No Panon Mon Natalosan so Biblia

3. Awat Moy Tulong na Arum

Sanen ginapoan na managdiskobrin si Edward John Eyre so andukey tan mairap a biahe pian beltangen so Nullarbor Plain, sikatoy imbangat na saray katutubo ditan no panon so panipon na danum manlapud saray pinmupukdol a buer tan kakiewan ya eukaliptus. Lapud inawat toy tulong na sarayan makapikabisado ed satan a pasen, nisalbay bilay to.

SINGA ipapanengneng na sayan alimbawa, pian nagawaan tayoy sakey a mairap a kimey, kaslakan lan kaukolan tayoy tulong na saray mas eksperiensyado. Ontan met so kaukolan no gapoan mon basaen so Biblia.

Si Jesus et agto inilaloan a natalosan na saray patumbok to so Biblia ya anggapoy tulong na arum. Aminsan, “nilukasan to so saray kaisipan da, pian natalosan da so saray sulat.” (Lucas 24:45) Amta nen Jesus a saray manbabasa na Biblia et kaukolan day tulong pian natalosan da ray bangat na satan.

Siopay Panlapuan na Tulong?

Ingganggan nen Jesus iray tuan patumbok to ya iter da iyan klase na tulong. Antis na insegep to ed tawen, oniay ingganggan to: “Onla kayo sirin, tan manggawa kayo na saray babangatan ed amin a nasyones, . . . ya ibangat yo ran mangunor na amin a bengabengatla ya ingganggan  ko ed sikayo.” (Mat. 28:19, 20) Say manunan kimey na saray Kristiano et say panagbangat, a kaiba’d satan so pangipaliwawa no panon a niyaplika iray prinsipyo ed Biblia ed inagew-agew a bilay. Tutulongan na saray tuan Kristiano so arum pian natalosan so Biblia.

Ag-abayag kayarin inter nen Jesus ed papatumbok to itan a kimey, walay balibalin agawa. Insalaysay na Biblia a walay sakey ya atagey ya opisyal ed Etiopia a manbabasa na kabiangay propesiya nen Isaias tan walay agto atalosan. Unong ed rekord na Biblia, saya imay bersikulon agto atalosan: “Singa sakey a [karnero] a niyakar ed panagpateyan. Tan singa kilaw na karnero a naemel ed arap na manangis ed sikato. Ontan ya agto biswaten so sangi to. Dia ed impanpaabeba to inekal da so katunongan to. Siopa naani mangipaliwawa ed kapolian to? Ta say bilay to naekal dia ed dalin.”​—Gawa 8:32, 33; Isaias 53:7, 8.

Tinepetan na sayan opisyal si Felipe, sakey ya eksperiensyadon Kristiano a kabkabisado toy  Kasulatan: “Siopa so tutukoyen dia na propeta? Nipaakar ed inkasikato odino nipaakar ed arum a too?” (Gawa 8:34) Sayan masimoon ya Etiope et ayari lan linma ed Jerusalem pian mandayew, tan nayarin impikasi ton sikatoy nigiya komon. Mapatnag a sikatoy mauyamo tan interesadon maong ed babasaen to. Balet siansian agto natatalosan itan. Kanian sikatoy mapaabeban nampatulong ed si Felipe. Sikatoy alikeliketan ed eksplinasyon nen Felipe, kanian apakiwas a magmaliw a Kristiano.​—Gawa 8:35-39.

Sayan ginawa nen Felipe tan arum niran Kristiano nensaman et gagawaen nin siansia na saray Tasi nen Jehova. Diad masulok a 235 a bansa, bulontaryo ran tutulongan so arum pian natalosan da no antoy peteg ya ibabangat na Biblia. Gagawaen da itan panamegley na tema-por-teman panagaral ed Kasulatan. Diad sayan metodo na panagaral et uusisaen da no antoy ibabaga na Biblia nipaakar ed sakey a tema. *​—Nengnengen so kahon a  “Makapnek Iran Ebat ed Saray Tepet Nipaakar ed Biblia.”

“Naebatan so Amin a Tepet Ko”

Si Steven, si Valvanera, tan si Jo-Anne, ya abitla niman et ginmapon nanaral na Biblia ed saray Tasi nen Jehova. “Onman manaya! Wala la’d Biblian mismoy ebat, basta pankokonektaan mo labat iray pigaran prinsipyo tan salaysay ditan,” so inkuan nen Steven. “Nen agak ni manaaral na Biblia, anggapoy akapangibangat ed siak no panon itan a gawaen. Makapaliket a naamtaan ya agla kaukolan so agmanundan debatian tan pankokontraan na opinyon pian natalosan so Biblia.”

Onabobon ed satan si Valvanera. “Amin a naaralan ko et malinlinew tan lohikal,” so inkuan to. “Amin manaya et walay makatunongan ya eksplinasyon, kanian aliwan daput no ibabangat na Simbaan et panisiaan ko la.” Oniay inkuan nen Jo-Anne: “Sanen naebatan na Biblia so amin a tepet ko, mas binmaleg so respetok ed samay nanlapuan na satan, ta amta ton dakel so itepet tayo kanian impaisulat to la ray makapnek ya ebat.”

Wala ta’y kabat mon Tasi nen Jehova? Salim pan paidemostra ed sikato no panon ton ibabangat so nipaakar ed Biblia. No anggapoy kabat mo, ipangasin mansulat ed sakey ed saray address a walad pahina 4 na sayan magasin. Panamegley na masanton espiritu na Dios, lukas a nonot, tan tulong na kualipikadon managbangat na Biblia, mainomay mon natalosan so Salita na Dios. On, sarag mon talosan so Biblia!

[Paimano ed Leksab]

[Kahon/Litrato ed pahina 8]

 Makapnek Iran Ebat ed Saray Tepet Nipaakar ed Biblia

Nia so pigara’d saray tema ya ibabangat na saray Tasi nen Jehova diad programa da ed panagaral na Biblia:

• Anto so gagala na Dios ed dalin?

• Iner so kawalaan na saray inaatey?

• Kasin manbibilay itayo la ed “saray kaunoran ya agew”?

• Akin ya aabuloyan na Dios so kairapan?

• Panon mon gawaen a maliket so bilay na pamilyam?

[Saray litrato ed pahina 7]

Pian natalosan moy Biblia . . . kerew moy espiritu na Dios diad pikakasi, ilukas moy nonot mo ed saray nababasam, tan awat moy tulong na arum