1, 2. (a) Akin ya kombinsido kan inar-aro nen Jehova iray lingkor to? (b) Antoy pankaukolan na amin a totoo?

AKIN ya kombinsido kan inar-aro nen Jehova iray lingkor to? Antis mon ebatan itan ya tepet, imanoen irayan alimbawa: Walay sister ya say ngaran to et Taylene ya diad pigaran taon et maaron pinaseseg na saray agagi ya magmaliw a balanse tan bidbiren ton wala ray limitasyon to. Imbaga to: “No agak inaro nen Jehova, sinmawa la komon ya mamibilin ed siak.” Oniay imbaga nen Brigitte, ya bukor toy amabaleg ed duaran anak to manlapu la nen inatey so asawa to: “Sakey ed saray sankairapan ya subok et say pamabaleg na ananak diad sayan sistema nen Satanas, lalo no bukbukor mo lay ateng. Balet amtak ya inaro ak nen Jehova ta anggano dakel so sengegan na iyaakis ko tan sasakitay liknaan ko et igigiya to ak, tan agton balot aabuloyan ya makaeksperiensya ak na probleman agko nayarian.” (1 Cor. 10:13) Si Sandra et walay sakit ton agla natambal. Aminsan diad kombension, walay sister ya angipanengneng na personal ya interes ed sikato. “Anggano diman mi labat akabat iman ya sister,” so kuan na asawa nen Sandra, “malikeliket kamid impanengneng ton panangiyansakit. Parad siak, anggan saray simplin  balikas na panangaro na saray agagi et paneknek ya talagan inar-aro itayo nen Jehova.”

² Pinalsa itayo nen Jehova ya walaan na pankaukolan ya naaro tan mangaro. No agnapenek itan ya pankaukolan, main-inomay ya onkapuy so liknaan tayo, nayarin lapud ag-iilaloan iran rason, singa say pansakit, problemad kuarta, odino anggapoy maabig ya resulta na ministeryo tayo. Kanian no maminsan, ompan nalikna tayon singa ag-itayo la inaro nen Jehova. Balet nepeg tayon tandaan ya papablien to tayo tan wadtan a lanang ya ontulong tan ‘mamemben ed kawanan a lima tayo.’ Agto tayon balot lingwanan no matoor tayod sikato.—Isa. 41:13, NW; 49:15.

3. Antoy makatulong pian lalo tayon napaneknekan ya agmangangga so panangaro nen Jehova ed sikatayo?

³ Segurado irayan indibidual ya abitla ed gapo ya wadtan a lanang so Dios ya ontulong ed sikara no wala ray problema da. Makapanmatalek tayo met ya naynay ya walad abay tayo si Jehova. (Sal. 118:6, 7) Diad sayan artikulo, aralen tayo so apatiran paneknek ya inar-aro itayo na Dios: (1) saray palsa to, (2) say impuyan ya Salita to, (3) pikakasi, tan (4) say dondon. No dalepdepen tayo ray maong a bengatlan ginawa nen Jehova, seguradon mas naapresya tayoy agmanganggan panangaro to.—Basaen so Salmo 77:11, 12.

4. Antoy naaralan tayo no dalepdepen tayo ray palsa nen Jehova?

⁴ Kasin nanengneng tayoy agmanganggan panangaro nen Jehova diad saray palsa to? On, ta say mismon impamalsa to et paneknek ya inaro to tayo. (Roma 1:20) Say impandesinyo tod dalin et dugaruga pian nasustuni so bilay. Balet, agto labay ya basta tayo labat manbilay, noagta labay ton na-enjoy tayoy bilay. Lapud kaukolan tayoy mangan pian manbilay tayo, sinegurado nen Jehova ya say dalin et makapawalay dakel ya tanaman ya sarag tayon kanen, pian makapaliket so mangan! (Ecl. 9:7) Walay sister ya tagad Canada ya say ngaran to et Catherine ya labalabay ton obserbaan iray palsa, lalo la no manga bandad Abril. Imbaga to: “Talagan makapakelkelaw no panon ya ombibilay iray walad kaliberliber—saray manrorosas ya tanaman tan saray ompapawil ya manok ya nan-migrate ed arum ya lugar, pati melmelag ya hummingbird ya oonlad bintana ed kusinak pian mantoktok na bukel. Seguradon inter iratan nen Jehova ya panlikliketan tayo lapud inaro to tayo.” Panliketan na maaron Ama tayo ed tawen iray palsa to, tan labay ton panliketan tayo met iratan.—Gawa 14:16, 17.

