1-2. Antoy kaiba ed pangaro tayod si Jehova, tan panon ya impanengneng nen Jesus ya inar-aro toy Jehova diad interon nonot to?

 “AROM si Jehova a Dios mo ed interon pusom tan interon kamarerwam tan interon biskeg mo tan interon nonot mo.” (Luc. 10:27) Imbaga nen Jesus ya diad amin ya akasulat ed Mosaikon Ganggan, atan so sankaimportantian. Naimano yo ya pigapigaray kaiba ed pangaro tayo ed si Jehova? Sakey lad tay puso tayo, ya ontutukoy ed saray pirawat o plano tayod bilay, pati say emosyon o nalilikna tayo. Kaiba met ed pangaro tayod si Jehova so interon kamarerwa ya panaglingkor tan say biskeg ya uusaren tayo parad sikato. Pero aliwan satan labat. Say pangaro ed si Jehova et lalanoren to met so nonot tayo, o say paraan na panag-isip tayo. Siempre, agtayo natalosan so amin ya walad kanonotan nen Jehova. Pero labay to ya gawaen tayoy anggaay nayarian tayo ya aligen so panagnonot to. Nagawaan tayo itan no aralen tayoy “kanonotan nen Kristo,” ta eksakto ton inalig so panagnonot nen Ama to.—1 Cor. 2:16 tan nengnengen met so study note ya “taglay natin ang pag-iisip ni Kristo” diad nwtsty-TG.

² On, inar-aro nen Jesus si Jehova diad interon nonot to. Kanian sankanonot ton lanang so panlabayan nen Jehova, tan inunor to itan anggano amta to ya manirap. Akapokus si Jesus ed panggawa na linawa nen Ama to. Atan so sankaimportantian ed bilay to.

3. Antoy naaralan nen apostol Pedro ed si Jesus, tan antoy impaseseg nen Pedro ed saray kapara ton Kristiano? (1 Pedro 4:1)

³ Balbaleg so pribilehyo nen Pedro tan arum nin apostol ta akaiba day Jesus tan naobserbaan dan mismo so paraan na panagnonot to. Akaaral ira ed alimbawa to. Diad samay unonan sulat nen Pedro ed saray Kristiano, pinaseseg to ra ya ‘iparaan day inkasikara a nawalaay panagnonot a mipadpara ed Kristo.’  (Basaen so 1 Pedro 4:1.) Amay Griegon salita ya inusar nen Pedro ya impatalos ya “iparaan yoy inkasikayo” et ontutukoy ed saray sundalo ya ipaparaan day armas da parad guerra. Kanian no aligen tayoy panagnonot nen Jesus, atan so pinagka-armas tayo pian nalabanan tayo ray mauges ya pilalek tayo, pati say mauges ya impluensya na sayan mundo ya uuleyan nen Satanas.—2 Cor. 10:​3-5; Efe. 6:12.

4. Panon ya makatulong iyan artikulo pian nagawaan tayo may bilin nen Pedro?

⁴ Pantongtongan tayo sirin ed sayan artikulo so paraan na panagnonot nen Jesus tan no panon tayon naalig itan. Amtaen tayo iraya: (1) no panon tayon naalig so panagnonot nen Jehova pian saksakey so nonot tayo, (2) no panon tayon magmaliw ya mapaabeba, tan (3) no panon ya makatulong so pikakasi pian nawalaan tayoy limpion kanonotan.

ALIG MOY PANAGNONOT NEN JEHOVA

5. Anto may sakey ya agawa ya say walad isip nen Pedro et duma ed panlabayan nen Jehova?

⁵ Wala may aminsan ya say walad isip nen Pedro et duma ed panlabayan nen Jehova. Impaliwawa nen Jesus ed saray apostol to no antoy nagawad sikato. Imbaga tod sikara ya sikatoy nepeg ya onlad Jerusalem, ipaaresto na saray lider na relihyon, pairapen da, insan da pateyen. (Mat. 16:21) Nen arengel itan nen Pedro, agto natanggap ya basta labat paulyanan na Dios ya ompatey si Jesus, say insipan ya Mesias ya mangiliktar ed saray totoo na Dios. (Mat. 16:16) Kanian impireg nen Pedro si Jesus, tan kuan to: “Kasian moy sarilim, Katawan; ag-iyan balot nagawa ed sika.” (Mat. 16:22) Akin et dumay panagnonot nen Pedro ed panagnonot nen Jesus? On ta agninonot nen Pedro so panlabayan nen Jehova.

