Aligen so Pananisia Ra

‘Nia so Aripen na Katawan!’

ABIGBIGLA si Maria legan ya onloloob so bisita ed abung da. Agtinepet na sayan bisita no iner so kawalaan na atateng to, noagta say pegdat to et si Maria! Segurado si Maria ya aliwa iyan taga-Nazaret. Diad kamelag na satan a baley, nabidbir a tampol iray sankaili. Balet sayan bisita et nibiig a tampol anggan iner so laen to. Nidumaduma so impangibano to ed si Maria, a kuan ton: “Manggayaga ka, ta pinalaboan kay Dios! Say Katawan walad sika!”​—Lucas 1:28, Maung a Balita.

Ontan so impangipakabat na Biblia ed si Maria, anak nen Eli, a taga-Nazaret dia ed Galilea. Sayan bii et impakabat ed sikatayo na Biblia diad panaon a sikatoy manggawa na sankaimportantian a desisyon ed bilay to. Si Maria et akisipan a miasawa ed si Jose, a sakey a karpenteron aliwan mayaman, balet ta matoor ed Dios. Kanian singano niplano lan maong so bilay to, salanti, simplin bilay bilang asawan bii ya onsuporta ed masiken to tan manpamilya a kaiba to. Kabebekta, walay binmisita ed sikaton mangipasabi na sakey ya asainmin manlapud Dios, sakey a responsabilidad a manguman ed bilay to.

Nayarin pankelawan yo no nakabatan yon daiset labat so ibabaga na Biblia nipaakar ed si Maria. Pigpigara labat so nabasa nipaakar ed pamilya to, say personalidad to, tan anggapon balot so asalambit nipaakar ed itsura to. Anggaman ontan, dakel so naaralan tayo manlapud rekord na Salita na Dios.

Pian magmaliw itayon pamilyar ed si Maria, kaukolan a paulyanan tayo ni iramay sisisiaen ya ibabangat na saray nanduruman relihyon. Kanian agtayo pantongtongan so itsura to ya impinta odino gawa ed marmol. Agtayo met pantongtongan iray komplikado a bangabangat tan abayag lan doktrina ya angiter ed sayan mapaabeban bii na atagtagey iran titulo a singa say “Ina na Dios” tan “Reyna na Tawen.” Imbes, iteen tayo so imano tayo ed talagan ibabaga na Biblia nipaakar ed sikato. Iikdan itayo na saya na makanakanan pakatalos nipaakar ed pananisia nen Maria tan no panon tayon naalig itan.

Binisita na Anghel

Amta tayon say binmisita ed si Maria et aliwan sakey a too, noagta si anghel Gabriel. Sanen tinawag to si Maria a “pinalaboan,” “apagaan a tuloy” iyan marikit ed saratan a salita tan nikelawan ed sayan nidumaduman impangibano. (Lucas 1:29) Siopa so amalabo ed sikato? Ag-iilaloan nen Maria a sikatoy palaboan na saray totoo. Imbes, say sasalitaen na anghel et nipaakar ed panamalabo nen Jehova a Dios. Importantin tuloy itan ed si Maria. Balet, siansia nin sikatoy agmapaatagey a nan-isip a sikatoy pinalaboan na Dios. No panseetan tayon gamoran so panamalabo na Dios, ya agbalot matangsit ya ipasen a wala la ed sikatayo itan, makaaral itayo na makanan leksion ya atalo-talosan nen marikit a Maria. Susumpaen na Dios iray mapaatagey, balet ta aaroen tan susuportaan to iray mauyamo tan mapaabeba.​—Santiago 4:6.

Kaukolan a mansiansian mapaabeba si Maria lapud sikatoy inopresian na anghel na ag-iilaloan a pribilehyo. Impaliwawa na anghel ya ilukon to so magmaliw a sankaimportantian ed amin a too. Inkuan nen Gabriel: “Iter na Dios a Katawan ed sikato so trono nen David ya ama to; et manari lawas ed abung nen Jacob; et say panarian to andi-angga.” (Lucas 1:32, 33) Seguradon amta nen Maria imay sipan na Dios ed si David, masulok a sanlibon taon lay apalabas, salanti, say andi-anggaan a panuley na sakey ed saray ilalak to. (2 Samuel 7:12, 13) Kanian say anak nen Maria et magmaliw a Mesias a pigay siglo lan tatalaranan na saray lingkor na Dios!

