak. Inkuan nen Josephus ya si Ananus (Ananias), ya anak nen Anas et wala ray “aripen ton agaylay inkaloko ra tan ipasoot dan alaen ed saray totoo iray kakaplo parad saray saserdote; tan sakitan day siopaman ya agmangiter.”