6. Antoy ginawa nen Jesus ya pakapatnagan ya parehoy panagnonot to ed panagnonot nen Jehova?

⁶ Kabkabisado nen Jesus no panon ya mannonot so Ama to. Tan no antoy panlabayan nen Jehova, aman met so panlabayan to. Kanian oniay inyebat nen Jesus ed si Pedro: “La kad benegan ko, Satanas! Makasbel kad siak, ta say iisipen mo et kanonotan na totoo, aliwan kanonotan na Dios.” (Mat. 16:23) Amta nen Jesus ya pian naunor toy panlabayan na Ama to, kaukolan toy manirap tan ompatey. Kanian anggano maong so intension nen Pedro, agdinengel nen Jesus. Naaralan nen Pedro ed satan ya agawa ya kaukolan ton ipetek so panagnonot to pian naalig toy panagnonot nen Jehova. Tan ontan met so nepeg tayon gawaen.

7. Panon tayon amta ya naalig lanlamang nen Pedro so panagnonot nen Jehova? (Nengnengen so litrato.)

⁷ Pero asabi panaon, naaralan lanlamang nen Pedro ya aligen so panagnonot nen Jehova. Panon tayon nibaga? Nen aawaten la nen Jehova iray ag-asegat ya Gentil (o saray aliwan Judio) ya magmaliw a lingkor to, ingganggan toy Pedro ya pulongan si Cornelio, say sankaunaan ya aliwan Judio ya nagmaliw ya Kristiano. Diad saman, iiwasan na saray Judio iray aliwan Judio, kanian nayarin ontan met so panagnonot nen Pedro. Kaukolan to sirin ya umanen so panagnonot to pian nagawaan toy ipapagawa nen Jehova. Nen atalosan nen Pedro ya linawa nen Jehova ya magmaliw ya lingkor To iray aliwan Judio, inuman toy panagnonot to. Kanian nen impatawag nen Cornelio si Pedro, agla nanduaruwa. Linman “tampol”! (Gawa 10:​28, 29) Pinulongan nen Pedro si Cornelio tan say sankaabungan to. Tan bilang resulta, abautismoan ira.—Gawa 10:​21-23, 34, 35, 44-48.

8. Panon tayon nipanengneng ya aaligen tayoy panagnonot nen Jehova? (1 Pedro 3:8)

⁸ Kalabas na pigaran taon, pinaseseg nen Pedro iray kapara ton Kristiano ya dapat et “mankakasakey so nonot [da].” (Basaen so  1 Pedro 3:8.) Nagawaan tayo itan natan no aligen tayoy panagnonot nen Jehova. Diad Biblia tayo naamtaan no antoy panagnonot to. Singa bilang, nabasad Mateo 6:33 ya pinaseseg nen Jesus iray papatumbok to ya iyuna dad bilay da so Panarian. Kanian panon to no walay kakongregasyon mo ya nandesisyon ya manlingkor ya full-time? No sankanonot mo may imbaga nen Jesus ya ‘unaen so Panarian,’ agmo didismayaen may agi. Imbes ya pakapuyen moy liknaan to tan ibagam ya mairap so manlingkor ya full-time, komendaan mo ed satan ya desisyon to tan ipasegurom ya suportaan mo.

ARAL MOY MANPAABEBA

9-10. Antoy ginawa nen Jesus ya pakapatnagan ya talagan mapappaabeba?

⁹ Diad samay labi antis ya ompatey si Jesus, walay ginawa to pian naaralan nen Pedro tan arum nin apostol so magmaliw ya mapaabeba. Nen ngarem to man, ingganggan nen Jesus si Pedro tan Juan ya iparaan day sampot ya pangdem da ya kaibay Jesus. Nayarin kaibad satan so pangiparaan day palanggana tan tuwalya pian walay nausar dan panuras ed sali ra antis iran mangan. Pero siopa kasid sikara so manpaabeba tan manbulon ya urasan so sali na arum?