 Kaaruman ni, inkuan na anghel ed sikaton say anak to et “ningaran ya Anak na Sankatageyan.” Panon a makapawalay Anak na Dios so sakey a toon bii? Insan, panon a manlukon si Maria? Sikatoy akisipanan la ed si Jose balet ta agni’ra sanasawa. Prangkaan ya intepet nen Maria: “Panon iyan nagawa, anta sakey ak a birhen?” (Lucas 1:34, Maung a Balita) Imanoen ya ag-imbaing nen Maria a sikatoy sakey a birhen. Imbes, pinabpabli ton tuloy so inka-birhen to. Diad sayan panaon tayo, dakerakel a kalangweran so malabay a mangipakerew ed inka-birhen da tan susutil-sutilen da iray birhen ni. Talagan anguma-uman lay mundo. Ingen ta si Jehova et ag-anguman. (Malaquias 3:6) Singa ed panaon nen Maria, papablien nen Jehova iramay ontutulok ed atagey ya estandarte to ed moral.​—Hebreos 13:4.

Anggaman matoor a lingkor na Dios si Maria, sikatoy ag-ayadyarin too. Panon sirin a sikatoy makapawala na ayadyarin anak, say Anak na Dios? Impaliwawa nen Gabriel: ‘Say masanton espiritu onla ed sika tan say pakapanyari na Sankatageyan tarongan to ka. Kanian say nianak met ningaran naani a masanto, say Anak na Dios.’ (Lucas 1:35) Say kabaliksan na masanto et “malinis,” “puro,” tan “sagrado.” Natural labat a natawir na ananak so ag-inkayadyari na atateng da. Balet ta diad sayan pankanawnawa et manggawa si Jehova na nikadkaduman milagro. Iyalis to so bilay na Anak to manlapud tawen diad eges nen Maria tan usaren to so aktibon puersa to odino masanton espiritu a ‘mantarong’ ed si Maria, pian agnatawir na ugaw so kasalanan. Kasin anisiaan nen Maria so insipan na anghel? Antoy inyebat nen Maria?

Say Ebat nen Maria ed si Gabriel

Saramay manduaruwa ed sayan milagro, kaiba la iray managbangat na relihyon na Kakristianoan et agmakapanisian say sakey a birhen et mananak. Anggaman sikaray akapanaral, agda natalosan so sakey a simplin katuaan. Unong ya imbaga nen Gabriel, “anggapoy agnagawaan na Dios.” (Lucas 1:37, Maung a Balita) Anisiaan nen Maria so imbaga nen Gabriel, lapud sikatoy walaan na baleg a pananisia. Balet, agto labay ya ibagan unor-unor labat si Maria ed imbaga na anghel. Singa met ed anggan siopaman a makatebek a too, kaukolan ni nen Maria so paneknek a pangibasian na pananisia to. Kanian akaparaan si Gabriel a paneknekan ni itan a nagkalalo ed si Maria. Imbaga na anghel ed sikato so nipaakar ed akulaw lan kanayon to a si Elizabet, ya abayag lan kabkabat a lepes. Balet, nanggawa so Dios na milagro pian sikatoy manlukon!

Natan, anto so gawaen nen Maria? Sikatoy walaan na asainmin tan walaray paneknek ya amin ya imbaga nen Gabriel et tooren na Dios. Agtayo nepeg ya isipen a sayan pribilehyo et anggapoy katekep ton kapagaan tan irirap. Say sakey ya ikonsidera nen Maria et say impisipanan to la ed si Jose. Kasin sikatoy labay nin asawaen nen Jose no nakabatan ton malukon? Sakey ni, say niiter ed sikaton asainmin et balbaleg a responsabilidad. Ilukon to so pinabpablin pinalsa na Dios, salanti, say inararo Ton Anak! Sikatoy kaukolan a mangasikaso ed kapkapangiyanak ya ugaw tan manalimbeng ed sikato manlapud mauges a mundo. Talagan baleg a responsabilidad!

Ibabaga na Biblia a no maminsan et anggan saray mabiskeg tan matoor a lalaki et ngalngali agmangawat ed mairap iran asainmin manlapud Dios. Singa bilang, inkuan nen Moises a sikatoy  agmarunong a mansalita kanian agnayarin magmaliw a pinagkasangiyan na Dios. (Exodo 4:10) Imbaga met nen Jeremias a sikatoy “ugaw” ni pian awaten so kimey ya inter na Dios ed sikato. (Jeremias 1:6) Tan imbatikan nen Jonas so inter ed sikaton asainmin! (Jonas 1:3) Anto balet so gawaen nen Maria?