5. Panon ya nanengneng so panangaro nen Jehova ed inkagawa na too?

⁵ Pinalsa itayo nen Jehova ya walaan na abilidad ya mankimey pian mas na-enjoy tayoy bilay. (Ecl. 2:24) Inter tod too so responsabilidad ya panoen so dalin, uleyan itan, tan asikasoen iray sira, manok, tan arum nin mabilay a pinalsa. (Gen. 1:26-28) Tan inikdan to tayo met na abilidad ya ipanengneng iray balibalin kualidad pian sikatoy naalig tayo!—Efe. 5:1.

6. Akin ya nepeg tayon apresyaen a maong so Salita na Dios?

⁶ Inter nen Jehova ed sikatayo so Biblia lapud inar-aro to tayo. Nabasa ditan so nipaakar ed sikato tan no panon so pidedeneng tod totoo. Singa bilang, nabasa tayo ditan no panoy impantrato tod saray Israelita anggano mabetbet iran ag-ontutulok ed sikato. Oniay ibabaga na Salmo 78:38:  “Say Dios mapangasid saray totoo to. Pinirdona to ray kasalanan da tan agto ra pinatey. Naynay ya pinokpokan toy pasnuk to.” (Maung a Balita) No dalepdepen mo ’tan ya teksto, mas naapresyam so panangaro tan panangasikaso nen Jehova ed sika. Tandaan mo ya importante kad si Jehova.—Basaen so 1 Pedro 5:6, 7.

7. Akin ya importantin maong ed sikatayo so Biblia?

⁷ Nepeg tayon pablien a maong so Biblia ta atan so manunan uusaren na Dios pian makapitongtong ed sikatayo. No maabig so komunikasyon na ateng tan anak, mas panmatalkan tan aroen day sakey tan sakey. Si Jehova ey? Anggano agtayo nin balot anengneng tan agtayo nin balot nadngel so boses to, aliling to et sikatoy mitotongtong ed sikatayo diad panamegley na impuyan ya Salita to. Kanian nepeg tayon dengelen! (Isa. 30:20, 21) Labalabay nen Jehova ya igiya tan protektaan iray dedikadon lingkor to. Tan labay to met ya sikatoy kabaten tan panmatalkan tayo.—Basaen so Salmo 19:7-11; Uliran 1:33.

8, 9. Antoy labay ya ipaamta nen Jehova ed sikatayo? Mangiter na alimbawa diad Biblia.

⁸ Labay nen Jehova ya ipaamtad sikatayo ya inar-aro to tayo tan aliwan saray kakapuyan tayo so nenengnengen to, noagta saray maong ya nagagawaan tayo. (2 Awa. 16:9) Ontan so ginawa to ed ari na Juda ya si  Jehosafat. Aliway desisyon nen Jehosafat nen inibaan to so ari na Israel ya si Ahab ya miguerra ed saray Siryano diad Ramoth-gilead. Imbaga na 400 ya palson propeta ya manalo so mauges ya si Ahab, balet imbaga na tuan propeta nen Jehova ya si Micaias ya seguradon natalo ira. Inatey si Ahab diad guerra, tan ngalngali met inatey si Jehosafat. Kapawil nen Jehosafat ed Jerusalem, imbaki nen Jehova si Jehu ya anak nen Hanani pian sikatoy baaten lapud impialyansa tod si Ahab. Anggaman ontan, oniay imbagad sikato nen Jehu: ‘Wala ray maong a bengatlan anengneng ed sika.’—2 Awa. 18:4, 5, 18-22, 33, 34; 19:1-3.