¹⁰ Si Jesus so mabulbulos ya nanggawa ed satan ya kimey. Abigbigla iray apostol ta agda ilaloan ya gawaen nen Jesus so kimey na sakey ya aripen! Nilakseb nen Jesus so ilalatop ton kawes, angalay tuwalya, insan to imbariber ed awak to. Angibales na danum ed palanggana insan to inurasan so sali na saray apostol to. (Juan 13:​4, 5) Imadyin yo pa ya sansakey ya uurasan nen Jesus so sali na 12 apostol to. Seguradon abayagay Jesus. Pero aliwan satan labat. Inurasan to met so sali na mantraidor ed sikato, si Judas. Talagan mapappaabebay Jesus! Kayari ton inurasay sali ra, oniay imbaga to: “Natatalosan yo no antoy ginawak ed sikayo? Tatawagen yo ak a ‘Managbangat’ tan ‘Katawan,’ tan duga kayo, ta ontan ak. Kanian no siak, a Katawan tan Managbangat, et inurasan ko iray sali yo, nepeg yo met ya urasan iray sali na balang sakey.”—Juan 13:​12-14.

11. Panon tayon amta ya naaralan lanlamang nen Pedro so magmaliw ya mapaabeba? (1 Pedro 5:5 tan paimanod leksab) (Nengnengen met so litrato.)

¹¹ Akaaral si Pedro ed inkamapaabeba nen Jesus. Nen wala lad tawen si Jesus, nanggaway milagro si Pedro. Pinaabig toy sakey ya lakin lupoy manlapu lad inkiyanak to. (Gawa 1:​8, 9; 3:​2, 6-8) Mankelkelaw iray totoon wadman kanian dinmadago ira. (Gawa 3:11) Binmaleg si Pedro ed lugar ya importantin maong so posisyon tan pagmaliw ya respetado, kanian pankanawnawa to la man komon pian iyatagey so sarili to. Pero andi, mapappaabebay Pedro. Agto inabuloyan ya idayew na totoo. Impaarap toy amin ya dayew ed si Jehova tan ed si Jesus. Oniay imbaga tod saramay totoon wadman: “Diad ngaran [nen Jesus], tan lapud pananisia mi ed ngaran to, binmiskeg iyan laki a sankanengneng yo tan kabat yo.” (Gawa 3:​12-16) Kalabas na pigaran taon, sinulatan nen Pedro iray Kristiano ya kaukolan day magmaliw ya mapaabeba. Diad saramay salitan inusar tod sulat to, nanonotan tayo may agawa nen imbalkes nen Jesus so tuwalya ed awak to tan inurasan toy sali na saray apostol to. Talagan akaaral si Pedro ed si Jesus!—Basaen so 1 Pedro 5:5 tan paimanod leksab.

12. Singa si Pedro, antoy gawaen tayo pian magmaliw tayon mapaabeba?

¹² Singa si Pedro, sarag tayo met so magmaliw  ya mapaabeba. Tandaan tayo ya say tuan inkamapaabeba et aglabat napatnagan ed saray ibabaga tayo. Say salitan inusar nen Pedro parad “inkamapaabeba” et nayari met ya ipatalos ya “kapaabebaan na nonot.” No ontan sirin, say tuan inkamapaabeba et lalanoren toy iisipen tayod sarili tayo tan ed arum. No manggawa tayoy kamaongan, say rason et lapud inaro tayoy Jehova tan saray kapara tayon totoo, aliwan lapud labay tayon pabiliben so arum. No maliket tayon manlilingkor ed si Jehova tan ontutulong ed saray agagi anggano anggapoy makakanengneng, prueba itan ya mapaabeba tayo.—Mat. 6:​1-4.

PANSIANSIAM YA LIMPIO SO KANONOTAN MO

13. Antoy labay ya ibaga na “limpion kanonotan”?

¹³ Onia ni impaseseg nen Pedro ed saray kapara ton Kristiano: “Nawalaan kayo komon na limpion kanonotan.” (1 Ped. 4:7) Antoy labay ton ibaga? Nibaga ya limpio so kanonotan na sakey ya Kristiano no antis ya mandesisyon et isipen to ni no antoy nalikna nen Jehova ed desisyon to. Sankanonot toy relasyon to ed si Jehova tan atan so sankaimportantian ed bilay to. Aliwa met ya atagtagey so pakanengneng tod sarili to ta natatalosan to ya wala ray bengatla ya agto amta. Si Jehova so  pandedependian tan pantitiwalaan to kanian mabetbet ya manpipikasi tan lanang ya manpapaigiya ed sikato. a