Siansian agnalingwanan diad inlabas na panaon iray simplin balikas to a pakapatnagan na inkamapaabeba tan katutulok. Inkuan to ed si Gabriel: “Nia, so aripen na Katawan; nagawa ed siak so unong na salitam.” (Lucas 1:38) Nensaman, say aripen a bii et sankaabebaan diad amin na saray aripen; tan say interon bilay to et akadepende ed katawan to. Ontan so liknaan nen Maria ed Katawan to, si Jehova. Kabat ton sikatoy maligen lapud proteksion na Dios, ta si Jehova et matoor ed saramay matoor ed sikato. Amta nen Maria a sikatoy bendisyonan nen Jehova legan ton gagawaen so anggaay nayarian to ed sayan mairap ya asainmin.​—Salmo 18:25.

No maminsan et pagawa na Dios ed sikatayo so singa mairap a kimey, ompan imposible ni ingen unong ed panmoria tayo. Bangbalet, say Biblia so mangiiter ed sikatayo na daakan a rason pian manmatalek ed sikato, ya ipudir tayoy inkasikatayo ed Dios, a singa ed ginawa nen Maria. (Uliran 3:5, 6) Ontan met kasi gawaen tayo? No ontan, bendisyonan itayo na Dios, a sengegay lalon ibiskeg na pananisia tayo ed sikato.

Say Imbisita To ed si Elizabet

Akatulong ed si Maria so impangipaamta nen Gabriel ed impanlukon nen Elizabet. Anggapo lay arum nin bii a makatalos ed situasyon to. Tamtampol a linma si Maria ed kapalandeyan na Juda, a nambiahe ed loob na talora odino apatiran agew. Legan a sikatoy onloloob ed abung di Elizabet tan Zacarias a saserdote, angiter si Jehova na kaaruman nin paneknek a mamabiskeg na pananisia nen Maria. Kadngel nen Elizabet ed impangibano nen Maria, tampol a ginmalaw so ugaw ed eges to. Sikatoy apano na masanton espiritu tan imbaga ton si Maria et “say ina na Katawan ko.” Impaamta na Dios ed si Elizabet a say anak nen Maria et magmaliw a Katawan to, say Mesias. Kaaruman ni, sikatoy apuyanan a mangidayew ed si Maria lapud matoor a katutulok to, a kuan ton: “Mapalar so [bii ya] anisia.” (Lucas 1:39-45) On, amin ya insipan nen Jehova ed si Maria et talagan nagawa!

Bilang ebat et nansalita si Maria. Saray balikas to et maalwar a nisulat ed Lucas 1:46-55. Saya so sankadukeyan ya impansalita nen Maria ya akasulat ed Biblia tan dakel so ibabaga na saya nipaakar ed sikato. Ipapatnag na saya a sikatoy lawas misalsalamat, legan ton dadayewen si Jehova lapud impangiter ed sikato na pribilehyon manlingkor bilang ina na Mesias. Saya so mangipapanengneng ed kaaralem na pananisia to, legan ton ibabaga ya iyabeba nen Jehova iray mapangta tan makapanyari, tan tulongan To iray mapaabeba tan mairap a manggugunaet a manlilingkor ed Sikato. Ipapanengneng met na saya so kalaknab na pikakabat to. Diad tua, masulok a duamplon danay a tinukoy nen Maria so Hebreon Kasulatan!

Mapatpatnag a talagan minorekdek nen Maria so Salita na Dios. Ingen, siansian sikatoy nampaabeba tan mas labay ton tukoyen so Kasulatan pian ipaliwawa so situasyon to. Onsabi panaon et ontan met ya espiritu so ipatnag na samay ugaw ya ombabaleg ed eges to, ya ikuan ton: “Say bangat ko agko kien, balet kien na angibaki ed siak.” (Juan 7:16) Kanian marakep no tepetan tayoy inkasikatayo: ‘Kasin rerespetoen ko met so Salita na Dios? Odino mas labalabay ko iray ideyak tan bangabangat ko?’ Malinlinew so ebat nen Maria.