⁹ Nen kagapo ni labat na uley nen Jehosafat, ingganggan to ray prinsipe, Levita, tan saray saserdote ya ibangat da so Ganggan nen Jehova ed amin a syudad ed Juda. Maong so resulta na satan a kampanya ta anggan saray totood kaliberliber a bansa et tinmakot ed si Jehova. (2 Awa. 17:3-10) Tua, aliwa may desisyon nen Jehosafat nen akialyansad si Ahab, balet agnilingwanan nen Jehova iray maong ya ginawa to. Ipapanonot na sayan salaysay ed Biblia ya anggano agtayo perpekto, agmanguman so panangaro nen Jehova ed sikatayo no gawaen tayoy anggaay nayarian tayon manlingkor ed sikato diad interon puso.

10, 11. (a) Akin ya espisyal ya regalo so pampikasid si Jehova? (b) Panon ya eebatan na Dios iray pikakasi tayo? (Nengnengen so litratod gapo na artikulo.)

¹⁰ Say maaron ama et dengelen to ray anak to no labay day mitongtong ed sikato. Aamtaen to no anto ray problema da ta sankanonot toy pankaabigan da. Ontan si Aman Jehova. Dedengelen to itayo sano manpipikasi tayod sikato.

¹¹ Makapanpikasi tayod si Jehova ed anggan anton oras. Agto itayo lilimitaan no kapigan tayo manpikasi odino no antoy ipikasi tayo. Sikato so Kaaro tayo ya lanang ya akaparaan ya ondengel. Oniay imbaga nen Taylene, ya abitla nen niman: “Nibagam ya amin ed sikato.” No ibaga tayod Dios so amin ya nononoten tan nalilikna tayo, nayarin ebatan to tayo panamegley na sakey a teksto ed Biblia, sakey ya artikulo ed magasin, odino diad panamaseseg na agi. Dedengelen nen Jehova iray pikakasi tayo tan natatalosan to tayo anggano ag-itayo natatalosan na arum. Saray ebat tod pikakasi tayo et paneknek ya agmangangga so panangaro tod sikatayo.

12. Akin ya nepeg tayon aralen iray pikakasin akarekord ed Biblia? Mangiter na alimbawa.

¹² Dakel so naaralan tayod saray pikakasi ya akarekord ed Salita na Dios. Kanian maabig no aralen tayo iratan diad panagdayew na pamilya tayo. No dalepdepen tayo no panon ya imbalikas na saray lingkor nen Jehova nensaman iray nononoten tan nalilikna ra, napaaligwas tayoy kalidad na saray pikakasi tayo. Singa bilang, balibalin aralen imay mapaabeban pikakasi nen Jonas nen sikatoy walad eges na baleg ya sira. (Jon. 1:17–2:10) Usisaen imay impapuson pikakasi nen Solomon sanen indedika to so templo. (1 Ara. 8:22-53) Dalepdepen imay modelon pikakasi ya imbangat nen Jesus. (Mat. 6:9-13) Tan manuna ed amin, nepeg ya lanang mon ‘ipaamta ed Dios iray kerew mo.’ Bilang resulta, ‘say deen na Dios a palumbasan toy amin a kanonotan so manbantay ed saray puso tan nonot mo.’ Ontulong itan pian lalom ya naapresya so agmanganggan panangaro nen Jehova.—Fil. 4:6, 7.

13. Antoy nagmaliw ya posible lapud dondon?

¹³ Inter nen Jehova so mabmablin regalo ya dondon pian “nagamoran tayo so bilay.” (1 Juan 4:9) Oniay insulat nen apostol  Pablo nipaakar ed satan ya sankaabigan ya balikas na panangaro na Dios: “Si Kristo et inatey parad agmaridios a totoo diad aturon panaon. Ta parad sakey a matunong a too et anggapoy malabay ya ompatey; balet parad sakey a maong a too et nayarin walay makpel ya ompatey. Balet ipapatnag na Dios so panangaro to ed sikatayo, ta anggano makasalanan itayo ni et inatey si Kristo parad sikatayo.” (Roma 5:6-8) Sayan sankaabigan ya balikas na panangaro na Dios so rason no akin ya posiblin nawalaan itayo na maapit a relasyon ed sikato.

