Onapit ed Dios

Kasin Walay Liknaan nen Jehova?

NO SAY ebat et on, nia ni sakey ya tepet: Kasin naapektoan na ugali tayo so liknaan na Dios? Ya nayarian tayon paliketen odino sakitan so Dios ed saray kagagawa tayo? Ibabaga na arum ya philosopher nensaman ya andi. Irarason da ya agnaapektoan na anggan siopaman so Dios tan sirin et sikatoy andian na pakalikna. Balet ibabangat na Biblia ya si Jehova et maaro tan mapaga ed saray gagawaen tayo. Aralen tayo pa ray salitan walad Salmo 78:40, 41 unong ed Maung a Balita.

Insalaysay na Salmo 78 so impideneng na Dios ed Israel nensaman. Kayari impangiliktar nen Jehova ed satan a nasyon manlapud panangaripen na Ehipto, inyopresi tod sikara so pakawalaan na espisyal a relasyon ed sikato. Imbaga to a sano mansiansia iran matulok ed saray ganggan to, sikaray magmaliw a ‘pabpablien a pinagka-kayamanan’ to tan nausar ira pian nasumpal so gagala to. Inmabobon tan akipakna ra panamegley na Ganggan a sipanan. Kasin tinoor da iya?​—Exodo 19:3-8.

Inkuan na salmista: “Naynay iran sinmumpad sikato diad kalawakan!” (Bersikulo 40) Oniay inkuan na tinmumbok a bersikulo: “Inulit-ulit dan sinubok so Dios.” (Bersikulo 41) Imanoen a deniskribe na nansulat so nantutumbokan ya impanrebelde. Agawa iyan impanrebelde diad kalawakan ag-abayag kayari na inkiliktar da ed Ehipto. Nanreklamo ra sumpad Dios, kinuestion da no kasin sarag tan mabulos to ran asikasoen. (Numeros 14:1-4) Inkuan na sakey a reperensya parad saray managpatalos na Biblia a saray salitan “sinmumpad sikato” et nayarin “ibagan ‘pinaawet day puso ra sumpad Dios’ odino ‘inkuan dan “Andi” ed Dios.’” Balet, lapud panangasi nen Jehova, perdonaen to ra no ipatnag day panagbabawi. Siansian ag-ira anguman tan intultuloy day nanrebelde.​—Salmo 78:10-19, 38.

Antoy alikna nen Jehova ed kada panrebelde na saray agmatoor a totoo to? Sikatoy “aminpiga-pigan pinaermen da,” so inkuan na bersikulo 40. Ibabaga na sananey ya patalos a “sikatoy sinakitan” da. Unong ed sakey a reperensyad Biblia: “Labay ya ibaga na saya a talagan makapasakit so kagagawa na saray Hebreo, a singa ed ginawa na sakey ya agmatulok tan rebelyoson anak.” Singa say anak ya bangar et mamaermen a maong ed atateng to, saray rebelyoson Israelita et ‘amasanok ed Masanton Dios na Israel.’​—Bersikulo 41.

Antoy naaralan tayo ed sayan salmo? Makapaliket a naamtaan ya papablien a maong nen Jehova iray mandadayew ed sikato tan agto ira bastabasta taynan. Makatunongan met a nonoten ya walay liknaan nen Jehova tan say kagagawa tayo so mangapektad sikato. Antoy epekto na satan ed sika? Napakiwas ka kasin gawaen so duga?

Imbes a manggaway mauges tan paermeney Jehova, sarag tayon pilien a gawaen so maabig tan paliketey puso to. Ontan so mismon kekerewen tod saray mandadayew ed sikato: “Anako, onkabat ka, tan paliketen mo so pusok.” (Uliran 27:11) Anggapo lay mas maabig ya niiter tayod si Jehova noag say pambilay ed paraan ya makapaliket ed puso to.

[Blurb ed pahina 10]

Anggapo lay mas maabig ya niiter tayod si Jehova noag say pambilay ed paraan ya makapaliket ed puso to