 Nanayam si Maria ed kindi Elizabet ed loob na taloran bulan, ya andi-duaruwan akaawat tan akapangiter met na panamaseseg. (Lucas 1:56) Ipapanonot da’d sikatayo so kaimportantian na pikakaaro. No mananap itayo na saray kaaron peteg a mangaaro ed Dios tayon si Jehova, peteg ya onaligwas itayo met ed espiritual tan onapit tayo ed sikato. (Uliran 13:20) Panaon la pian onsempet si Maria ed abung da. Anto kasi ibaga nen Jose no nakabatan to so kipapasen to?

Si Maria tan Jose

Agla inalagar nen Maria ya ombaleg ni eges to insan to ibaga ed si Jose so kipapasen to. Kanian sikatoy andi-duaruwan akitongtong ed si Jose. Sakbay a sikatoy mitongtong, nayarin ninonot to no antoy reaksion na sayan desente, matakot ed Dios a laki. Anggaman ontan, sikatoy akitongtong tan imbaga ton amin so agawa. Talagan agonigon a maong si Jose. Labay ton panisiaan iyan inararo ton bii, balet ta say imbaga to et agnin balot agawa. Ag-ibabaga na Biblia no anto so walad kanonotan nen Jose odino no panon a sikatoy akikatunongan. Balet sinalambit na satan a sikatoy nandesisyon a mangisian ed Maria, lapud nensaman saray san-inaron akapisipanan la et momoriaen lan singa sanasawa. Ingen, agto met labay a nabaingan odino nadusa si Maria, kanian ninonot ton isekreto so pisian to. (Mateo 1:18, 19) Talagan asakitan si Maria ed impakaimaton ed sakit ya alikna nen Jose lapud sayan ag-iilaloan a situasyon. Anggaman ontan, si Maria et agnampasnok ed ag-impanisia nen Jose ed ibabaga to.

Si Jehova et ag-inmabuloy ed singa dugan desisyon a gawaen nen Jose. Diad sakey a kugip, imbaga ed sikato na anghel na Dios a say impanlukon nen Maria et peteg a mamilagro. Talagan sikatoy nainawaan lapud satan! Tinmulok met lay Jose ed panangigiya nen Jehova, a singa si Maria. Inasawa to lay Maria, tan sikatoy namparaan a manumpal ed nikadkaduman responsabilidad a pangasikaso ed Anak nen Jehova.​—Mateo 1:20-24.

Saray sanasawa, ontan met ed saray manplaplanon mangasawa odino miasawa et makaaral a maong manlapud ehemplo di Jose tan Maria, a nambilay 2,000 taon lay apalabas. Legan a nanenengneng nen Jose a gagawaen na ugaw nin asawa to iray responsabilidad tan kimey to bilang ina, seguradon sikatoy aliketan ed impangigiya na anghel nen Jehova. Talagan anengneng nen Jose so kaimportantian na panmatalek ed si Jehova sano manggawa na saray angkakabaleg a desisyon. (Salmo 37:5; Uliran 18:13) Sikatoy andi-duaruwan nansiansian mapangasi tan maalwar diad impanggawa to ed saray desisyon bilang sakey ya ulo na pamilya.

Diad biek a dapag, anto so nibaga tayo ed inkamabulos nen Maria a miasawa ed si Jose? Anggaman diad unaan et nairapan si Jose a panisiaan so ibabaga nen Maria, siansian inalagar to iyan laki a magmaliw ya ulo na pamilya. Talagan maabig iyan leksion ed sikato, ontan met ed saray Kristianon bibii natan. Diad kaunoran, sayan agawa so nayarin angibangat ed kinen Jose tan Maria nipaakar ed kablian na inkamatua tan lukas a komunikasyon.

Talagan maabig so inggapo na panamaley na sayan sanasawa. Inaro ran dua si Jehova a Dios nen say amin a bengatla tan sikatoy pinirawat dan paliketen bilang responsable tan maasikason atateng nen Jesus. Siempre, daakan a bendisyon so manaalagar ed sikara, tan dakel met ya irirap. Sikaray iilaloan a mamabaleg ed si Jesus, a diad kaunoran et magmaliw a sankatalonggaringan a too a nambilay diad mundo ed kapiganman.

[Litrato ed pahina 17]

Say panangaro ed Dios so sankaabigan a gapoan na panangasawa