14, 15. Lapud dondon, antoy arapen na saray (a) alanaan a Kristiano? (b) walaan na ilalon manbilay diad dalin?

¹⁴ Wala ray Kristiano ya nalilikna day agmanganggan panangaro nen Jehova diad espisyal ya paraan. (Juan 1:12, 13; 3:5-7) Nilanaan ira na masanton espiritu kanian nagmaliw iran “ananak na Dios.” (Roma 8:15, 16) Imbaga nen Pablo ya saray alanaan a Kristiano et ‘binilay tan pinayurong a mankakaiba ed tawen bilang nikasakey ed si Kristo Jesus.’ (Efe. 2:6) Ontan so espiritual ya kipapasen da lapud ‘atatakan la ra na insipan a masanton espiritu, a saya so unona lan pakaseguroan na tawir da’—say ‘ilalo a nitarya ed sikara diad katawenan.’—Efe. 1:13, 14; Col. 1:5.

¹⁵ Saray ag-alanaan ya manisia ed dondon et nayarin magmaliw met ya kaaro nen Jehova. Tan diad arapen et posiblin tagibien met ira bilang ananak na Dios tan manbilay ira na andi-angga diad Paraiso ed dalin. Kanian panamegley na dondon, impanengneng nen Jehova ya inar-aro toy amin ya totoo. (Juan 3:16) No say ilalo tayo et manbilay na andi-angga diad dalin tan matoor tayon manlilingkor ed si Jehova, seguradon balibalin bilay so iter tod sikatayo diad balon mundo. On, say dondon so manunan paneknek ya agmangangga so panangaro na Dios ed sikatayo!

16. Antoy resulta no dalepdepen tayoy dakel ya paraan ya ipapanengneng nen Jehova so panangaro tod sikatayo?

¹⁶ Agtayo nabilang so dakel ya paneknek ya inar-aro itayo nen Jehova. Inkansion nen salmistan David: ‘Alay kablian na saray nodnonot mo ed siak, O Dios! Agaylay karakel na bilang da! No bilangen ko, dakdakel ira nen saray buer.’ (Sal. 139:17, 18,) No dalepdepen tayoy dakerakel ya paraan ya ipapanengneng nen Jehova so panangaro tod sikatayo, sikatoy naar-aro tayo tan napakiwas itayon iter so sankaabigan tayo ed sikato.

17, 18. Anto ray pigaran paraan pian nipanengneng tayoy panangaro tayod Dios?

¹⁷ Dakel so paraan pian nipanengneng tayon inar-aro tayoy Jehova. Singa bilang, ipapanengneng tayon inar-aro tayoy Dios tan say arum a too no maseseg tayon ipulong so Panarian. (Mat. 24:14; 28:19, 20) Ipapanengneng tayon talagan inar-aro tayoy Jehova no sungdoan tayo ray subok ed pananisia tayo. (Basaen so Salmo 84:11; Santiago 1:2-5.) Anggano grabe so dadalanen tayon subok, makapanmatalek tayon amta nen Jehova so paniirap tayo tan tulongan to tayo lapud mabmabli tayod sikato.—Sal. 56:8.

¹⁸ Say panangaro tayod si Jehova so mamakiwas ed sikatayon dalepdepen iray palsa tan arum nin makapadinayew ya ginawa to. Ipapanengneng tayon inaro tayoy Dios tan papablien tayoy Salita to no makuli tayon manaral na Biblia. No inaro tayoy Jehova, iyapit tayoy sarili tayod sikato diad pikakasi. Tan lalon onaralem so panangaro tayod sikato no dalepdepen tayoy dondon ya inter to parad saray kasalanan tayo. (1 Juan 2:1, 2) Pigara labat iraya ed amayamay ya rason pian aroen tayoy Jehova bilang bales ed agmanganggan panangaro tod sikatayo.