14. Antoy ginawa nen Pedro ya pakapatnagan ya agnantiwala ed si Jehova?

¹⁴ Diad samay labi antis na ipatey nen Jesus, oniay imbaga to ed saray disipulo to: “Diad sayan labi et taynanan yo ak ya amin.” Pero, oniay mataletalek ya inyebat nen Pedro: “Anggano taynan da kan amin, agta kan balot taynan!” Diad saman met lanlamang ya labi, binilin nen Jesus si Pedro tan arum nin apostol. Kuan to: “Mantultuloy kayon manbantay tan agkayo ontutundan manpikasi.” (Mat. 26:​31, 33, 41) No dinengel labat komon nen Pedro itan ya bilin, aga komon tinmakot tan makpel ton inamin ed arap na totoo ya sikatoy sakey ed saray disipulo nen Jesus. Pero makapaermen ta aliwan onman so agawa. Imburi toy Katawan to, tan pagbabawian to itan ya maong.—Mat. 26:​69-75.

15. Antoy akatulong ed si Jesus pian mansiansian limpio so kanonotan to diad samay labi antis dan pateyen?

¹⁵ Diad kabaliktaran balet, buo so tiwala nen Jesus ed si Jehova. Anggano perpekto si Jesus, agmanunday pikakasi to diad samay labi antis dan pateyen. Aman so amabiskeg na liknaan  to pian nagawaan toy ipapagawa nen Jehova ed sikato. (Mat. 26:​39, 42, 44; Juan 18:​4, 5) Naobserbaan nen Pedro ya talagan mapikasi si Jesus, tan seguradon tinmatak iman ed isip to.

16. Diad inlabas na panaon, anto ray pakanengnengan ya walaan la na limpion kanonotan si Pedro? (1 Pedro 4:7)

¹⁶ Sinmabi panaon ya nagmaliw ya mapikasi si Pedro tan binmiskeg so tiwala to ed si Jehova. Nen apaoli lay Jesus, pinaseguroan toy Pedro tan arum nin apostol ya makaawat iray masanton espiritu pian nagawaan day asainmin da ya ipulong so maong a balita. Pero imbaga nen Jesus ed sikara ya diman ni rad Jerusalem legan dan aalagaren so pakaawat da na masanton espiritu. (Luc. 24:49; Gawa 1:​4, 5) Antoy ginawa nen Pedro legan ya manaalagar? Sikatoy “nantultuloy a nampikasi” kaibay arum nin Kristiano. (Gawa 1:​13, 14) Diad samay unonan sulat nen Pedro, pinaseseg to ray kapara ton Kristiano ya nawalaan ira komon na limpion kanonotan tan lanang iran manpikasi ed si Jehova. (Basaen so 1 Pedro 4:7.) On, diad inlabas na panaon, naaralan nen Pedro so mantiwala ed si Jehova, tan nagmaliw ya pinagkalusek na kongregasyon.—Gal. 2:9.

17. Anggano maabilidad tayo, anto nin siansiay nepeg tayon gawaen? (Nengnengen met so litrato.)

¹⁷ Pian mansiansian limpio so kanonotan tayo, kaukolan ya mabetbet tayon manpikasi ed si Jehova. Anggano maabilidad tayo, agtayo mandedepende ed sarili tayo. Kerewen tayon kerewen so tulong nen Jehova, lalo la no wala ray importantin desisyonan tayo, ta sikato so makaamta no antoy sankaabigan parad sikatayo.

18. Antoy gawaen tayo pian mas naseguro tayo ya parehoy panag-isip tayo ed panag-isip nen Jehova?

¹⁸ Misatsalamat tayo ta pinalsa to tayo nen Jehova ya sarag tayon aligen iray kualidad to. (Gen. 1:26) Siempre, agtayo eksakton naalig si Jehova. (Isa. 55:9) Pero singa anengneng tayod alimbawa nen Pedro, sarag tayon aralen so panagnonot nen Jehova pian mas naseguro tayo ya parehoy panag-isip tayo ed panag-isip To. Itultuloy tayo sirin ya aligen so panagnonot nen Jehova, ipanengneng tayoy kapaabebaan, tan pansiansiaen tayon limpio so panagnonot tayo.