Onapit ed Dios

“Siak a Jehova a Dios Yo et Santo Ak”

Levitico Kapitulo 19

“MASANTO, masanto, masanto so Katawan a Dios.” (Apocalipsis 4:8, Maung a Balita) Diad saratan a salita, ipapanengneng na Biblia a si Jehova so sankasantosan, salanti, agnaparaay inkadalisay tan inkalinis to. Agbalot onaplika ed Dios so salitan kasalanan, tan sikatoy agbalot narutakan o namantsaan na kasalanan ed antokaman a paraan. Kabaliksan kasi na saya ya agsarag na imperpekton too so nawalaay relasyon ed Dios ya agnaparaan ed inkasantos? Siempre, andi! Pantongtongan tayo pa iray makapaligliwan salita a walad Levitico kapitulo 19.

Inkuan nen Jehova ed si Moises: “Ibagam ed sankaduypoan na saray anak na Israel.” Say onsublay iran salita To et onaplika ed interon nasyon. Anto kasi papaibagay Dios ed sikara? Oniay intuloy na Dios: “Salitaen mo ed sikara a kuan mo: Sikayo, onsantos kayo naani, lapu ed siak a Jehova a Dios yo et santo ak.” (Bersikulo 2) Kada Israelita et nepeg a mangipatnag na inkasantos. Say balikas ya “onsantos kayo” et aliwan suhestion noagta sakey a ganggan. Imposible kasi so kekerewen na Dios?

Imanoen a sinalambit na Dios so inkasantos to pian ipaamtay rason na ganggan to, aliwan pian ikdan iray estandarten aboten da pian makapipara’d sikato. Diad arum a salita, ag-imbaga nen Jehova ed saray imperpekton managdayew to ed Israel a paraan day inkasantos to, ta imposible itan. Si Jehova, say “Sankasantosan,” so sankasuperyoran no kasabi’d inkasantos. (Uliran 30:3) Balet, lapud si Jehova et masanto, iilaloan ton magmaliw met a masanto iray managdayew to, salanti, anggad samay sankaposiblian lan nasarag na imperpekton too. Panon dan nipatnag so inkasantos?

Kayarin inter nen Jehova so ganggan nipaakar ed inkasantos, sinansakey to, panamegley nen Moises, iray ganggan a mangilalanor ed amin ya aspekto na bilay. Kada Israelita et iilaloan a mangunor ed saray estandarte ed kondukta a singa say pangigalang ed atateng tan maedad la (bersikulo 3, 32); pangipatnag na konsiderasyon ed saray telek, bulag, tan arum niran maniirap (bersikulo 9, 10, 14); pagmaliw a matua tan patas ed pidedeneng (bersikulo 11-13, 15, 35, 36); tan pangaro ed kaparan managdayew a singa ed dili (bersikulo 18). Diad pangunor ed saraya tan ed arum nira, magmaliw a ‘masantos ed Dios’ iray Israelita.​—Numeros 15:40.

Lapud sayan ganggan nipaakar ed inkasantos, mas natalosan tayoy panagnonot tan saray paraan nen Jehova a Dios. Alimbawa, naamtaan tayo a pian nawalaay maapit a relasyon ed Dios, nepeg tayon panseetan so manbilay unong ed saray estandarte to ed masanton kondukta. (1 Pedro 1:15, 16) No tumboken tayo iraya, napanliketan tayoy sankaabigan lan bilay a posiblin nagamoran natan.​—Isaias 48:17.

Ipapatnag met na ganggan nipaakar ed inkasantos so talek nen Jehova ed saray managdayew to. Ag-itayon balot anapan nen Jehova na agtayo nayarian. (Salmo 103: 13, 14) Amta ton sikatayo ran totoo, a ginawa unong ed indengan to, et walaay potensyal a magmaliw a masanto. (Genesis 1:26) Kasin apaseseg kan mas manaral ni no panon kan napaapit ed masanton Dios a si Jehova?

[Litrato ed pahina 9]

Walaan itayoy potensyal a mamayubo na inkasantos